JOHAN 2

1Kriimaq ranaiq nai jai maq, Gelili wang na Kana hiqshong na maiqlam poi riito. Jesuq nyung kiimin kiijaq asi. 2Kiimaq Jesuq nai ajaqshisetiim kiimin maiqlam poi na atiihea araq, kiijaq poi lomdam asi riito. 3Spiqtai ka athum she chhi raüta, “Tsangshiq spiqtai ka athum she,” nguta Jesuq nyung raq apaiq ma chongto.

4Kiijiishe, “Ngi raq jamlai jaq sham chang wa, kriika ümniiraq ngi ma naq chongkiq. Ngi ma rahiq ka misaü shaqli,” nguta Jesuq raq apaiq bom ka treto.

5Kiijiishe, “Apaiq raq namshiq ma jamlai bom wa chong jiiq, kra phanphan sham rong laq,” nguta Jesuq nyung raq jaqshamtibi ma chong kuqto.

6Jehudinok raq, Shiikeawe shomnoq thunglai pahea lang wan tlo. Kra phong wa tri ashi ka, pii tiishi miitu, khum tiisii jühe wantlo. Kra miitu, kham thü chang long pükhaü ka trok, kiijaq asi riito. Kra pükhaü jong ka pükhaü, ashi na tere khamchü chüroqshi kham thii raüjaq binlili chang asi riito. 7Jesuq raq jaqshamti bi ma, “Ara pükhaü thun arjaq, kham ka tiima lili siisaq thü ronglaq,” nguta thaüto. Krai mren, tsangshiq raq kra pükhaü thun na, kham ka malili siisaq she tiima thiito. 8Pükhaü thun ka kham maq tiima lot jai she, “Lo, ümchaü ka namtsam raq, ara kham arwa wiijam ka khuho lanta, poi liiti chere we kiima kuqki rongkiq, apaiq raq atei mirlaq,” nguta apaiq raq tsangshiq kiishe thaüto. Tsangshiq raq kra kham ka chere we miishe khap na khu raüta lamkuq hoto. 9Kra akhing na, kra kham ka spiqtai ma aja kaiwi she riito. Krai mren, apaiq raq spiqtai ka nyang raüta teto. Shatmaq, apaiq raq kra spiqtai ka jamwo tiidongtaq, kriika sapmak dea riito. (Shatmaq, kham ka do raüta pükhaü mong na tiima thiitibi jaqshamti riikla sapshat.) Kriikha maq, chere we raq, rohunti we kriishe heato. Raüta, 10“Nanok raq spiqtai asum akam thun kriika, kongkhu na wanwe ma tiinyang tlaq ngu phaütiq. Raüta, wanwe wokphe jai shetiq tiina, sapsekham kriishe pheakuq tlaq. Shatmaq, ümniiriika wanwe wokphe jaishetiq, asum akam phan spiqtai kra tiinyang tlaü!” nguta bomto.

11Jesuq raq ara apha shaqshaq awang chang jaqsham arka, Gelili wang na Kana hiqshong maq shamkuqto. Kra wangchang jaqsham kuqtaq kra lümaq, apaiq khushü jong kra, maiqse angu ma tiichhi kuqto. Kiimaq kra chhi raüta, ajaqshisetiim riimin, apaiq miishe kamwanto.

12Arjai miishe, Jesuq ka anyung nai anohiitiim, kiimaq ajaqshisetiim rai Kaparniam hiq na wawanto. Raüta, kiijaq hiawiashi se sithüto.

Jesuq Raq Shomjam Wa Laopanbi Jobaiqto

(Mot 21.12-13; Mak 11.15-17; Luk 19.45-46)

13Kra bala ka Tiichhii Wan Poi ho nini she riito. Kriikha maq, Jesuq ka Jerusalem na kihoto. 14Shomjam rinkea na laopanbi thun ka minsaü, skusetiim, kiimaq haütaü shatibi nai kampho chakti bi thun maiqmii kat tang chang ba na ngaraqraq chhito. 15Kra chhi raütiishe, Jesuq raq raülo maq sintsang ashi haito. Raüta, minsaü kong, kiimaq skuse kong thun kra wiita Shomjam rinkea kiiwa tiipin miijin jobaiqto. Apaiq raq kampho chak chang chamrii thun kiimin akap atsea she, kampho thun kra wantha wanthi kap baiqto. 16Kiimaq haütaü shatibi kra, “Arthun ara jaqlo tiibin ronglaq! I We jam ka, namshiq raq kejat thung ma naq tiija baiq rongkiq!” nguta sonto. 17Ara chhi raüta, “O Shiikeawe lei, ümjam ma lungwii tsii ka, i tsan mong na walüwa ikha nyai tlo,” nguta Asii Bomtsi na chong tlaq kra bomtsi ka, ajaqshisetiim tsan mong niishe tiidoto.

18Kiijiishe, Jehudinok welabi raq, “Riita, ümniika arthun thungtri ara runbaiq miitu arang hoti we dea nguta, naishiq ma jamlai phan awang chang jaqsham wa mitiichhi kuq lot haü?” nguta apaiq ma waito.

19Kiijiishe, “Namshiq raq ara Shomjam ara tiithen baiq han jiila, ngi raq ranaiqtsam liipan niili mihai nongha,” nguta Jesuq raq tsangshiq bom ka treto.

20Kra tai raütiishe, “Ümniiraq ara Shomjam arsha ranaiqtsam liipan niili mihai lot haü ngukai? Arjam ara hai miitu, wiiroqblai ri wiitrok rato ngu phaütiq!” nguta tsangshiq raq apaiq ma bom ka waito.

21Shatmaq, Jesuq raq shomjam nguta chongtaq kriika apaiq khum kra ngo nangnga chongto. 22Ara chong keje she kha maq tiina, Jesuq ka amaa wa dong wan jai she, ajaqshisetiim raq apaiq raq achong kuq thü irdea kuwanto nguta tak wantaq. Kiimaq tsangshiq raq asii bomtsi na chong tlaq kra, kiimaq Jesuq raq tsangshiq ma jamlai wa chongkuqtaq kriima kamto.

Jesuq Raq Maiqse Tsantsii Wiita Asap

23Jesuq raq Tiichhii Wan Poi liipan bala, Jerusalem maq awang chang jaqsham ka pahea shamto. Kra chhi raüta, maiq pahea raq apaiq ma kam wanto. 24Shatmaq, Jesuq riika tsangshiq ma kam mak riito. Jamkhano ngukla, apaiq riika tsangshiq tsantsii ka kunli asap. 25Maiqse tsan mong na, jamlai phan wa rüm tlaq, kriika apaiq ma maiq raq chongke rea ngo min raa mak. Apaiq raq tsangshiq tarü tsantsii na, jamlai wa sitlaq kriika sapshat.

Currently Selected:

JOHAN 2: TANGSBSI

Highlight

Copy