JOHAN 21

Ajaqshisetiim Rai Gelili Maq Riihumto

1Arjai maq hali, Jesuq ka ajaqshisetiim rai, Tiberias Thamchum kii maq jangshi hali riihumki nongto. Apaiq raq tsangshiq rai ka akha riihumto. 2Kra akhing na Simon Patar, Thomas (apaiq ka Achhop we ngutlo), Nathaniel (Apaiq ka Gelili wang na Kana hiq wa), Jebedi senai, kiimaq Jesuq jaqshisenai ahinti wenai, tsangtsam thun ka tarü adam na riito. 3Kiijiishe, tsangshiq phong wa, Simon Petar raq, “Notsam ngi ha ngiq li mikhupki nong ha!” nguta apaiq kongtitiim kiima chongto.

Kiijiishe, “Ikhla, naishiq min ümniirai kai dam,” nguta tsangshiq raq apaiq bom ka tre rang riito. Krai mren, tsangshiq ka lai maq kiho raüta, rawa minru jü na ngiq khup kai niisiqto. Shatmaq, tsangshiq raq ralang khampü se dongdii min lap mak dea. 4Ranap, rawü tsuprup tsupriiq niishe, Jesuq ka kra thamkii na chap raü riito. Shatmaq, ajaqshisetiim raq apaiq ka Jesuq nguta tiitsang mak dea riito. 5Kiijiishe, “Jerobi lei, namshiq raq ngiq phanshi ra min lap man dea sha?” nguta apaiq raq tsangshiq ma waito.

“Ahü, siirairai,” nguta tsangshiq raq apaiq bom ka treto.

6Kiijiishe, “Ikhla, namtsam lai maq jaqtsi nü siim ba kiina khup rong laq. Raüla, phanshi ra ka milap han,” nguta apaiq raq tsangshiq ka thaüto. Krai mren, tsangshiq raq kiijaq khupto. Raüta, ngiq ka pahea lapto. Kiimaq ngiq ka pahea lap rea kha maq, tsangshiq chiiq ka ahit min hitlot mak she riito.

7Kiijiishe, Jesuq raq lungwii hea we jaqshise kriiraq, “Apaiq ka Tatiwe!” nguta Petar ma chongto. Petar raq, apaiq ka Tatiwe nguta tai raütiishe, apaiq raq asamtong ka achhü na tasaq raüta, (Apaiq raq asamtong ka chhutje dongdii athü riito) jü na doq ha raüta, takii nü niishe wai wanto. 8Kiimaq ajaqshisetiim ahinti thun ka, lai maq ngiq ka chiiq mong na tuptup tiithop shat miili, takii na jiiq wanto. Tsangshiq ka takii tho niili dongdii riito. Tsangshiq ka takii maq, mitar shinai tin khan niili riito.

9Tsangshiq ka takii na saü raüta liikiita, kiijaq wachan achaq wa ka asi nyai jam she lowanto. Kiimaq kra wa thaq niika, ngiq min tiishushat she lowanto. Kiimaq winsii phu thun kiimin asi riito. 10Kiijiishe, Jesuq raq tsangshiq ma, “Ümchaü khup lan kiiwa ngiq ka wiijam ana lamki rongkiq,” nguta tsangshiq ka thaüto.

11Krai mren, Simon Petar ka lai na düwa raüta, ngiq raq ama tuptup chiiq kra takii na hitto. Ngi ka ajong jong wiq siisaq tlotli ka shishi ri roqbiingi ri atsam riito. Ngiq ka pahea li jiimin, chiiq ka tiichai mak. 12Raütiishe, Jesuq raq, “Warong ra. Phaqsiq rongliishe,” nguta ajaqshisetiim ka heato. Kra ngukiita, ajaqshisetiim phong wa jurmin, “Riita, ümniika juwa?” nguta bom ka waikhu mak riito. Kriika tsangshiq raq apaiq ka Tatiwe dea nguta asap wishe kha maq, waikhu mak. 13Krai mren, Jesuq raq winsii ka ajaq na lamto. Raüta, tsangshiq ma pheakuqto, kiikhiisii hali, ngiq kiimin lam raüta tsangshiq ma pheakuqto.

14Riita, ara chongtiikai, Jesuq raq ajaqshisetiim rai riihumkitaq arka, apaiq ka amaa wa dong wan li maq, laktsam ngoja riihumkai bom she riito.

Jesuq Ka Petar Rai Riibomto

15Tsangshiq raq phaqsea lot jai she, “Johan se Simon lei, riita, ümniiraq ngi ka, ara ahinti thun raq lungwii tlaq kriithaq niimin, achan lin dea sha lungwii tlaü?” nguta Jesuq raq Simon Petar ma waito. “O raq, Tatiwe. Ngi raq ümniika lungwii tiikang, kriika ümniiriimin asap haü,” nguta apaiq raq Jesuq bom ka treto.

Jesuq raq apaiq ma chongto, “Ikhla, i skuse kong aransetiim kra samhea rüm laq.” 16Kiimaq, tiithong nai hali, Jesuq raq Petar ma wai nongto, “Johan se Simon, riita, ümniiraq ngi ka lungwii tlaü dea sha?”

“O raq, Tatiwe. Ngi raq ümniika lungwii tiikang kriika, ümniiriimin asap haü,” nguta apaiq raq Jesuq bom treto.

Jesuq raq hali apaiq ma chong nongto, “Ikhla, I skuse kong ka samhea rüm laq.” 17Kiimahali, tiithong tsam she, Jesuq raq Petar ma hali bom ka wai nongto, “Johan se Simon, riita, ümniiraq ngi ka ngohea shaqshaq dea sha lungwii tlaü?”

Kiijiishe, Petar ka atsan biwa liishe riito. Ara jamkhano atsan bita ngukla, Jesuq raq apaiq ma bom ka, tiithong tsam she, “Ümniiraq ngi ka lungwii tlaü dea sha?” nguta waito. Kriikha maq, apaiq raq hali tre nongto, “Tatiwe, ümniiriiri phanrap asap haü. Ngi raq ümniika lungwii tiikang ngutiimin, ümniiraq asap haü!”

Kiijiishe, Jesuq raq apaiq ma chongto, “Ikhla, i skuse kong ka samhea rüm laq. 18Ngi raq chongtiikang arka tengteng: Man na, ümnaq jeroji niika, ümtsan maq ümnü na kai wa lungwii tlaü, ümchhü na jiikom chhüsaq laüta, kiinü na kiho tlaü. Shatmaq, ngi chongpha, ümniika ümtiikiiwa nyungwe she mija haü, kiitiikaq ümniiraq ümjaq ka mitiipii haü, kiimaq maiq ashi ra raq ümniika mikha. Raüta ümnaq kiro maü chang ba kiiniishe misheaho.” 19Riita, Jesuq raq ara chongtaq arka, jai maq Petar ka jamkho mitsai kra bomtsi kra tiithai chong kuq tlo. Kiimaq apaiq tsai tlaq kra lümaq, Shiikeawe khushü ka mitiijong nguta chong tlo. Jesuq raq ara bomtsi ara chongkuq lot raütiishe, “Ümniika i jai phan phan lishe wara!” nguta apaiq raq Petar ma tsii ka chongkuqto.

Jesuq Nai Apaiq Raq Lungwii Hea Jaqshise

20Petar raq ajai nü na liikiita, ajaqshi se weshi, Jesuq raq pinthum lungwii hea we kriika, apaiq jai na awa rai chhito. Apaiq ka dungsea akhing na, Jesuq rai tiinapsaq na ngati we riito. Kiimaq Jesuq ma, “Tatiwe, ümnaq tiishaü wanti we ka juwa miraq?” nguta waiti we kra riito. 21Petar raq kriiwe ka chhi raüta, “Tatiwe, riita arwe arha?” nguta Jesuq ma waito.

22Kiijiishe, Jesuq raq, “Ngi raq apaiq ka, ngi saükai akhing na saüli atrali misi laq nguta thi kang lo, kriika ümniima jamlai wa raa ta? Ümniiriika i jai phan phan lishe wariina!” nguta Petar bom ka treto.

23Krai mren, Jesuq jai phantibi liipan na, ara jaqshise arka tsai mak miraq ngutiishe, bom ka parai wanto. Shatmaq, Jesuq riika, apaiq ka tsaimak miraq ngutiika ngu mak dea. “Ngi raq apaiq ka ngi saükai akhing na saüli atrali misi laq nguta thikang lo, kriika ümniima jamlai wa raa ta?” ngutli nguto.

24Apaiq kata, arthun ara chongketi we ajaqshi se, amak shaq. Apaiq riisii hali dea, arthun bomtsi ara lakdap na waiqthüto. Kiimaq apaiq raq jamlai bomtsi wa chongtaq, kriika tengteng bomtsi dea chongto nguta naishiq raq asap hai.

Jesuq Raq Arthaq Niimin Pahea Jaqshamto

25Arjaq waiq wankai thun arthaq niimin, Jesuq raq jaq asham wan ahin pahea dea asi. Kriithun ka wiita, ashi shi maq tiikham raüta, waiq raü jiika, kra awaiq lakdap thun kra, adam na phong raüla, ara mangjong hiq arjaq dongdii min, aphong chang bin mak mirsham nguta tiima tiikang.

Currently Selected:

JOHAN 21: TANGSBSI

Highlight

Copy