RAPHA HIQWA LAK 35

Shiikeawe Raq Jakob Ka Bethel Maq Shiimanto.

1Shiikeawe raq Jakob ka thaüto, “Bethel hiq na jaqlo kilaq. Laüta kiijaq silaq. Kiimaq kiijaq Ngi miitu berong-wacha ashi hailaq, ümniika ümphu Esau ma hai ma juwan tlaü akhing na ümniirai riihumtaq Shiikeawe irma.”

2Kiimaq Jakob raq ajamtitiim ma kiimaq apaiq rai siti tarü ma akha nguto, “Namshiq jaq na pong mungti sumla phra thun sitlaq kra wiita baiq ronglaq. Lanta namkhum ka wiita phumram kham maq bat lanta tiisii ronglaq. Lanta khu akhea ka asii sam ronglaq. 3Nashiq ka armaq alaü she mirho rong i. Laita Bethel hiq niishe mikiho rong i. Kiijaq ngi raq ngi khrum keti Shiikeawe, ngi ma litkot chamchao ranaiq khrum ketiwe kiimaq ngi ümriiba niiwa khum wan kang kiijaq ngi rai nong nong maq siwantiwe ma berong-wacha ashi mihaiha.” 4Kiimaq tsangshiq raq Jakob ma tsangshiq jaq na pongmungti sumla phra thun ka wiita kuqto. Kiimaq tsangshiq raq titlaq niti thun kriimin kuqto. Apaiq raq kriithun ka Shekhem chela tho na Ok pechong tong na hiq na lapbaiqto.

5Kiimaq ümtiikiiwa Jakob nai asetiim ka kra hiq wa laühotaq, kra tro binjü chela thun na siti mungmaiqse ka phiip raq tsaito. Kiimaq tsangshiq raq Jakob nai asetiim ka joki mak riito. 6Jakob ka asengi thun tlotli tsuqho raüta, Luj hiqshong na saükito. Ara hiqshong ka ümchaü Bethel ngutlo. Arka Kanan mung na. 7Apaiq raq kiijaq berong-wacha ashi haito. Raüta kra hiq ba ka Bethel Shiikeawe mang na mangto. Jamkhano ngukla Shiikeawe ka pumsii maq kiraüta, Jakob ka aphu ma hai ma juwantlaq akhing na, ara hiq ba maq riihumkito. 8Rebeka khrumti jechak se Debora ka tsaito. Kiimaq amaa ka Ok chongtong na lapto. Arka Bethel hiq maq shemai nü siim na riito. Kra ningkhan kra hiq ba ka “Ahochang Okchong” nguta mangto.

9Ümtiikiiwa Jakob ka Mesapotamia mung maq jangkitaq, Shiikeawe ka apaiq phana riihumki nongto. Raüta apaiq ka shiimanto. 10Shiikeawe raq apaiq ma nguto, “Üm mang ka Jakob. Shatmaq ümchaü armiiphat sanha, ümmang ka Israil miraq.” Kiimaq Shiikeawe raq apaiq mang ka Israil ngutiishe mangto. 11Kiimaq Shiikeawe raq apaiq ma nguto, “Ngi Ka Ningkun Ajong Shiikeawe. Ümsetiim ka paheashe mipuchi wan laq. Ümlai ümla kiiwa maiq mung pahea she mipu wanlaq. Kiimaq ümniika hokhambi thun ma kaüwati mija wan haü. 12Ngi raq Abraham ma kiimaq Isak ma kuqkang mung kra ümniima mikuqha. Kiimaq kra mung ka ümnaq tsaijai ümsaü ümsetiim ma mikuqha.” 13Kra nguraütiishe Shiikeawe raq apaiq ka baiqthü raüta wa wanto. 14Kiijaq, Shiikeawe raq apaiq rai riibomtaq hiq ba na Jakob raq tsan na tiitsang chang man phan longkaü ashi shongto. Raüta kra longkaü ka spiqtai nai olip tai maq nyuk raüta ramto. Raüta Shiikeawe ma kiinong kuqto. 15Apaiq raq kra hiq ba ka Bethel nguta mangto.

Rechel Tsaito

16Jakob nai ajamtitiim raq Bethel hiq ka baiq thüto. Kiimaq tsangshiq ka Ephrath hiq na saü ma ashaqpuq dea niili, Rechel ma nodo akhing ka saüto. Kiimaq apaiq ma nodo ka ahawiq chamchaoto. Apaiq ma nowüchhi tsi ka henghea pinthum riito. 17Kra bala nochhü kamketi nyung raq nguto, “Naq haikiq, Rechel lei, armin maiqwe se hali.” 18Shatmaq apaiq ka atsai wan she riito, kiimaq atsitsü apit wan niishe apaiq raq ase ka Benoni nguta mangto. Shatmaq awe raq no ka Benjamin nguta mangto.

19Riita Rechel ka tsaiki kiita, apaiq maa ka Ephrath hiq na walam lamkii na lapto. Arka ümchaü Bethlehem ngutiishe ngutlo. 20Jakob raq kra hiq ba na tsan na tiitsang chang man phan longkaü ashi shongto. Kiimaq kra longkaü ka ümchaü niitaq Rechel maakho nguta ngutlo. 21Jakob ka kiimaq ahin na hali laü wanto. Raüta apaiq piitiip ka Edar kong mongchong maq konii reko niishe tei wanto.

Jakob Setiim

(1 Ka 2.1-2)

22Jakob ka kra mung na sitlaq choji na, Reuben ka awe chakliip nyungtiim phong wa nyungshi Bilha rai kiichamto. Jakob raq kra tsütsa ka taito. Raüta apaiq ka pinthum khiq riqto.

Jakob setiim ka roqshi ri wenai. 23Lea setiim ka Reuben, (Jakob se chhikhuwe pinthum), Simeon, Lewi, Juda, Isakar, kiimaq Jebulun riito. 24Kiimaq Rechel setiim ka Joseph nai Benjamin. 25Kiimaq Rechel ma adi-nyung Bilha setiim ka Dan nai Naphtali. 26Kiimaq Lea ma adi-nyung Jilpa setiim ka Gad nai Ashar. Riita ara asetiim thun arka Mesapotamia mung maq chhiito.

Isak Tsaito

27Jakob ka awe Isak phana Mamre hiqshong na wato. Mamre hiq ka Hebron chela tho na riito. Arjaq Abraham nai Isak ka shong wanto. 28Isak ka arawii shishi ri wiiroq tiichat na saüli sito. 29Raüta apaiq ka tikii kiikaiq niishetiq tsaito. Kiimaq asenai Esau nai Jakob raq amaa ka lapto.

Currently Selected:

RAPHA HIQWA LAK 35: TANGSBSI

Highlight

Copy