MATTHEW 28

Jesu Thōisōtna

(Mk 16.1-10; Lk 24.1–12; Jn 20.1–10)

1Châmhngat kani ning sōa, Vârsyem ning jîng khōvâr aphut jo pha, Mary Magdalene leh alak Mary thlân ka-en sik a kase hei. 2Manhret manloa lingnu inhnaktak innok jo; marvâna inphut Rōngpu ngeva inkhat jōng kaṭum, thlânkot hlung kha ahlik a achunga in-ong jo. 3Ahmaisō kha khō inphe ka-ang khana apōnsi kha kavur kapōa kachek. 4Thlân kahngâk-hei kha kaṭihêr jo heia anratha innok jo khana akathi kapōa ka-om jo hei.

5Ngeva khan nuhmeihei hneng, “Nangni ṭimak ruh, nangni’n thingrakea antamakhei hlon Jesu kha nantajong kae ti ke’n kamanhret. 6Ama hin om mak jo. Ama’n aleihri kapōa kathōisōt jo, hong una a jena hmun hi hong-en ruh. 7Tûnchu nangni inrangtak a se ruh, asonlehei hneng, ‘Thina inphut ama kathōi jo, tûn Galileeting nanhma leikase sik jo; sona son ama nanvahmu sik!’ vati ruh. Ke’n kamanthei chei kha mandonsōt ruh,” ati.

8Khava jâra inrangtak a thlân kha andahlon jo, kaṭi jo hei, tâk inpâk na’n kasip hei, khana asonlehei inthei sik a katlân jo hei.

9Manhret manloa Jesu’n anmani a’ntōpui heia, “Lungmōng in ompui chei rasoh,” ati. Anmani kahong heia, ake anvamatua ankamuk jo. 10Jesu’n anhnenga, “Ṭimak ruh, se ruh, kasōpuihei kha Galileeting ansena sik vamanthei hei ruh, sona son anvahmu sik eng,” ati.

Akahrunghei Ṭong thangkōi

11Nuhmei he’n hlam a anselai thlân kahrunghei kâra ṭhahrep khōpuia inle heia omchen kasōk rakip kha thempu kalenhei hneng anvamanthei jo hei. 12Thempu Kalenhei khan upahei leh intûp heia ṭōn anleimantluk jo; sepeihei hneng sêr katamtak anpek heia 13anleiti, “Asonle he’n jân a kahong heia nangni nanje kathi akalōng anmarûk jo, tia hri ruh. 14Khana hiva ṭong hi ram vaikarôn in athei inchu keini’n kanjôr sik, nangni chu ṭhena neimak chei kanti sik, hiva ṭong chungchânga nanmalung dongna sik heite om mak,” antipek jo hei.

15Akahrung hei khan sêr anlojoa antamanthei hei dungjuia anleitlo jo. Khava jâra ṭong mathlung kha khanga tuning katlung Jehudi he’n anmanse thang jo.

Jesu Asonlehei hnenga A’nlâr

(Mk 16.14–18; Lk 24.36–49; Jn 20.19–23; Ṭōn 1.6–8)

16 # Mt 26.32; Mk 14.28 Sonle 11 hei kha Jesu’n ansena sik a aleihri pek hei Galileea hmebunga khan leikase hei. 17Anmani’n ama anhmu pha, ṭhahrep he’n inkei-chiona annei inum, ankamuk jo. 18Jesu anhnenga kahonga ahri, “Marvân chung leh raleichunga ratha neina rakip anipek jo. 19#Ṭōn 1.8Nangni mi rakip hnenga, hmun rakip a se ruh, kasonle vasyem hei ruh: Apa, Asa, Rathla Intheng rahminga tui manhlut hei ruh, 20khana kaṭong pek chei rakip hi anjuina sik manthei hei ruh. Khana pha a’nchaina katlunga ahei tik a ke’n ka’nṭhōipui ṭhak sik chei.”

Currently Selected:

MATTHEW 28: KOMRBSI

Highlight

Copy