MATTHEW 4

Jesu Enmansinna

(Mk 1.12–13; Lk 4.1–13)

1Khava sōa Rathla khan Jesu kha nêrdiram a Diabol in enmansin sik a aṭhōisōt jo.#He 2.18; 4.15 2Sûn 40 leh jân 40 thlai ahngōi jo pha, Jesu kha avon kaṭâm jo. 3Khava sōa Diabol kha ahnenga kahonga ati, “Nang Pathen sapa nachang inchu hiva hlunghei hi buhlom changna sik ṭong pe roh.”

4Tâk Jesu’n amasôn, “‘Mihring hi buhlom vâng rōk a hring tor mak, tâk Pathen ṭongsō rakip vâng khan akahring sik kae,’ tia ṭong intheng in ati.”#Dân 8.3

5Khava sōa Diabol khan Jesu kha Khōpui Intheng Jerusalema khan aṭhōia, Bek-inn chung inshânga aman ngira, 6khana ahnenga ati, “Nang Pathen Sapa nachang inchu, nabinga inchôm inthla roh, ajârchu hing’hin ṭong intheng in ahri:#Hl 91.11-12

‘Pathen in nachungchânga angevahei ṭong apek sik hei,

hlunga nake nasuk makna sik,

anmani’n ankut vâng anleimado sik che.’”

7Jesu’n amasôn, “Tâk ṭong intheng in hing’hinum ahri, ‘Nang in na-Rōngpu na-Pathen enmansin mak roh.’”#Dân 6.16

8Khava sōa Diabol khan Jesu kha tlâng inshângtak inkhat chunga aṭhōia, vânhnōi raleichung rengram rakip leh anlûrnahei amanhmua, 9Diabol in ati, “Nang in na-inkuna kei nakamuk eng inchu hiseng hei hi kapek sik che.”

10Khava sōa Jesu’n amasôn, “Seitan, Sesōt roh! Ṭong intheng in hinga ati, ‘Nang in Rōngpu na-Pathen rōk kha nakamuk a narazen sik kae!’”#Dân 6.13

11Khanachu Diabol khan Jesu adahlon jo; khana marvân ngevahei kajōng heia anjōng inthōpui jo.

Galileea Jesu’n Aṭōn Aphut

(Mk 1.14–15; Lk 4.14–15)

12John kha kurkhum a anda jo ti Jesu’n athei pha, Galilee ramting kasesōt jo.#Mt 14.3; Mk 6.17; Lk 3.19-20 13Nazareth khōa om mak jo, Jebulun leh Naphtali ramṭhen shunga Galilee Dîr panga Capernaum khōpuia aka-om sik a kase jo.#Jn 2.12 14Hivahi sânkathem Isaiah taleihri kha huitlungna sik a ale’ntlo kae:

15“Zebulun ram leh Naphtali ram a,#Is 9.1-2

tuipui jōnna hlam, Jordan rekhat ting

Jât-hlop hei ram Galilee!

16Khō inthim thōia ka-om mihe’n

vâr kalen inkhat anhmu sik.

Khana thina ram daihlim thōia aka-om hei chunga

vâr kha hong kavâr sik.”

17Khava pha inphut Jesu’n aṭong ahrile manphut jo, “Nanset tloa inphut hong inhe ruh, ajârchu marvân Rengram kha kahnai jo!”#Mt 3.2

Jesu’n Nga Kasur Mi 4 Abekna hei

(Mk 1.16-20; Lk 5.1–11)

18Galilee dîr panga Jesu kalôna Simon (Peter um anti) leh anaipa Andreu hei unai 2, nga kasur mihei, dîr shunga len anta leivora nga anta leijong kha ahmu hei. 19Jesu’n anhnenga, “Hong una ajui ruh, khana ke’n mi surje manthei chei rong,” ati hei. 20Khavatak a anmani’n anlen andahlona anjui jo.

21Khanga kaselea ahlop unai 2, Zebedi sahei, James leh John avahmu hei. Anrakōng shunga anpa Zebedi leh len anmantluk a aleika-om hei kha avahmu hei. Jesu’n abek hei, 22khavatak a anmani’n rakōng leh anpa kha andahlona ama anjui jo.

Jesu’n Mi katamtak Aman theina

(Lk 6.17–19)

23Galilee ram pumpuia Jesu kalôna, Intûpna innheia amanthei hei, Rengram chungchânga Ṭong kaṭha ahrile, khana mihei natna hei seng amandama kae.#Mt 9.35; Mk 1.39 24Syria ram pumpuia aṭong hi inthang jo, khana akadam mak hrinat inralak a khōdeng kathei: ṭai kahlut, hring-ê karôn, lang kangōi, ahnenga anheiṭhōi hei, Jesu’n aleimandam hei. 25Galilee, Khōpui Sôm, Jerusalem, Judea, khana Jordan rekhat a ramheia inphut mipui katamtak in ama anjui joa kae.

Currently Selected:

MATTHEW 4: KOMRBSI

Highlight

Copy