MATTHEW 6

Pek Chungchânga Mantheina

1 # Mt 23.5 “Nangni bekṭōn kha mihei tahmu sik a mipui kâra akatlo hnâm nanchang makna sik intluk nger ruh. Mipui hmaikunga nantatlo achang inchu marvâna nanpa a inphut tloman inkhatbek chenmak tin chei.

2“Achang jâra akaneimak inkhat hneng nanpek pha, a’nṭhatsak he’n kamukna inna leh hlampui heia kalentak a malârna antatlo kapōa tlomak ruh. Mihei manpâkna chenna sik khanga antatlo kae. Kahri manchên pek chei kae, anmani tloman inpesō jo hei. 3Tâk nangni’n akaneimak mi nanpek pha, naṭhōn inhnai puipen kha’num amanhret makna sik tlo ruh. 4Khavakha mi manhret lo ṭōn akae sik kae. Khana nanṭōn tlo marûk a akahmu nanpa khan tloman apek male sik chei kae.

Derna Chungchânga Mantheina

(Lk 11.2–4)

5 # Lk 18.10-14 “Nangni’n nander pha, a’nṭhatsak hei kapōa changmak ruh! Ajârchu anmani’n mihmuna sik a kamukna innheia leh hlampui rakir heia kangir heia kae. Kahri manchên pek chei kae, anmani tloman inpekdek jo hei. 6Tâk nangni’n nander pha, innden a hlut ruh, kot inkamsi ruh, hmit a a’nhmu mak nanpa hneng rirûk a der ruh. Khana marûk a naṭōntlo akahmu nanpa khan tloman kha apek sik chei.

7“Nangni’n nander pha, khōvelhei derna kaseitak kha an-pathen he’n anthei sik tia anmandonna kapōa ajâr kase ṭong katamtak hmangmak ruh. 8Anmani angmak ruh. Nander mak hma nanta rangei seng kha nanpa’n amanhret sōa kae. 9Achang jâra nangni’n hinga nantader sik kae:

‘Marvâna ka-om kan-Pa:

Narahming kaja om rasoh;

10narengram jōng tlung rasoh;

marvâna nalungdo a’ntlo kapōa raleichunga’m intlo rasoh.

11Tuning kani kankatluk sik sâk leh in apek roh.

12Keini’n kanchunga akaṭhe hei kantarangei mandam kapōa

kanṭhena arangei mandam roh.

13Mathlemna aṭhōimak roh,

tâk-kha Akaṭhamak Inkhat a inphut ahuksōt roh. Ajârchu rengram, rathahrat, khana lûrna ahei tik a nata kae. Amen.’

14 # Mk 11.25,26 “Mi’n nanchunga antaṭhe hei kha nanrangei mandam he’nchu, marvâna nan-Pa’num nangni ṭhenahei kha arangei mandam sik chei. 15Tâk nangni’n mihei nanrangei mandam mak inchu, nan-Pa’num nangni ṭhenahei kha rangei mandam mak chei ning.

Buhngōi Chungchânga Mantheina

16“Nangni’n bu nanhngōi pha, a’nṭhat hlemsak-hei kapōa akachâm hmaisō malârmak ruh. Bu anhngōi tia mihe’n anmanhretna sik a anhmaisō khachu donmak hei. Kahri manchên pek chei kae, anmani tloman kha inpesō jo hei. 17Nangni’n bu nanhngōi pha, nanhmai inphet una, nanlu inkhui kaṭha ruh, 18khang’khan nanbu hngōi kha mihe’n anmanhret makna sik, hmit hmulo nan-Pa rōk in amanhretna sik a tlo ruh. Khana marûk a nantatlo akahmu sōt nan-Pa khan tloman kha apek sik chei.

Marvâna Karōi

(Lk 12.33–34)

19 # Jam 5.2,3 “Ra-nge leh thîr-ek tasâk manhmangthei, khana inru’n asuk khōia amarûkthei hmun raleichunga nankarōi manbuk mak ruh. 20Khava kanek a, ra-nge leh thîr-ek tasâk manhmangthei makna hmun leh inru’n asuk khōia amarûk tor makna marvâna nankarōi manbuk ruh. 21Ajârchu nankarōi omna a khan nanmalung um ka-om sik.

Taksa Hmeivâr

(Lk 11.34-36)

22“Hmit-hei hi taksa sik a thaihmei kapō hei kae. Nahmit-hei kha aṭhat inchu nataksa pumpui kha kavârpet sik; 23tâk nahmit kha aṭhatmak inchu, nataksa pumpui kha a’nthim sik kae. Achang jâra nashunga vâr kha a’nthim jo’nchu, a’nthim kha heituk a a’nhnak sik jo mo!

Pathen leh Karōi Neihei

(Lk 16.13; 12.22–31)

24“Tûte inkhat in akapu 2 sōk chang tor mak; inkhat a-enkada sik a kha inkhat alungset sik; inkhat arazen sik a kha inkhat donmak ning. Nangni’n Pathen leh karōi kha razensap tor mak chei.

25“Hiva jâra kahri pek chei kae, nanhringna sik a nanta rangei sâk leh in hei chunga, a-emak leh nantaksa sik a pōnsi derkeihei chunga nanmalung manrim mak ruh. Hei-achang inum bu kanek a hringkhō man akatam jôk changmak mo? Khana pōnsi derkei kanek a taksa man akatam jôk changmak mo? 26Vahei so en hei ruh: hmuchi vormak hei, khôm mantûp mak hei khana sasōr a’m manbuk mak hei; kha’num marvâna nan-Pa’n a-ensui hei! Vahei kanek a nangni mankatam jôk changmak chei mo? 27Nanmalung inrim jâra nankâra tu mo ahringkhō bongkhat amanseisa tor?

28“Khana pōnsi derkei sik a heisa mo a’nrim chei? Ram reipâr heiso en hei ruh: anbinga sik a ṭōn um tlomak hei, pōn um khôngmak hei. 29Tâk ke’n kahri pek chei kae, nei leh hao rakip leh ret kasi Solomon Reng kapha’num hiva reipâr inkhat ṭhatna phator mak.#1 Rn 10.4-7; 2 Th 9.3-6 30Tuning hin ka-oma jîng leh chu ratap shunga ro manhlut sik hei, ram thōia phihei ret kasyem kha Pathen kae. Akakhe chet a amanret ngermak sik chei mo? Heituk taksenna katlôm jo chei mo!

31“Khava jâra hing’hin: ‘Khona inphut busâk, tui in sik a-emak leh pōnsi derkei akahong sik?’ tia malung dongna neimak ruh. 32(Khōvel he’n ahei tik a châmna antanei kha khavahei chungchânga kae.) Hihei rakip hi nangni’n nanrangei ti hi marvâna nanpa’n amanhret. 33Khava kanek a heirakip chungchôna Pathen Rengram leh adikna kha jong ruh, khan chu khavahei seng kha apeksa sik chei. 34Khava jâra jîng kani sik malung manrim mak ruh; jîng kania malung inrimpui akatluk hrep leika-om sik. Ani kataia inrimna chunga khan hapsa sik rangei mak.

Currently Selected:

MATTHEW 6: KOMRBSI

Highlight

Copy