JOHAN 20

Maakho Shaqmii

(Mot 28.1-8; Mak 16.1-8; Luk 24.1-12)

1Chepat ranap na, ranap chu maq Magdalani hiqti Meriq ka maakho liikai nguta kito. Apaiq raq maakho shaq chang longkaü kilü kriika adi baiq rea wishe chhihoto. 2Apaiq raq kra chhi raütiishe, Simon Petar nai Jesuq raq lungwii hea we jaqshise phana juju wa raüta, “Tsangshiq raq Tatiwe maa ka maakho wa ahin na pihoto. Kiimaq nashiq raq sapmai, tsangshiq raq apaiq maa ka ümba niishe wa saiqsam wanta!” nguta tsütsa ka tsangnai ma tiitai chongto.

3Kiijiishe, Petar nai ajaqshi se weshi ka maakho liikai kito. 4Tsangnai ka aju riishii riipan juto. Shatmaq, ajaqshi se weshi riiwe ka, Petar ma aphiq lin ju raüta, maakho na kongkhu lin saühoto. 5Raüta, apaiq ka phanshi abum raüta, maakho mong na liikiita, maa thop chang raihi-nairai khea chü ka atiiphong riiraü chhihoto. Shatmaq, apaiq ka maakho longsha mong niika nyap wa mak dea. 6Apaiq jai na, Simon Petar she saühoto. Raüta, maakho mong na nyap wa raüta liito. Apaiq riimin maa thop chang raihi-nairai khea chü kriika, kiijaq tiiphong shat chhihoto. 7Kiimaq Jesuq khu jobchang khea kiimin kiijaq tiiphong shat riito. Kra khea ka raihi-nairai khea chü rai adam niika riimak. Pongba na aheawiq tiitamshat miili tiiphong raü riito. 8Kiijiishe, jaqshise kongkhu na asaükiti we kiimin, maakho mong na nyap wa raütiishe liito. Kiimaq kra chhi raüta, apaiq ka kamto. 9Tsangshiq raq kra thun kra chhi wan jai min, Asii bomtsi na, apaiq ka amaa wa dong wan chang dongdii miraq nguta chong tlaq bomtsi kriika takmakli shatshat riito. 10Kra chhithü raütiishe, ajaqshisetiim ka tsangshiq jam niishe hali jang wan nongto.

Jesuq Magdalani Hiqti Meriq Rai Riihumto

(Mot 28.9-10; Mak 16.9-11)

11Meriq ka longsha maakho kii kiijaq chap raüta ahorai, ashi ari riito. Aholam maq, apaiq raq abum raüta, maakho mong na liito. 12Kiimaq, kiijaq apaiq raq rasenai ka anai jong ri chhito. Tsangnai ka khealü miirii sam raqraq riito. Raüta, ashi ka Jesuq maa tiiwe chang longpen changdü changkhu nü kiija nga raü, kiimaq ashi ka, changji nü kiijaq ngaraü chhito. 13“Maiqnyung loi, ümniika jam nguto shiri rai tlaü?” nguta rasenai raq apaiq ma waito.

Kiijiishe, “Tsangshiq raq i Tatiwe maa ka ahin niishe tiijin hoto. Tsangshiq raq apaiq maa ka ümbaniiwa saiqsam hotaq kra ngi raq sapmang!” nguta apaiq raq tsangnai bom ka treto.

14Kra ngu raütiishe, apaiq ka ajai nü na trosaq raüta liito. Kiimaq, Jesuq ka kiijaq chap raü chhito. Shatmaq, apaiq raq Jesuq ka tiitsang mak dea. 15“Maiqnyung, ümniika jawa shiri rai tlaü? Ümniiraq juwa rit tlaü?” nguta Jesuq raq apaiq ma waito.

Apaiq raq tiima ka Olip pero kra kheti we sham nguta tiimato. Kriikha maq, apaiq ma bom ka akha waito, “Shiilang we, ümniiraq apaiq maa ka ahin na tiisot holaü jiila, ngi ma chong laq, ümbano thülaü. Ngi kilata lamki pha.”

16Kiijiishe, Jesuq raq amang chong raüta, “Meriq,” nguta bomdamto.

Kiijiishe, Meriq raq apaiq phanü na nyisaq raüta, Hibrunok bom maq, “Rabbuni,” nguta apaiq bom ka treto. (Ara liichum ka shrinketi we nguta ngo.)

17Kiijiishe, “I dü niika naq tiipaq jaqkiq,” nguta Jesuq raq apaiq ka tiiwinto. “Ara jamkhano chong tiikang ngukla, ngi ka i We phana mijang wan ha shaqli. Shatmaq, ümniika i notiim phana walaüta bom ka chong wakiq. Ngi ka i We, kiimaq tsangshiq We, i Shiikeawe kiimaq tsangshiq Shiikeawe phana jang wan nong she,” nguta chong wakiq.

18Krai mren, Magdalani hiqti nyung Meriq ka, ajaqshisetiim phaniishe wawanto. Raüta, apaiq ka Tatiwe rai riihumtaq kra tsütsa ka tsangshiq miishe chongkuq wanto. Kiimaq, Tatiwe raq tsangshiq ma tsütsa tiichong wantaq kriimin tlü chong kuqto.

Jesuq Ka Ajaqshisetiim Rai Riihumto

(Mot 28.16-20; Mak 16.14-18; Luk 24.36-49)

19Kra chepat ranaiq niisii hali, rajiko niishe, ajaqshisetiim ka jam ashi na riitam raüta, kilü maq jam mong na tiisan raüta ngato. Tsangshiq ka Jehudinok welabi ma hai ma, jam mong niili tiisan raüta ngato. Kra liipan niili, Jesuq ka tsangshiq phana, dongchhaq li saü wato. Raüta, tsangshiq khaki na chapsaq raüta, “Namshiq ka hansang maq sirong laq,” nguta apaiq raq tsangshiq ma tsaiji doke bomto. 20Kra ngu raütiishe, apaiq raq tsangshiq ma, ajaq phi wiinai na nai asiimpii na, ami phan thun kriishe tiichhi kuqto. Ajaqshisetiim raq Tatiwe ka chhi raüta, pinthum chochito. 21Jesuq raq tsangshiq ma thongshi ri hali tsangshiq tsaiji doke, “Namshiq ka hansang maq sirong laq. I We raq ngi ka jamkho mangjong hiq na tiikitaq, kiikhiisii hali, ngi riimin namshiq ka mangjong hiq tiiki nong tiikang,” nguta tsangshiq rai bomdamto. 22Kra ngu raütiishe, apaiq raq tsangshiq khuthaq na anü maq ameike wan lam maq akha nguto, “Ara Asii Wenyi ara namtsan mong na tiisi ronglaq. 23Namshiq raq maiqse ngarai ka diikuq han jiila, Shiikeawe riimin diikuqto ngushat. Kiimaq namshiq raq tsangshiq ngarai ka diikuq man riihan jiila, Shiikeawe riimin diikuq mak dea ngushat.”

Jesuq Ka Thomas Rai Riihumto

24Jesuq ka ajaqshisetiim rai riihum kitaq akhing ranaiq na, ajaqshisetiim roqshi ri wenai phong wa Thomas (apaiq ka Achhop we ngutlo) ka tatimii bala chato. 25Kriikha maq, “Naishiq raq Tatiwe ka chhi kai!” nguta akongtibi raq apaiq ma chongto.

Kra tai raüta, “Ngi raq i mak maq, ajaq na khili miphan kiijaq i jaqshi maq chhum mang wiiwii, kiimaq asiimpii miphan na, i jaq maq sham mang wiiwii, ngi ka kamlot mang,” nguta Thomas raq tsangshiq bom ka treto. 26Kra jai miishe, chepat shi tin siraüta hali, ajaqshisetiim ka jam ashi na, tapmong na riitam ngato. Kiijaq tsangshiq rai Thomas min asi riito. Kilü thun kriika wiita shaqje siisaq. Shatmaq, Jesuq ka tsangshiq phana dongchhaq li saükito. Raüta, tsangshiq phong na chapto. Raüta, “Namshiq ka hansang maq sirong laq,” nguta tsangshiq rai bomdamto. 27Tsangshiq rai kra bom raütiishe, Jesuq raq Thomas ma nguto, “Riita, ümchaü min, ümjaq shi maq arjaq chhum liina. Kiimaq, i jaq phi miphan ara lii liina. Laüta, ümjaq shi maq, i siimpii na amiphan sitlaq arjaq ümjaq maq sham liina. Ümchaü min kam maü li riishatshat ka naq si kiq she. Ümchaü sanha kam liishe!”

28Kiijiishe, Thomas raq Jesuq bom ka treto, “Ümniidea i Tatiwe kiimaq i Shiikeawe.”

29Kiijiishe, “Ümniiriika i sham ara chhi laü tiitiq sha, ngi ma kam tlaü? Jurwa i sham ara chhi mak miili, ngi ma kam tlaq, kriiti ma pinthum kechu jonghea!” nguta Jesuq raq Thomas bom ka tre nongto.

Lakdap Waiq Wantaq Ara Miitung

30Jesuq raq ajaqshisetiim makki na, awang chang jaqsham ka pahea shamto. Kra thun ka ara lakdap arjaq waiq dam mak dea. 31Shatmaq, arjaq waiq kang thun arka, namshiq raq Jesuq kiidea Khristo, kiimaq Shiikeawe Se nguta mikam laq kiimaq apaiq ma kam tlan kra lümaq, namshiq raq rilung milap laq nguta waiq kang.

Currently Selected:

JOHAN 20: TANGSBSI

Highlight

Copy