LUKAQ 20

Jesuq Arang

(Mot 21.23-27; Mak 11.27-33)

1Ranaiqshi Jesuq ka Shomjam na nokwe ma, Tsütsa Ahea shrinke rea nai traho bom chongke rea riito. Kra akhing na, ramwe jongbi nai Thungtri shrinketibi thun ka welabi rai adam na ri raüta, Jesuq phana wato. 2Raüta, apaiq ma bom ka akha waito, “Chong liita, ümniiraq arthun jaqsham ara sham miitu, arang ka jambawo lap laü? Ümniima arang ka juro kuqta?”

3Kiijiishe, Jesuq raq tsangshiq bom ka akha treto, “Ikhla, ümchaü ngi raq namshiq ma bom poshi waipha shaq. Ngi ma chongrong liita. 4Riita, Johan ma khamlamke arang ka Shiikeawe raq akuq sha, maiqse raq akuq wa?”

5Kra tai raüta, tsangshiq liipan niishe akha riichongto, “Nashiq riika jamkho mingu rong i? Nashiq raq, ‘Shiikeawe raq akuq,’ nguta ngu hai jiika, apaiq raq, ‘Ikhiijiika namshiq raq Johan bomchong ma jamto kam man?’ nguta mingu. 6Shatmaq, nashiq raq, ‘Maiqse raq akuq,’ nguta ngu hai jiika, arjaq thung tlaq mungmaiqse raq, nashiq ka long maq mitiiq baiq. Jamkhano ngukla, tsangshiq raq Johan ka shammi we dea nguta asap.” 7Krai mren, tsangshiq raq, “Ju raq akuq wa riila, naishiq riiha sapmai,” ngutli Jesuq bom ka treto.

8Kiijiishe, Jesuq raq, “Ikhiijiika, ngi riimin, arthun jaqsham ara ju arang mo sham tiikang kriika namshiq ma chongkuq mang,” nguta tsangshiq bom ka treto.

Spiqtsi Ro Akheng Na Shamtinok Shiiton

(Mot 21.33-46; Mak 12.1-12)

9Kiijiishe, Jesuq raq nokwe ma ara manphan shiiton arshe chongkuqto. “Akhing ashi na maiq weshi raq spiqtsi ro ashi chhito. Kra spiqtsi ro ka akheng na shamseati ma tiishiip kuqto. Raüta, apaiq ka wanhiq na luhea sikai she kihoto. 10Spiqtsi pansea cho akhing she saüto angu na, apaiq raq adise ashi ka, waksham seatibi phana, wakkheng tiijaükai tiikito. Shatmaq, wakshiip seatinok raq, adise saüwa kiita, apaiq ka ninta tsat raüta, jaqmii miili tiijang baiqto. 11Kriikha maq, apaiq raq adise ashi hali, tsangshiq phana tiiki nongto. Shatmaq, wakshiip seatinok raq, apaiq kiimin ninta tsatto. Kiimaq tiijea miisi she haihii raüta, jaqmii maq hali tiiwa baiq nongto. 12Kra jai miishe hali, apaiq raq adise wetsam ngoja kriishe hali tiiki nongto. Wakshiip seatinok riika, kriiwe kiimin ninta tsat raüta, mo tiiho raütli, spiqtsi ro mong wa jobaiq nongto. 13Kra riikiitiishe, spiqtsi ro wakchongti we riika, ‘Riita, ümchaü sanha, ngi raq jamlai she wa mirha? Ikhla, ngi raq I se shaq arli she tiikai chang miraq. Tsangshiq raq I se shaq arshe kla, mishreng she ahiq!’ nguta atsan mong na tiimato. 14Shatmaq, wakshiip seatinok raq, ase shaq kriishe chhi raüta, tsangshiq nai tsangshiq liipan na, ‘No tsam, arhata atati we se. Nashiq raq apaiq ara tiishe rong i na. Kriishe riihai jiika, apaiq tachong hupsam thun kriika nashiq rii she miraq!’ nguta bom ka riichongto. 15Krai mren she, tsangshiq raq apaiq ka lapho raüta, spiqtsi ro wak phekam na hitho raüta tsatbaiq kito.”

“Riita, ikhiijiika, wakchongti we raq wakshiip seatinok kriika jamkhii she mirwan ngutiiwa tiima tlan?” nguta Jesuq raq tsangshiq ma bom ka waito. 16“Apaiq ka kiraüta, wakshiip seatinok ka wiita atsea mirbaiq. Raüta, wak ka maiq ahinti miishe mitiishiip kuq!” nguta Jesuq raq tsangshiq ma bom ka chongkuqto.

Nokwe raq kra bomchong kra tai raüta, “Ai, akha wiqwiq kla, naq ümriikiq dea!” nguta Jesuq bom ka treto.

17Kiijiishe, Jesuq raq tsangshiq phanü na lii raüta, “Riita, ikhiijiila arjaq, Asii bomtsi na chong tlaq arka jamlai ngo wa?

‘Jamhai wanti nok raq longkaü ashi ka,

athii ahü nguta tiithu baiqto.

Shatmaq kra kaü riiwe ka khoti tarü thaq na,

khamlawe ma shong wan chang she jakito.’

18Juwa ara longkaü thaq na tiithap tlaq, kriiti ka pan nai pan tsam ma michum baiq wan. Kiimaq, ara longkaü arka maiq ashi ra thaq na kü wan raüla, kriiti ka botkhulai rai shot tlii mitiiq baiq wan.”

Phuntake Miitu Bom Riiwaito

(Mot 22.15-22; Mak 12.13-17)

19Kra tai raüta, Thungtri shrinketibi nai ramwe jongbi raq, Jesuq ka kriijiili lapholai nguta danto. Kra jamkhano tanta ngukla, kra manphan shiiton maq tsangshiq ka shiitanto nguta sapto. Shatmaq, tsangshiq ka mungmaiqse ma ahai kha maq, apaiq ka lap mak dea riito. 20Kriikha miishe, tsangshiq raq apaiq tiishut miitu akhing ahea liishat miili she kheto. Krai mren, tsangshiq raq maiq ma tsiiqlap kuq raüta, asi asinti maiq ka Jesuq phana tiikito. Kra siwe jatibi ka maiqshaq ikha tiiman raüta, Jesuq phana bom waikai tiikito. Kriika tsangshiq bom thiikho tsan tlaq kiijaq, Jesuq ka tiithap ma nguta tiikito. Raüta, Jesuq ka Jehudinok welabi raq Roman Wanghupti we jaq na lapke ma nguta hangto. Raüta khahü na, tiitsea baiq miitu hangto. 21Ara siwebi tiikitaq ariiraq, Jesuq ma bom ka akha waito, “Shrinketi we, ümniiraq jamlai wa chong tlaü kra nai jamlai wa shrinkuq tlaü kriika tengteng dea. Naishiq raq asap hai, ümniiriika maiq sham na lii laüta, maiqse ka tiikhothiq maü phan. Tengtlaq Shiikeawe bomtsi ka maiqse miitu chongke chang sitlaq kriili chongkuq tlaü. 22Riita, ümchaü ümniiraq naishiq ma bom poshi chong liita, nashiq raq Roman Hokhamwe ma phuntake kriika, nashiq Thung- tri na hong tlaq sha hong mak wa?”

23Shatmaq, Jesuq raq tsangshiq thiikho ka chhi shat. Kriikha maq, 24“Kampho sii ashi ka lii i ta. Riita, arjaq sumla nai amang waiqtaq arka, ju sumla wa kiimaq ju mang wa waiqta?” nguta Jesuq raq tsangshiq ma waito.

Kiijiishe, “Hokham we sumla nai Hokham we mang,” nguta tsangshiq raq bom ka treto.

25Kiijiishe, “Ikhiijiika, Hokhamwe la ka Hokham we ma kuq rong liina. Kiimaq Shiikeawe la ka Shiikeawe ma kuq rong liina,” nguta Jesuq raq tsangshiq bom ka treto.

26Kriijaq tsangshiq raq nokwe makki na, Jesuq ka jamlai nyan niimin tiishut lot mak she riito. Kriikha maq, tsangshiq ka kaiqshak li she ngakito. Kiimaq, apaiq raq tsangshiq bom ka tiingathu she tretaq kra chhi raüta, awang rai li she riito.

Amaa Wa Dong Wan Lamlu Chongto

(Mot 22.23-33; Mak 12.18-27)

27Kiitiikaq, maiq ka ama wa dong wan mak she nguta kamwantibi Sadusinok wiijamti ka Jesuq phana kito. Raüta, tsangshiq raq Jesuq ma bom ka akha waito, 28“Shrinketi we, Mosheq raq nashiq miitu thungtri waiqthütaq kiijaq akha chongtlo: ‘Ümtiikiiwa maiq weshi ka ase ahü maq tsaiki tlaq, kra haü la, wulum we ma tanyung ka, apaiq ma anowe riishe rom wan ra tlo. Raüta, tsangnai setiim kriika, wulum we ma lai ma jawan chang miraq.’ 29Riita akhing ashi na maiq siphu wemiishi asi riito. Kiimaq, phukhu we raq tsang-nyung ka lamto. Shatmaq, laihü miili apaiq ka tsaikito. 30Kiijiishe, anowe apaiq jai thongti we raq anyi- chhinyung ka romto. 31Kra jai miika nojam we atsam ngoja we riishe romto. Kra niq riri siisaq li, tsangtsam siphu wemiishi raq tsangnyi- chhi-nyung ka romto. Shatmaq, tsangshiq wiitarü ka laihü maq siisaqli she chongthum ma jato. 32Atiisup niishe, jechaknyung kriishe tsaikito. 33Riita, tsangshiq siphu wemiishi raq kra nyung ka rom wanto. Ikhiijiika, maiqse ka ama wa dong wan tlaq ranaiq akhing na, apaiq ka ümriiti we tanyung ngutiishe wa mingu wan? Jamkhano ngukla, tsangshiq tarü siphu wemiishi raq apaiq ka rom wanto.”

34Kiijiishe, Jesuq raq tsangshiq bom ka akha treto, “Ara mangjong han-ngam rilung niika, maiqse ma arlam arwa nguta asi. 35Shatmaq, Shiikeawe raq khaphoke jai she, ümriiti wa ama wa dong wan thek tlo nguta phokuq tlaq, kriiti miika, saüho tlaq pat na arlam arwa ngutiika ahü she. 36Tsangshiq ka rasetiim ikhli she, kiimaq atsai ngutiimin ahü she. Tsangshiq ka Shiikeawe setiim she. Ara jamkhano chongtiikang ngukla, tsangshiq ka ama wa adong wan kun she. 37Kiimaq, Mosheq raq maiqse ka ama wa adong mirwan nguta, tsangriri hea maq tiichhikuq wanto. Arka alürai sangphii tam nguta bom chong tlaq lakdap jaq ba kiijaq, apaiq raq Tatiwe ka, ‘Abraham Shiikeawe, Isak Shiikeawe, kiimaq Jakob Shiikeawe,’ nguta chongtlo. 38Apaiq ka maiqse ama sitlaqti Shiikeawe ka riimak. Apaiq ka maiqse atra sitlaqti Shiikeawe. Ara jamkhano chongtiikang ngukla, apaiq miika maiqse angu wiitarü ka atra siisaq li.”

39Kiijiishe, Thungtri shrinketi phong wa maiq wiijamti raq Jesuq ka akha somto, “Shrinketi we le, athukwiq dea tre laü!” 40Kra jai miishe ka, tsangshiq raq Jesuq ma jurmin bom ka anye waikham mak she riito.

Khristo Ka Juwa?

(Mot 22.41-46; Mak 12.35-37)

41Kiimahali, Jesuq raq tsangshiq ma waito, “Riita, Khristo ka Dawit saüse phan wa ngutiika jamkho mingu ta? Ara jamkhano wai tiikai ngukla, 42Dawit apaiq riili, Tiitsamshi lak na akha chongtlo,

‘Tatiwe raq i Tatiwe ma chongto:

Ümniika ngi ma jaqtsi nü arjaq nga laq,

43ngi raq ümjaqti thun ka kunkun khat lata,

sepat lope ümji chong na

miphong kuq wan ha shaq wiiwii,’ nguta chongtlo.

44Riita, Dawit raq Khristo apaiq kra nangnga, ‘Tatiwe,’ nguta ngutlaq jiika, Khristo ka Dawit saüse phan wa ngutiika jamkho mingu?”

Jesuq Raq Thungtri Shrabi Tiishutto

(Mot 23.1-36; Mak 12.38-40)

45Mungmaiqse pahea raq apaiq traho bom chongke ka taitlaq kriijaq, Jesuq raq ajaqshisetiim ma chongto, 46“Namshiq ka Thungtri shrinketibi hon atsii abi pülii tlaq kriima naq tiibok wan rongkiq. Namshiq ka tsii lamshat maq si ronglaq. Tsangshiq ka tsangshiq miirii kheathum ajong alu kriimaq tiijop raü raüta, ajong alabi dea nguta, tiibai miinge khumsea kli lungwiitlo. Kiimaq kejat thung maq, maiq raq shomnoq shreng tlaq kra ritli khum tlo. Tsangshiq riika, sinagok na Shra jongbi nai ajongbi ngachang, pong na arai raüta athü ngachang kriijaq ngakai kriili lungwiitlo. Kiimaq poi awii ranaiq akhing niika, maiq ngachang ahea pinthum, aki miikiimbi ma nguta pong na arai raüta athü ngachang, kriili tsea raüta ngatlo. 47Tsangshiq riika, manti liihi nyungre ka süpsi wantlo. Kiimaq achu jaü ka, shetangtang tiichhi ha jaü raüta, tsangshiq jamkun ka wiita laolii phaqsiq wan tlo! Tsangshiq khuthaq na Shiikeawe raq kha ka jonghea mikuq. Kiimaq tsangshiq miika pinthum achonglot mai chamchao jonghea mikuq wan!”

Currently Selected:

LUKAQ 20: TANGSBSI

Highlight

Copy