RAPHA HIQWA LAK 37

Joseph Nai Aphutiim

1Jakob ka awe shongchang Kanan mung niili siruq shongto. 2Kiimaq Jakob tahii manphan ka akha.

Joseph ka jerowe arawii wiiroqshi ri wiimiishi. Apaiq ka awe sku kong nai chhechhi kong kra rümdamti, awe chakliip nyung nai Bilha nai Jilpa setiim rai riito. Aphutiim raq jamlai wa abi klotlaq kra apaiq raq awe ma chong wan lili riitlo.

3Jakob raq Joseph ka asetiim abiti khuthaq na apa mangchanto. Jamkhano ngukla apaiq ka awe tikiija niitiq ahum riito. Awe raq samtong ajong wiq kaü ajaq dang na saü lili ashi apaiq miitu tiitaqto. 4Aphutiim raq awe raq Joseph ka tsangshiq nam ma achan mangchantlo nguta chhito. Kra ningkhan tsangshiq raq tsangno ka pinthum ngenghoto. Raüta tsangshiq ka apaiq rai samhea min bomdam mak she riito.

5Rawashi Joseph raq rawa ma ashi mato. Kiimaq apaiq raq apaiq rawa ma ka aphutiim ma chongto. Kra chong kiita tsangshiq raq apaiq ka ngenghea she ngeng hoto. 6Apaiq raq akha chongto, “Tairong laq, ngi rawa ma amaha ka chong pha. 7Nashiq tarü ka wak na, bunwong han laita khaolüm tei rea riikai. Kiijaq ijaq wa bunwong khaolüm tei kaü kriika tiichap kangta ra na rusan chapto. Kiimaq namshiq khaolüm tei thun ka ikhaolim tei kaü kra tro tam na chapto. Raüta amun ka hiq nü na kuraq raq raüta noqto.”

8Kiijiishe, “Riita ümniika hokham ma ja laüta naishiq thun ara mipengha ngutiisha tiima tlaü?” nguta aphutiim raq apaiq ma waito. Kra ningkhan tsangshiq raq apaiq rawa ma chhitaq kra miitu nai apaiq raq tsangshiq khuthaq na jamlai bom wa chonglaq kra miitu achan ana she hali ngengho nongto.

9Kra jaimiishe hali Joseph raq rawa ma ka jangshi ri hali ma nongto. Kiimaq kra aphutiim ma akha chongto, “Ngi raq rawa ma ka jangshi ri hali manong kang. Ima miika rashe kaü nai jipi kaü kiimaq raiqsaiq poroq shi ri poshi ka ikhaki na hiq na bum raüta ngi ka noqto.”

10Apaiq raq rawa ma ka awe miimin chongto. Kiimaq awe riika kra tai raüta apaiq ka akhli sonto: “Jamkhiinok pe ama wa malaü kra? Riita ümniinga ümnyung, nai ümphutiim kiimaq ngi ka ümphana kilaita üm niisha minoqki haita?” 11Joseph phutiim ka apaiq ma makshu rashe she riito. Shatmaq awe riika kra taiku rawa ma bom kra rashi hiq wea tiima shat maq sito.

Joseph Ka Shabaiqto Kiimaq Ejip Mung Na Sheahoto

12Ranaiqshi Joseph phutiim ka awe nyamse kong rümkai Shekhem hiq na kihoto. 13Kiimaq Jakob raq Joseph ma chongto, “Ümniika ümphutiim phana Shekhem na kilaq. Tsangshiq ka kiijaq nyamse rüm sitlo.”

Joseph raq treto, “Ahea na. Mikikang.”

14Kiijiishe awe raq nguto, “Kilaq. Laüta ümphutiim ka ahea shea sitla liiki kiq. Kiimaq nyamse kong kiimin ahea shea rümtla liikikiq. Laüta ana jang wakiq, laüta ngi ma tsütsa ka tiitai wakiq.” Kiimaq awe raq apaiq ka Hebron Hiqwii Tan maq kiina tiikito.

Raüta Joseph ka Shekhem niishe saükito. 15Raüta kra binjü wak ram na apaiq ka aphutiim rit akhumsea riito. Kriiwiishe maiq weshi raq apaiq ka chhito. Raüta apaiq ma waito, “Ümniika jamlai rit wa khum rai tlaü?”

16“Ngi ka iphutiim rit khum tiikang. Tsangshiq ka nyamse kong rüm sitlo,” nguta apaiq raq treto. “Ümniiraq tsangshiq ka ümbano asap haü shea?”

17Kriiwe raq treto, “Tsangshiq ka ahin na kihoto she. Ngi raq tsangshiq liipan na Dathan hiq na kiho rong i nguta riichongtlo taikang.” Krai mren Joseph ka aphutiim jai joho kiina kihoto. Kiimaq tsangshiq ka Dathan hiq na lohoto.

18Tsangshiq raq apaiq ka alu na akairai chhito. Kiimaq tsangshiq phana misaüho shaq liipan niili tsangshiq raq apaiq ka atsea chang nguta mat kii ka süto. 19Tsangshiq liipan na akha riichongto, “Kra kitlaq ka, rawa ma chhitiwe ira. 20Lo, warong ra, apaiq ka tiishe rong i. Laita amaa ka khappong kham hü shin riiq riiq sitlaq kra thun kiiwa ashi mong na dobaiq rong i. Nashiq raq apaiq ka rum ngam raq kaqto nguta michong rong i na. Laita apaiq rawa ma thun ka jam kho jajiiq kriishe milii rong i na.”

21Reuben raq tsangshiq bom riichong ka taito. Raüta Joseph ka tiichhiike miitu lamlu ritto. Raüta akha nguto, “Nashiq raq apaiq ka tsat mai li.” 22“Apaiq ka ara rumnyangkhi arjaq khappong shin riiq riiq mong kiijii li dobaiq rong i. Shatmaq atsea wiq wiq ka naq tsat rong kiq.” Apaiq raq akha ngutaq arka, tsangshiq jaq khon mong wa apaiq ka tiichhiike miitu nguto. Raüta awe phana tiiwa baiq nong ma nguto. 23Riita Joseph ka aphutiim phaniishe saükito. Riikiita tsangshiq raq adü wa samtong jong kaü ajaq honglu samtlaq kra chaiham chaihea she chai baiqto. 24Raüta apaiq ka hit hoto. Raütiishe khappong ashi kham ahü shin riiq riiqti mong na do raüta tiidea baiqto.

25Raüta tsangshiq ka dungsea anga riito. Kra liipan na tiidong chhaq miili, tsangshiq raq Ishmailnok laopanbi kong ka Gilead wang maq aki Ejip mung nü na kaihoti kra chhito. Tsangshiq kumtsong kong raikhü niika süse tapan nai triinai hupsam hoho raüta aki riito. 26Kiimaq Juda raq aphutiim ma akha nguto, “Nashiq raq nano ka tsat baiq laita, apaü riihai jiika jamlai amet wa milap rong i ta? 27Ara Ishmailnok armiili khoti shaphaq rong i na. Kra nguraü ka nashiq raq apaiq dü na jaq miiq raa mak kata. Jamkhano ngukla apaiq ka nano shaq kata; tiijai hanngam ashi kata.” Kiimaq aphutiim riimin apaiq kiq niishe choto. 28Kiimaq ümtiikiiwa wiijamti Midiannok laopanbi ka tsangshiq phaniishe saühotaq, aphutiim raq Joseph ka khappong mong kiiwa raü maq ra niishe doto. Raüta apaiq ka Ishmailnok ma kampho ngam sii siiroq nai phana shaphaqto. Raüta tsangshiq raq apaiq ka Ejip mung niishe sheahoto.

29Kiimaq ümtiikiiwa Reuben ka khappong na jangwa raüta liikiita, Joseph ka kiijaq ahü riito. Kra ningkhan apaiq raq adü na asam khea kra atsan bitsi ma chaiham chaihea she chai baiqto. 30Apaiq ka anotiim phaniishe jangwato. Raüta akha nguto, “No ka kiijaq ahü she! Ngi ka jamkhii she wa mijaha?”

31Kiijiishe tsangshiq raq chhechhi ashi tsatto. Raüta Joseph samtong jong kaü ka kra ngam tiijai na tsamto. 32Raüta tsangshiq raq kra samtong jong kaü ka awe miishe lam kuq hoto. Raüta akha nguto, “Naishiq raq ara humkai. Riita arka ümse samtong dea shea?”

33Apaiq raq kra liito. Raüta sapto. Kiimaq akha nguto, “Ngohea dea, arka apaiq khea ahata! Phanshi ra rum ngam raq apaiq ka kaqto ahata. Ise Joseph ka apun awun she kaqphaqtaq ahata!” 34Kiimaq Jakob raq atsanbi tsi ma adü wa khea kra chaiham chaihea chai baiqto. Raüta wunthaü riinaü miirii ka samto. Raüta ase maaho rahiq luhea hoqsiqto. 35Asetiim maiqwe setiim thun nai jechaksere ka apaiq phana wa raüta tlinto. Shatmaq apaiq ka jaiq mak phan riito. Kiimaq apaiq raq akha nguto, “Ngi ka ise maaho lam maq aho ajii lam miili she wulum mung na misaü hoha.” Kiimaq apaiq ka ase Joseph maaho shiri ruq miili she sito.

36Kiimaq anü na, Midiannok raq Joseph ka Potiphar ma shabaiqto. Apaiq ka hokhamwe sengi siihiipbi phongwa weshi riito. Apaiq ka hokhamwe jam kheti phentuwe.

Currently Selected:

RAPHA HIQWA LAK 37: TANGSBSI

Highlight

Copy