2 SAMUEL 24

Dawit Raq Maiq Sreabi Ka Weato

(1 Ka 21.1-27)

1 Tatiwe ka thongshi ri hali Israil mungti ma atsankhiq riito. Kra ningkhan apaiq raq Dawit tsantsii tiipherak raüta Israil mung khuthaq na chamchao tiisaüto. Tatiwe raq apaiq ka thaüto, “Kilaq. Laüta Israil mungti nai Juda mungti maiq ümchuwa kra wealaq.” 2Krai mren Dawit raq asengi phenlabi pengti Ajong Pinthum phentuwe Joab ma akha aming kuqto: “Kilaq, phenlabi ajong alabi thun ka sheaho laüta, Israil mung ka siimko maq riita siimko na saüli, maiq phan ümchuwa sitlaq kriiwa, maiq ka weakikiq. Ngi raq maiq ka ümchuwa kra sap rotiikang.”

3Shatmaq Joab raq hokhamwe bom ka akha treto, “Chaü lei, üm Tatiwe üm Shiikeawe raq, Israil mungti ka ümchaü ümchuwa sitlaq kriithaq niimin apa ahing ashi thepliip raüta pahea mitiipuchi kuq laq. Apaiq raq akha tiipuchi kuq wan tlaq kra ümniiraq chhichang rilung alu mikuqlaq. Shatmaq, Chaü lei, ümniiraq arka jaram weawon wa tan tlaü?” 4Shatmaq hokhamwe riika Joab nai asengi ajong alabi thun ma, apaiq aming kra tai ratlo nguta shiitepto. Krai mren, tsangshiq ka apaiq makki wa tiido hoto. Raüta Israil mung wa maiq weakai kihoto.

5Tsangshiq ka kiho raüta Jordan rai ka jinto. Raüta Aroar chela maq shemai nü tho na piitiip teito. Kra chela ka kinheawea tan na Gad wang na. Kriimiishe tsangshiq ka shekhu nü na Jajer chela kiina wato. 6Raütiishe Gilead wang na wato kiimaq Hitaiqnok wang na Kadesh chela kiina wato. Kriimiishe tsangshiq ka Dan chela kiina wato. Kiimaq tsangshiq ka Dan chela maq wawan raüta, Sidon chela maq shenyap wang kiiniishe wawanto. 7Kriimiishe tsangshiq ka peruk weshaüje Tajar chela maq shemai nü mung na kihoto. Raüta kriimiishe tsangshiq ka Hiwaiqnok chela thun nai Kanannok chela thun kiiniishe kihoto. Kiimaq atiisup niishe ka Juda mung na shemai nü na Beersheba chela kiiniishe kihoto. 8Krai mren, jipi lütiikaü ri raroqnai na saüli tsangshiq raq Israil mung tlotli na kilot raütiishe, tsangshiq ka Jerusalem na jang wanto. 9Raüta tsangshiq raq maiqwea raüpot ka hokhamwe jaq niishe kuqto. Maiq rekhat kai alotti Israil mung na 800,000 riito. Kiimaq Juda mung niika 500,000 riito.

Dawit Ngarai Tham Shiikeawe Sintsang Saüto

10Shatmaq Dawit raq maiqwea jaqsham kra lot jai she, atsan na kra jaqsham ka ashut klo kang nguta tsihea she tiido wanto. Kra ningkhan apaiq raq Tatiwe ma akha nguto, “Ngi raq ara ashut pinthum ngarai tang kang! Ingarai ka mangchan laüta diikuq laq! I mra diikuqlaq. Ngi raq angi nola jaqsham kang.”

11-12 Tatiwe raq Dawit Shammiwe Gad ma akha chongto, “Kilaq, laüta Dawit ma chonglaq, ngi raq apaiq ma lam atsam kuqtiikang. Apaiq raq ümriiti wa tsea jiiq, kriiti kra ngi raq mikloha.” Krai mren, anap ranap na Dawit ka tiidoto angu na, 13Gad ka apaiq phaniishe wato. Raüta Tatiwe raq apaiq ma jamlai wa chongkuqtaq kra apaiq ma chongto. Raüta apaiq ma waito, “Ümriiti wa mitsea haü? Rawiitsam tinkhit üm mung na ram tiidong, riimakla, jipi lütsam tinkhit rewe raq jo raüta ajusea riimakla, ranaiqtsam tinkhit üm mung na tha tiidong kriiwa? Riita ümchaü min tiima laq, Laüta ngi raq Tatiwe ma jamlai bomjang chongho chang wa miraq.”

14Kiijiishe Dawit raq treto, “Ngi ka jamkha ijasiq she! Shatmaq ngi ka maiqse mo ka horo mang. Tatiwe apaiq jaq maq nashiq ka mitsatson laq. Apaiq ka mangchantsi hea we.” 15Krai mren, Tatiweraq Israil mung tlot li na thadong henghea tiisaüto. Kra thadong ka kra ranap maq phawan raüta, apaiq raq akhing tiihongtaq kra tiisaüli thabi tiidongto. Kra thadong raq Israil mung tlot li siimko maq riita siimko na saüli maiq ka hingroq miishi jiimto. 16Tatiwe rase raq Jerusalem chelati ka ashthen baiq she angu wa, Tatiwe raq mungmaiqse tseabaiq wan tiima kra aklai riito, Kra ningkhan apaiq raq tsangshiq tseabaiqti rase kiima, “Tsaqlaq! Hongto she!” nguta chongto. Rase ka Jebusaiq phan maiqwe Arauna tsambuk chang ba niishe riito.

17Dawit raq maiq tseabaiqti rase kra chhito. Kiimaq apaiq raq Tatiwe ma nguto, “Ngi ahata ajiqwe ka. Ashut klotiwe ka ngi. Ara mungmaiqse nyungwe nosekong riika jamlai ri tiibiti mak? Ümniiraq ngi ma nai ijamti thun ma sintsang ka tiiholaq.”

Dawit Raq Berongwacha Haito

18Kra ranaiq niili Gad ka Dawit phana wato. Raüta apaiq ma chongto, “Ümniika Arauna tsambuk chang hiq ba kiijaq kilaq. Laüta Tatiwe miitu berong-wacha ashi hailaq.” 19Dawit raq Tatiwe aming ka langto. Gad raq apaiq ma chongtaq kra phanphan wato. 20Arauna raq ra maq liikiita, Dawit nai asengi ajong alabi thun ka apaiq phana awarai chhito. Apaiq ka Dawit khaki na hiq na bumki tlii she riito. 21Kra raütiishe waito, “Chaü lei, ümniika arjaq jamlai miitu wa saüwa laü?”

Kiijiishe Dawit raq treto, “Ara ümtsambuk chang hiq ba ara riwa wakang. Lata arjaq Tatiwe ma berong-wacha ashi hai ma, thabi dongtlaq kra tiitsaq miitu.”

22“Lamho laq. Chaü lei,” nguta Arauna raq treto. “Laüta ümniiraq jamlai wa ahea nguta riiwea tlaü kra phan phan Tatiwe ma honglu kuqlaq. Wa na chaqtlii-honglu take miitu min minsaü pongwetiim arjaq ara. Kiimaq honglu wa kra chaq chang chin miitu min ara minsaü pongwetiim raq tsam nichang thaikii thun min arjaq ara.” 23Raüta Arauna raq kriithun ka wiita hokhamwe ma kiinong kuqto raüta apaiq raq akha nguto, “Tatiwe üm Shiikeawe raq ümniiraq honglu kuq tlaü kra mitao laq.”

24Shatmaq hokhamwe raq treto, “Riimak. Ngi raq ari mikuq kang. Ngi raq Tatiwe, i Shiikeawe ma phe maq alap ha hupsam ka honglu na kuq mang.” Krai mren apaiq raq kra tsambuk chang hiq ba ka nai minsaü pongwetiim ka kampho kamsii roqbiingi maq rito. 25Kra raütiishe, apaiq raq Tatiwe ma berong-wacha ashi haito. Raüta chaqtlii-honglu thun nai rintii-honglu thun kra takuqto. Krai mren, Tatiwe raq apaiq achu jaü ka treto. Kiimaq Israil mung na thabi dong kra tiitsaqto.

Currently Selected:

2 SAMUEL 24: TANGSBSI

Highlight

Copy