JOHAN 3

Jesuq Nai Nikodemas

1Nikodemas ka Jehudinok phan wa wela ashi. Apaiq ka Phorisinok phungtu wa. 2Rawashi apaiq ka Jesuq phana kito. Raüta, apaiq ma bom ka akha waito, “Shrinketi we, naishiq raq ümniika Shiikeawe raq atiiki shra we nguta asap hai. Ümniiraq awang chang jaqsham tlaü arka, Shiikeawe raq pongdam mak ngu raü ka, juwe riimin klo lot mak.”

3Kiijiishe, Jesuq raq treto, “Ngi raq chongtiikang arka tengteng: Maiqse raq rawü thong nai chhi mak wiiwii, jurmin Shiikeawe Mungtan ka chhiwan lot mak.”

4Riita, “Maiq la kaü ka rawü thongnai ka jamkho michhi wan nong? Anyung puk na thongshi nyap wa nong raüta rawü jangnai ka chhilot mak sham na!” nguta Nikodemas raq Jesuq ma waito.

5Kiijiishe, Jesuq raq treto, “Ngi raq chongtiikang arka tengteng: Kham nai Asii Wenyi maq rawü chhihü wiiwii miika, jumin Shiikeawe Mungtan na nyap wa lot mak. 6Maiqse ka anyung puk maq dong raüta, han-ngam rawü chhi tlo. Shatmaq, Asii Wenyi riika, Wenyi rilung na tiichhii kuqtlo. 7Ngi raq ümniima, namshiq tarü ka rawü thongnai chii raa dongdii nguta chong tiikang arma naq wangkiq. 8Rahai ka ümnümo hai wan tlaq, ahai wan lam kra phan phan haiwan tlo. Ümniiraq rahai watrang ka mitai haü. Shatmaq, rahai ka ümnümo hai wan tlaq, kiimaq ümnü nü no haiho tlaq, kriika saplot maü. Ikiikhiisii hali, juwa Asii Wenyi maq rawii chhi tlaqti kiimin kiikha sitlo.”

9“Riita, ara chongtlaü akha, maiqse raq Wenyi na rawü ka jamkho michhi?” nguta Nikodemas raq waito.

10Kiijiishe Jesuq raq treto, “Ümniika Israil mung na shrinketi we ajong ashi. Kra riishe, ara bomtsi ara saplot maü jiika ja she wa michong i? 11Ngi raq chong tiikang arka tengteng: Naishiq raq jamlai wa saptiikai, kra chong tiikai. Kiimaq naishiq raq maiqmii mak maq jamlai wa chhi tiikai, kra namshiq ma chong kuq tiikai. Shatmaq, namshiq phong wa jurmin naishiq raq chong kuq tiikai tsütsa bomtsi arma kam man. 12Ngi raq namshiq ma ara mangjong hiq wa bomtsi chongkuq tiikang arma santla lam man riitlan, ikhiijiika, ngi raq namshiq ma ramungtan wa bomtsi kriishe chongkuqha jiika, jamkhii she wa mikam han? 13Kiimaq, ramungtan wa aki Maiq Se kra tlea raütiika, ümchaü niitaq maiqse phongwa jumin ramungtan niika wamak shaq li.”

14“Mosheq raq kumtsaiphii maq koti ngam maq ahai paü sumla ka lükii na tsomtaq, kiikhiisii hali, Maiq Se armin tsom chang dongdii miraq. 15Krai mren, jurwa apaiq ma kamtlaq, kriiti raq pattup pat-sa rilung milap. 16Ara jamkhano chongtiikang ngukla, Shiikeawe raq mangjong maiqse ka pinthum lungwiitlo. Raüta, Ase Sekhuq laqlaqse kra kuqto. Krai mren, jurwa Ase ma kamtlaq, kriiti ka tsai mak she miraq. Kiimaq pattup pat-sa rilung milap. 17Ara jamkhano chongtiikang ngukla, Shiikeawe raq Ase ka phiija maiqse kra shra kai miitu atiiki ka riimak. Shatmaq, tsangshiq kra daake kai tiikito.”

18“Jurwa Ase ma kamtlaq, kriiti ka tiishut mak she. Shatmaq, jurwa Ase ma kam mak, kriiti ka atiishut baiq wishe. Ara jamkhano chong tiikai ngukla, apaiq raq Shiikeawe Se, sekhuq laqlaqse ma kam mak. 19Shiikeawe raq mangjong maiqse shin chang kappe ka ara: Rawü ka mangjong hiq na saükito she. Shatmaq, mangjong maiqse raq ranyaq mong na si kli lungwiitlo. Kra jamto lungwiitla ngukla, tsangshiq ka ashut jaqshamti kha maq lungwiitlo. 20Abi ngarai jaqsham riika, rawü ka angeng riitlo. Kiimaq rawü niika siro mak. Rawü na si raüka, apaiq raq ranyaq jaqsham tlaq kra rawü na mitiichhiki. Kriikha maq apaiq raq rawii ka romak. 21Shatmaq, jurwa Shiikeawe bom ka tai tlaq, kriiti ka Shiikeawe wokhong na sitlo. Ahata rawü na siwan rilung. Krai mren, apaiq jaqsham ka rawüli na rashra she mitiichhi.”

Jesuq Nai Khamlamketi We Johan

22Arjai miishe Jesuq nai ajaqshisetiim ka Judia wang na kihoto. Kiijaq heashi sithü raüta, mungmaiqse ma kham ka lam kuq thüto. 23Johan riimin Salim hiq shong tho na Ainon hiq maq nokmaiqse ma kham lam kuqto. Jamkhano ngukla, kiijaq kham ka chamtraq asi. Nokmaiqse thun ka apaiq phana kito. Krai mren apaiq raq tsangshiq ma kham ka lam kuqto. 24(Ara chongtiikai jaqsham wantaq arka, Johan ka phaqtek na mithü shaq niiwa bom riito.)

25Johan jaqshisetiim phong wa maiq wiijamti ka Jehudi we weshi rai mrong roq jühe tri riiphan raüta, bom ka atsin riikhiito. 26Kriikha maq, tsangshiq ka Johan phana waraüta, apaiq ma chongto, “Shrinketi we, ümtsan na tiitsangshat li riimak sha, Jordan raire shedong nü maq, ümniirai riihumtiiwe ira? Apaiq bom ka naishiq ma chong kuq laü we irchong? Lii maüta, apaiq raq nanok ma kham lamkuqtlo. Kiimaq nokmaiqse wiitarü ka apaiq jai phan wanti siisaq she, apaiq jai na warai wanto!”

27Kiijiishe, Johan raq tsangshiq bom ka treto, “Shiikeawe raq jamlai wa, apaiq rii she nguta, maiqse ma maiqmii kharü na phankuq wantaq, kriili apaiq rii miraq. Kiiwa chan raütiika, juwe riimin lap lot mak. 28Namshiq ma ngi raq tsii ka chongke jeshe. Namshiq ka i hakhi sitlan. Ngi raq namshiq ma, ‘Ngi arka asaükaiti we Khristo kriika riimang. Shatmaq, apaiq ma lam tankeho kongkhu na Shiikeawe raq atiiki we kra,’ nguta chongkuq pha ihata. 29Junwati nyung kriika, junlamti we rii. Shatmaq, kherü lam sheati kiimwe sitlaq kriika, rohunti we kra chochi kra chhi raütli, apaiq kiimin kai chochi dam tlo. Ikiikhiisii hali, ngi armin la, kai chochi dam tiikang. 30Apaiq mang ka jong wan ruq riichang li dongdii. Kiimaq i mang ka ran wan wan riichang li.”

Ramungtan Wa Akiwe Ka Tarü Thaq Na Ajong

31Ra maq asatki maiqse kriika tarü thaq na ajong. Phiija maiqse kriika phiija hiq rii li dongdii adong. Kiimaq mangjong maiqse hon atsii kli mithü. Shatmaq, ramungtan wa asaüki we kriika, mangjong maiqse tarü thaq na ajong. 32Apaiq raq jamlai phan wa sap tlaq, chhi tlaq kra mangjong maiqse ma chongkuqtlo. Shatmaq, apaiq raq jamlai hakhi wa kuq tlaq, kra miika jurmin kam mak. 33Shatmaq, jurwa apaiq hakhi ma kamtlaq, kriiti riika, Shiikeawe bomtsi chongkuq tlaq kriika tengto dea nguta hakhi kuq wantlo. 34Shiikeawe raq juwa tiikitaq kra riika, Shiikeawe bom li chongkuqtlo. Ara jamkhano chongtiikai ngukla, apaiq ma Asii Wenyi ka asho awo maq apheake kun she. 35Awe raq Ase ka pinthum lungwiitlo. Krai mren, Ase ma phanrap lang wan miitu arang ka ake kun she. 36Jurwa Ase ma kamtlaq, kriiti riika pattup pat-sa rilung ka alap wishe. Shatmaq, jurwa Ase kiq khü tlaq, kriiti riika pattup pat-sa rilung ka lap lot mak. Shatmaq, Shiikeawe manson nai apaiq mo kra hophaq raütli she misi wan.

Currently Selected:

JOHAN 3: TANGSBSI

Highlight

Copy