RAPHA HIQWA LAK 38

Juda Nai Tamar

1Kra akhing bala Juda ka aphutiim thun ka baiqthü raüta maiq weshi Hira ngutlaqwe phana sikai kihoto. Kriiwe ka Adullam chelati. 2Kiijaq Juda raq Kanannok shea jechakse ashi, awe mang ka Shua krai riihumto. Raüta apaiq raq kriinyung ka lamto. 3Raüta kriinyung tsangnai se ka maiqwese ashi humto. Apaiq raq ase ka Er nguta mangto. 4Kiimahali tsang-nyung ka wiihanshe hali riito. Raüta ase maiqwese ashi hali doto. Raüta ase ka Onan nguta mangto. 5Kiimahali tsang-nyung raq ase ashi hali hum nongto. Raüta ase ka Shela nguta mangto. Kra nowüchhi akhing na Juda ka Akhjib hiq na riito.

6Riita ase chhikhuwe Er miika Juda raq tsang-nyung lamkuqto. Apaiq mang ka Tamar. 7Er hon aja ka abi. Kiimaq kriiraq Tatiwe tsan tiibito. Kra ningkhan Tatiwe raq apaiq ka atsea riibaiqto. 8Kiijiishe Juda raq ase Er ma anowe Onan kiima chongto, “Ümphu wulumwe khop kra thaqlaq. Laüta ümnyi-chhi-nyung manti-nyung krai sidamlaq. Laüta tri na chongtlaq kiikha ümniiraq apaiq ma ano-chhiwe raq aphu lai kra thumki mak chang tiishong ngalaq.” 9Shatmaq Onan raq asap anyi-chhi nyung tsangnai setiim ka apaiq rii ka riimak. Kra ngomaq ümtiikiiwa apaiq anyi-chhi-nyung manti-nyung rai haingatlaq, alai ka hiq na raübaiq baiq lili riitlo. Krai mren aphu wulumwe rii asetiim ka ahü miraq. 10Apaiq raq kra klotlaq kra chhi raüta Tatiwe ka kai tsan hea mak riito. Kra ningkhan Tatiwe raq apaiq kiimin tsat baiqto. 11Kiijiishe Juda raq anam-nyung Tamar ma akha chongto, “Ümwe jam niili jang wan laq. Laüta ise Shela kra maiq lamke cho misaü shaq wiiwii manti-nyung li silaq.” Apaiq raq akha chongtaq arka, apaiq ka ahai, Shela kiimin aphunai tsat baiqtaq kiikha tsat baiq nong jiiq nguta nguto. Krai mren Tamar ka awe jam na jang wanto.

12Kra jai maq ashaqpuq sijai na Juda tanyung ka tsaikito. Tsang-nyung tsaijai apaiq raq maajo akhing kra lot jai she, apaiq ka aluwe Adullam hiqti Hira tsangnai Timna hiq na kihoto. Kiijaq asku kong bin kra si akhing riito. 13Kiimaq maiq ashi ra raq Tamar ma ahuchhiwe Juda ka Timna hiq na asku kong bin sikai miki nguta chongto. 14Kiimaq, apaiq raq manti-nyung miirii samtlaq kra aklai riito. Raüta atheaphi ka bannin kheachü maq pangto. Raüta apaiq ka Timna chela na kaichang lam na Enaim chela na saü wan na chiiphai kilamchong tho na ngalito. Jamkhano ngukla apaiq raq Juda se nobungwe Shela ka kra akhing na maiqla she, maiq lamcho she nguta asap. Shatmaq apaiq ka Shela rai adam na tiishong nga dam mak nguta asap.

15Riita ümtiikiiwa Juda raq kriinyung ka chhitaq, apaiq raq kriika mephe nyung sham nguta tiimato. Jamkhano ngukla kriinyung raq atheaphi ka khea maq apang riito. 16Apaiq ka kriinyung phana lamphai kiijaq wato. Raüta akha nguto, “Ahea na. Riita ümniiraq amaq athu ka ümchuwa jaü tlaü?” (Apaiq raq kriinyung ka anam-nyung ngutiika sap mak dea riito.)

Kriinyung raq nguto, “Ümniiraq ngi ma jamlai wa mikuq haü?”

17Apaiq raq treto, “Ngi raq chhechhise are se ashi inyamse kong wiitiq mitiikuq kikang.”

Kiijiishe kriinyung raq nguto, “Ahea na. Kra chhechhi se ka mitiikuqki haü shaq bala kiqkham raükha la na, ngi ma phanshi ra bom kham kongphiq kuq thü liina.”

18“Riita ngi raq bomkham raükha kongphiq ka jamlai wa mikuqhata?” nguta apaiq raq waito.

Kiijiishe kriinyung raq nguto, “Ümjaq na sil sitlaq kra apaq chang raülo nong nong kiimaq ümjaq na nyeakii shamtlaü kra kuq thülaq.” Kiimaq apaiq raq kriithun ka kriinyung ma kuqto. Kra raütiishe tsangnai ka adam na haingato. Kiimaq kriinyung ka wiihan she riito. 19Raüta Tamar ka jam na wa wanto. Raüta adü na asam bannin khea akhupo pang chang ka alam riibaiqto. Raüta manti-nyung miirii kra hali sam nongto.

20Kra jai miishe Juda raq aluwe Hira ma chhechhise ka jechak nyung kiima tiikuq kito. Kiimaq kriinyung jaq wa ahupsam bomkham akhakuq thü kra tlamkai tiikito. Shatmaq Hira raq kriinyung ka humki mak she riito. 21Apaiq raq maiqwere wiijamti Enaim hiqti ma waito, “Man na ara lam tho na mephe nyung sitlaq ira ümbano?”

“Ahüla, mephe nyung ka arjaq simak dongdiila” nguta tsangshiq raq treto.

22Kiimaq apaiq ka Juda phana jang wanto. Raüta nguto, “Ahü ngi raq kriinyung ka humki mang. Kiijaq siti maiqwere nga, kiijiiq mephe nyung ka ahü simak dongdii nguwa.”

23Juda raq nguto, “Bam riilaq. Hupsam thun ka apaiq riili she ümthüho laq. Nanai ka maiq miikhoti tiinaikü jiiq. Ngi raq apaiq jaq maq ka ake chang nguta atiimaha wa. Shatmaq ümniiraq apaiq ri hum maü dea ngu.”

24Kra jai maq jipi lütsam sijai niishe maiq ashi ra raq Juda ma chongto, “Üm-nam-nyung Tamar ka mephe nyung ikhli sitlo. Ümchaü ka apaiq wiihan she.”

Kra tai raüta Juda raq aming kuqto, “Apaiq ka chiiphai na hit ho ronglaq. Lanta wa na tiitsai laq chaqbaiq ronglaq.”

25Nanok raq apaiq ka chiiphai na hit ho tlaq akhing niishe, apaiq raq ahu-chhiwe ma bom ka akha tiichong wato: “Ngi raq isewok hotiikang arka ara hupsam thun ara tatiwe se hotiikang. Riita ara hupsam thun ara liilaq. Laüta arthun arka juwe hupsam wa kra liiliishaq-ara sil apaq chang sairaü min nong nong kiimaq ara nyeakii ariiri.”

26Kiimaq Juda raq kra hupsam thun ka tiitsangto. Raüta akha nguto, “Apaiq ka riikhaq li. Jiq mak dea. Ngi raq riiwe apaiq ma jamlai kloke chang wa jaqsham ka klo kuq mang dea riikang. Ngi raq apaiq ka ise Shela ma romkeha chang wa romkuq mang dea riikang.” Kiimaq Juda ka kriinyung rai chap nga dam mak tliishe riito.

27Kiimaq ümtiikiiwa apaiq ma nowüchhi akhing she saütaq, kra akhing na awok na ase ka anai jongri achhop nguta sapto. 28Apaiq nowüchhitsi raitlaq kiijaq no ashiti raq ajaq jaqko ka kongkhu tiidong kito. Nochhü kamketi nyung raq kra no jaq dong kitaq kra ajaq maq lapsaq riito, Raüta raishiilo ka nojaq na dakto. Raüta nguto, “Arti ara kongkhu rawii chhito.” 29Shatmaq kra noshii raq ajaq ka anyung wok mong na hali tiijang hit wan nongto. Kiimaq aphuwe kriishe kong khu chhiito. Kiijiishe nochhü kamketi nyung raq nguto, “O ikhla ümniika akha kongkhu shiiho laü nya!” Krai mren kra no ka Perej nguta mangto. 30Raütiishe anowe ka ajaq dang na raishii lose kra tiidak shat miishe dongkito. Kiimaq apaiq ka Jera nguta mangto.

Currently Selected:

RAPHA HIQWA LAK 38: TANGSBSI

Highlight

Copy