MATTHEW 7

Mi chunga Ṭongtan

(Lk 6.37–38,41–42)

1“Pathen in nanṭong atanmakna sik, mi chunga ṭong tanmak ruh, 2ajârchu mihei chunga ṭong nantatan kapōhrep a khan Pathen in nangni chunga ṭong atan sik, khana milak chunga nantahmang dân kha nangni chunga’m ahmang sik kae.#Mk 4.24 3Khan chu nahmit a innim inkamre ka-om chu donlo chea, nasōpui hmit a innim kasintek kha heisa mo na-en? 4Heikhonga mo nang hmit a innim inkamre a-ompuma, nasōpui hneng, ‘Nahmit a innim kasintek ka-om kha losōtpek che rong,’ nati tor? 5A’nṭhatsak nang! Ahma inkeia nahmit a inkamre ka-om kha losōt hi roh, khava sō leh nasōpui hmit a innim kasintek ka-om kha losōt theina sik inthengtak a nahmuthei sik.

6“Neinâk intheng kha uihei hneng pek mak ruh, anmani hong inhe sik heia kha anse sik chei. Khana nanhlung mankatam hei kha vok-hei hmaikunga hlon mak ruh, anchōn rachihrep sik heia kae.

Der ruh, Jong ruh, Raki ruh

(Lk 11.9–13)

7“Der ruh, khan chu nanrahlâng sik; jōng ruh, khan chu nanhmu sik; raki ruh, khan chu kot kha inhlângpek sik chei. 8Ajârchu akader rakip in anrahlâng sik, akajong rakip in anhmu sik, khana kot inki hei kha inhlângpek sik hei. 9Nangni pahei kâra inkhat hnenga nasapa’n buhlom ader che pha hlung napek sik mo? 10Achangmak leh nga ader che pha mari napek sik mo? 11Nangni mikaṭhamak chei in hmen nansahei akaṭha pekje nanmanhret a kae. Kha achang inchu, marvâna ka-om nan-Pa’n, ahnenga kader hei kha heituk akakhe chet a neinâk kaṭha apek sik chei mo!

12“Nangni sik a mi nantamantlo hnōm kha milak hnenga nangni’num tlo ruh: hivahi Moses Dân leh Sânkathemhei mantheina ṭongjâr hei kha kae.#Lk 6.31

Kekot Inchîp

(Lk 13.24)

13“Kekot inchîp a hlut ruh, ajârchu hmeikhur kekot kha kalen khana ajōnna hlam kha kabei, khana khava hlam kajui kha katam hei. 14Tâk hringna kekot kha inchîp khana ahlam jōnna kha intak khava kahmu sōt mi kha katlôm hei.

Thingkung leh Akara

(Lk 6.43–44)

15“Sânkathem inhlem heia inphut insing thei ruh; avâng pônga chu kemōng kapōa nanhnenga kahong hei, tâk ashungting chu ram thōia kahne kapōtak hei kae. 16Anṭōn tlohei vâng nangni’n nanchîktor sik hei. Rahlingbuk heia vomhrui thei inramak, khana rahling kung heia theichang inramak. 17Thingkung kaṭha a kara kaṭha inra, khana thingkung kaṭhamak a kara kaṭhamak inra. 18Thingkung kaṭha a kara kaṭhamak inrathei mak, khana thingkung kaṭhamak a kara kaṭha inrathei mak. 19Khana kara kaṭha a’nramak thingkung rakip kha anphûr heia hmeishunga hlon manhlut sik hei kae.#Mt 3.10; Lk 3.9 20Kha achang jâra nangni’n sânkathem kadikmak hei kha anṭōntlo vâng nanchîktor sik hei.#Mt 12.33

Ke’n manhret hêrmak Chei eng

(Lk 13.25–27)

21“‘Rōngpu, Rōngpu’ tia anikabek rakip marvân rengram a hlutmak hei ning. tâk marvâna kapa lungdo katlo rōk hei kha akahlut sik hei kae. 22Ṭong tanna kani kha ajōng tlung pha mi katamtak in, ‘Rōngpu, Rōngpu! Narahminga Pathen ṭong kantalei hrile kae, narahminga ramṭai katamtak kanlei hnongsōt hei khana ṭōn-inlak kanleitlosōt a kae!’ anti sik. 23Khava pha ke’n anhnenga, ‘Manhret hêrmak chei eng. Kahnenga inphut sesōt ruh, mikaṭhamak-hei!’ kati sik.#Hl 6.8

Inn Kasak Inhnihei

(Lk 6.47–49)

24“Khava jâra kaṭonghei hi akatheia akajui rakip, tu achang inum hlungpui chunga inn kasak mikasing kapō kha kae. 25Khō kasûr, tuidung kalen, khana thlipui kahrâng jo khana inn kha akanok manhnak jo. Tâk tlûdek mak, ajârchu hlungpui chunga inn insak kae.

26“Tu achang inum hiva kaṭonghei akatheia akajuimak mi kha nêrdi chunga inn kasak mikamopa kapō kha kae. 27Khō kasûr, tuidung kalen, khana thlipui kahrâng khan inn kha akanok manhnak jo, khana katlu jo. Khana apur kha heituk a a’nhnak hranghra jo mo!”

Jesu Ratha neina

28Jesu’n hiseng ahrisō pha, aman theinahei chungchânga khan mipui he’n inlak anleisak jo.#Mk 1.22; Lk 4.32 29Ama chu Dân ojahei kapōa leichang mak; khava kanek a ratha kaneitak a aleimanthei hei.

Currently Selected:

MATTHEW 7: KOMRBSI

Highlight

Copy