MATTHEW 3

Tui Inhlutpa John Ṭonghrile

(Mk 1.1–8; Lk 3.1–18; Jn 1.19–28)

1Khava lai khan Judea ram a Tui Inhlutpa John nêrdiram a kahonga ṭonghrile aleiphut joa kae. 2“Nansetna inphut inhe ruh, ajârchu marvân Rengram kha kahnai jo!” ati.#Mt 4.17; Mk 1.15 3Sânkathem Isaiah khan,#Is 40.3

“Nêrdiram a mi inkhat ông rasa khan,

‘Rōngpu hlamlen mantluk ruh;

alônna sik a hlam mantlun ruh!’” tia aleihripa kha John hi kae.

4John pōnhei kha Sharîngsei sahme vânga insyem hei, shavun khōnkir vâng akhōn a’nkir, khana athlaisâk kha khai leh ram thōia khōihning hei kae.#2 Rn 1.8 5Jerusalema inphut, Judea ramṭhen pumpuia inphut, Jordan kimvea ram pumpuia mihei John hneng kahong hei. 6Ansetnahei anhrisōt a Jordana ama’n tui manhlutna atlo hei.

7Phariseehei leh Sadduceehei ama’n tui amanhlut sik a akahong hei kha ahmu pha anhnenga, “Eh marihei, Pathen hnuk natna ajōng katlung sik a inphut tlânsōtna sik tu’n mo amanthei chei?#Mt 12.34; 23.33 8Nansetna inphut nan-inhesōt kha malârtheina sik a heikhat intlo ruh. 9Khana Abraham kha nanpa kae nanti jâra karâkna inphut katlânsōt tor sik ung tia indonmak ruh. Ke’n kahri pek chei kae hiva hlunghei hi Pathen in aloa Abraham tu leh sa amasōtor hei.#Jn 8.33 10Thingkunghei kha phûrna sik hreicha mantluksa ka-om jo; akaṭha a’nramak thingkung rakip khachu akung beret a phûr mathlûk a hmeishunga ti sik kae.#Mt 7.19 11Nanmalung thleng malârtheina sik tui vânga ke’n tui hlutna katlo chei; tâk kei kanek a akalen, ratha kaneitak inkhat kakahnunga kahong, akekōk heikachoi sik bek a’m kei rahōi changmak eng; ama’n nangni Rathla Intheng leh hmei vâng tui amanhlut sik chei. 12Ama’n yângjâp akut a achoi, sarahmu ajâp mantheng sik, khana sâng kha sasōr shunga akhum mantûp sik, tâk sarasi hei khachu akathi theimak hmeikhur shunga ahlon manhlut sik hei.”

Jesu Tui Ahlut

(Mk 1.9–11; Lk 3.21–22)

13Khava lai khan Galilee ram a inphut Jesu Jordana John in tui amanhlut sik a ahnenga kahong. 14Tâk John in leihnōm mak a hing’hin ati, “Kei jôk nang in tui namanhlut sik eng kae, tâk nang macheng kei hneng akahong che mo!”

15Tâk Jesu’n, “Tûnhin chu ahnōm pek hi roh, ajârchu hing’hin Pathen lungdo rakip eini’n pui nimathluk sik kasōk,” tia amasôn. Khava pha John kahnōm jo.

16Jesu tui ahlutsō lim leh tui shunga inphut hong kasōk jo. Marvân kha inhlânga vaṭhu kapō Pathen Rathla kajōnga achunga ajōng kachōng kha John in aleihmu. 17Khana marvâna inphut rasâ inkhat in, “Ama hi kasapa marittak kae, achunga kamalung katlai,” ajōng ti.#Aph 22.2; Hl 2.7; Is 42.1; Mt 12.18; 17.5; Mk 1.11; Lk 9.35

Currently Selected:

MATTHEW 3: KOMRBSI

Highlight

Copy