LUKAQ 21

Riikhaqli Honglu

(Mak 12.41-44)

1Jesuq ka Shomjam na riito. Jesuq raq Shomjam mong na tro tri tiitsang liito. Kiimaq, kiijaq chiithe maiqse raq tsangshiq honglu ka, Shomjam kampho tek na thiirea chhito. 2Kiimahali, apaiq raq manti-nyung ashi, miitsan pinthum kra riimin, poisa anai kra honglu tek mong na thürea chhito. 3Kra chhi raüta, apaiq raq nguto, “Ngi chongpha, ara miitsan manti-nyung raq honglu akuq ara riiwe ka ahinti raq honglu akuq thaq na apa kuqto. 4Ara jamkhano chongtiikang ngukla, nanok ahinti raq honglu kuq tlaq kriika, maiqmii win naü kuqtlo. Shatmaq, ara miitsan nyung raq kuqtaq arka, apaiq jaq wa chonkhi laqli se, tachong hupsam kuqto.”

Shomjam Mitiithenbaiq Nguta Chongto

(Mot 24.1-2; Mak 13.1-2)

5Ajaqshisetiim phong wa wiijamti raq, Shomjam ka longpen tsomhea maq ahai kra pinthum alüsea chang dea nya nguta riichongto. Kiimaq, Shiikeawe ma honglu akuq hupsam thun kra shamhea sitlaq kra riiphan chansiqto. Kra riiphan chan sia wan kra tai raüta, Jesuq raq, 6“Arthun ümchaü namshiq raq chhi tlan arka, akhing ashi saü wan raüjaq, bunlak buncha she mitiibun baiq. Ara jamhai chang longpen diim kaü thun arka, wiita hiq maq hutse botkhulai rai shot tlii mirun baiq.”

Mungbrak Matdong Nai Chamchao Akhing

(Mot 24.3-14; Mak 13.3-13)

7Kra tai raütiishe, “Shrinketi we, riita ara chong tlaü mra pin arka, ümtincho wa misaü wa? Kiimaq, ara akhing she saüto nguta tiichhike miitu ka jamlai phan maji binriim wa misaü?” nguta tsangshiq raq apaiq ma bom ka waito.

8Kiijiishe, Jesuq raq treto, “Namshiq ka honkam shat maq sirong laq. Maiq ma naq tlao rongkiq. Maiq pahea ka i mang shaphaq raüta, misaüho. Raüta, tsangshiq raq, ‘Ngi ahata Khristo!’ nguta mitiitsaki. Kiimaq, ‘Phangthum akhing ka saü wato she!’ nguta mingu. Shatmaq, tsangshiq jai ka naq phan rongkiq. 9Namshiq raq chiq are dong nai hokham riinya redong tsütsa ka tai han jiila, naqhai song rongkiq. Akha mung aman brak shaq wan, mra thun arka kongkhu na pin wan chang dongdii. Shatmaq, kra chhi lanta, phangthum wan miika ajeli she dea sham nguta tiima wan chang ka riimak.”

10Jesuq raq akha chongkuqto, “Maiq mung thun sitlaq kra liipan na, re ka midong wan dongdii. Hokham nai hokham liipan na, re riikhat matdong tsadong wan kriika misi dongdii. 11Kiimahali, barap binrii na, phiiptsi jiiptsi hiqjong mimu. Kiimaq, barap binrii na, song aram ka midong. Kiimaq barap binrii na tha ka midong. Kiimaq, maiq wang chang nai phiiptsi chang pahea, rawang win na saükai michhi han. 12Riita, arthun mra ara mipin wan shaq na, namshiq ka maiq raq alu aban miraq. Raüta, mitiichamchao. Namshiq ka sinagok thun na mitiichap. Raüta, namshiq kha ka mipho. Kiimaq phaqtek mong na mishaq. Namshiq ka hokhambi nai welabi man na, i mang chong ara miitu mitiichap. 13Riita, arka namshiq raq Tsütsa Ahea kra maiqse ma chongke akhing miraq. 14Namshiq ka mishaq niiphü, kamto maq si rong laq. Kra akhing ranaiq saü raüjaq, maiqmii khum ka jamkhii tiichhii wan chang wa miraq, nguta naq chapa rongkiq. 15Ara jamkhano chongkuqtiikang ngukla, ngi raq namshiq ma phaqchi mikuq kang. Namshiq raq maiqmii khum tiikhe bomchong ka, namjaqti nok raq jurmin khü lot mak chang bom michong kuq han. 16Namshiq ka nam nyungwe raq mitiishaü baiq. Namphu namno raq, namshiq ma tanyang senobi raq, kiimaq kongtibi raq mitiishaü baiq. Namshiq phong wa wiijamti ka, atsea mirbaiq. 17Namshiq ka ngi tingkhu na maiqse angu wiitarü riishe mishushe wan. 18Shatmiitiina, namshiq khu wa khubin loshi se dongdii min tiidea wan lot mak miraq. 19Namshiq jaqkhon ka naq tiihiim rongkiq. Pharang rang maq chap wan ruq li si rong laq. Kra riihan jiila, namshiq raq riikhaqli maiqmii rilung kra milap wan han.”

Jerusalem Tiithenbaiq Chongto

(Mot 24.15-21; Mak 13.14-19)

20“Namshiq raq ümtiikiiwa Jerusalem ka phenlabi raq akom baiq rea wishe michhi han, kra chhihan jiila, chela tiithen baiq wan akhing ka saü wato she dea nguta misap han. 21Kriishe chhihan jiila, juwa Judia wang na siti bi thun kriika, ku akin kiina, maiqmii chiimjin pin wantlo chang. Kiimaq, chela mong na sitibi riimin, maiqmii chiim jin, chela mong wa ahin na pin wan chang miraq. Kiimaq, maiq hiqshong na siti bi, ka chela nü na khumkai ra mak. 22Kra matdong akhing kriika, Asii bomtsi na, ‘Atiichamchao wan Akhing,’ nguta chongtlaq kra bomtsi kra tiiku wan akhing rahiq she dea saü wanto nguta sap chang miraq. 23Kra phiiptsi chang rahiq akhing ka, jechakre wiihanti nai noshii nyung re ma kai phiiptsi jiiptsi chang akhing miraq! Ara mungti ma, kra rahiq akhing kriika, pinthum chamchao riiweachhi akhing miraq. Kiimaq, kra akhing kriika, Shiikeawe raq arnok ma chamchao tiisaü akhing rahiq miraq. 24Maiq wiijamti ka, re raq mitsat baiq. Kiimaq, maiq abiti thun kriika, rewe raq shumraü kharü maq khawan raüta, shumwi ma mungrap mungrii na mitsuq wan. Raüta, thatsang maiqse raq, tsangshiq raq mung jamsha wan akhing rahiq kra minyi wan shaq wiiwii, Jerusalem arka botkhulai rai shot baiq raüta, mungmaiqse ka mijam sha wan.”

Maiq Se Saükai Akhing

(Mot 24.29-31; Mak 13.24-27)

25“Kra akhing na, rashe kaü nai jipi kaü thaq na, kiimaq ra na raiqsaiq thun sitlaq kra thaq na, awang chang thenjen wan pahea mitiichhi kuq. Mangjong hiq khu thaq na, mung ümchuwa sitlaq wiitarü ka, tsaihü jihü maq akii anyii watrang li she miraq. Kiimaq, sammoktra jütso mok trang kra tai raüta, mangjong maiqse ka, tsaidoq jidoq she, aphiip ajiip riili she mitsai. 26Maiqse angu ka mangjong hiq khu thaq na jamlai wa tham wan tlaq, kra chhi raüta, akiinyii phiip raq mitsai. Ra wang win na, sitlaq ningkun ajong thun kriika, tsangshiq maiqmii khum chang lam kriiwa wiita arun she mirbaiq. 27Kra ra nai hiq thun kra brak shaq wan jai shetiq, Maiq Se kriika phum mong na, apaiq ningkun ajong pinthum kra ho raüta nai achhai anyii khushü ngao jonghea kra ho raütiishe misaüho. 28Riita, ümtiikiiwa ara chong tiikang mra thun arshe pinpha wan haü jiila, namshiq ka hokni tiipha shat miishe chap lanta khe rong laq. Kiimaq, namtok ka ra nü na dorang riilanta, namshiq ma tiichhii wan akhing rahiq ka saü wato she dea nguta, khekham maq si rong laq.”

Phupmup Chong Wa Tsiilam Chang Bomtsi

(Mot 24.32-35; Mak 13.28-31)

29Kiimahali, Jesuq raq tsangshiq ma, ara shiiton manphan bomtsi ara chongkuqto, “Ara bom arka, phupmup chong nai phan hin pechong thun maq shiiton rong i. 30Namshiq raq ümtiikiiwa, ara chongtiikai pechong thun kü ako thun na, ajaq dongnye setiim she nüm pha wan michhi han. Kriishe chhi han jiila, junyap wan akhing she saü wato nguta sap tlan. 31Krai mren sii hali, namshiq raq ümtiikiiwa, ara chong tiikai thun mra pin pha wan she chhi han jiila, Shiikeawe Mungtan ka saüto she dea nguta misap han.”

32“Tsan na tiitsang rong laq. Ara chong tiikang thun mra pin akhing saü wan kriika, ümchaü pat wa maiq thun ara wiita mitsai wan shaq niili mihong tha wan. 33Ra nai hiq ka athum mirki. Shatmaq, i bomtsi arka poiki mak phan.”

Kheshat Maq Sironglaq

34“Namshiq ka honkam shat maq si rong laq! Namshiq ka che nyang dungsea peosea na nai mungkang han-ngam miitu chapasea niili ka, naqmo chü rongkiq. Kra Ranaiq raq namshiq ka 35thiikho na adea wa tin, amok riidung li miili tongho mak chang miitu, tsii lam shat maq si rong laq. Kra Ranaiq saükai akhing ka, mangjong maiqse wiitarü ma, barap se na misaüki. 36Ara chong tiikai mra pin akhing saü wan tlaq kra thun ka wiita kunkun tang wan miitu, lanta namshiq ka tiichhii wan miitu, achu jaü shatmaq kiimaq, honkamshat maq si ronglaq. Lanta, namshiq ka Maiq Se man na chap wan li chang miitu, pharang rang maq si ronglaq.”

37Jesuq raq kra liipan bala akhing niika, Shomjam na trahoke lishe sito. Kiimaq raji wan raüla, apaiq ka Olip Pero Hiqlam kiina kiho raüta, japki lili riitlo. 38Wranaiqtek, ranap chu miili, mungmaiqse tlotli ka apaiq bomchong taikai, Shomjam na kiho lili riitlo.

Currently Selected:

LUKAQ 21: TANGSBSI

Highlight

Copy