MATTHEW 26

Jesu Dōina Ṭōnmantluk

(Mk 14.1–2; Lk 22.1–2; Jn 11.45–53)

1Jesu’n hihei seng amantheisō hei pha, asonlehei hneng, 2“Nangni’n nanmanhret, ni 2 sōa Rakan Kût sik jo kae, khana Mihring Sapa kha thingrakea makhei hlonna sik antapek sōt sik jo kae,” ati.#Sōk 12.1-27

3Khava pha Thempu Kalen Caiaphas innpuia, thempu kalenhei leh Jehudi upahei intûp jo hei, 4khana marûk a Jesu kha sura thatna sik anmantluk jo. 5Tâk anmani’n, “Revei pha hinchu tlomak rih, akinchu mipui kâra inhnokna kasōk sik,” antia kae.

Bethany a Jesu Thai Antamanthi

(Mk 14.3–9; Jn 12.1–8)

6Bethany khōa vun kaphâr nat kaṭhamak a aleikanapa, Simon inna Jesu leika-om. 7Jesu’n bu asâk lai, nuhmei inkhat in aman katamtak thai Alabaster peng inkhat ahei choia alu chunga asunthlōn jo.#Lk 7.37-38 8Sonlehei khan kha anhmu pha anhnuk kana a, “Heisa mo hiseng a’nhmang jo?” tia inder hei. 9“Hiva thai marim katui hi aman katamtak a jōra sêr kha sara khōdeng katheihei sempek thei hei kae!” anti.

10Anmani ṭonghri kha Jesu’n amanhret joa anhnenga ati, “Heisa mo nuhmei hi amalung nantamanhōi pek mak? Amanu hin kei sik a akaṭha leh marit ka-om ṭōn atlo kae. 11Sara khōdeng katheihei khachu nanta-ompui ṭhak sik hei kae, tâk kei chu nangni leh omsap ṭhak mak min.#Dân 15.11 12Amanu’n hiva thai marim katui kachunga asun hin kei vûmna sik a intlukna amannei eng kae. 13Tûnchu, kadiktak a kahri pek chei kae, hiva ṭong kaṭha hi raleichunga anhrina hmun rakip a, amanu mandonsōtna inkhat a aṭōn leitlo hi a’nhriṭhak sik jo kae.”

Judas in Jesu Pek sōt sik a Akahnōm

(Mk 14.10–11; Lk 22.3–6)

14Khava pha sonle 12 hei kâra inkhat Judas Iscariot intipa kha thempu kalenhei hneng kasea 15#Zec 11.12khana ader hei, “Ke’n Jesu kapek sōt chei inchu heimo nantapek sik eng?” ava ti. Anmani’n dangka 30 anteia anpek jo. 16Khava pha inphut Judas in Jesu kha pek sōt theina sik hlamkot ajōng joa kae.

Sonlehei leh Jesu’n Rakan Kût Bu Antasâk

(Mk 14.12–21; Lk 22.7–13,21–23; Jn 13.21–30)

17Chê philo Buhlom Revei kani hma-inkei ning sonlehei kha Jesu hneng kahong heia, “Nang sik a Rakan Kût bu sâkna khon mo kantamantluk sik namadu?” anhongti.

18Ama’n anhnenga ati, “Khōpuia son mi inkhat hneng se ruh, hinga vahri ruh: ‘Oja khan, kapha hong katlung jo; kei leh kasonlehei na-inna Rakan Kût kantahmang sik kae ati,’ vati ruh.”

19Sonlehei kha Jesu tahri kapōa anvatloa, khana khan Rakan Kût bu sik kha anmantluk jo.

20Khōhlei ahongtluk jo pha, Jesu leh asonle 12 hei busâk sik a in-ong jo hei. 21Bu ansâklai Jesu’n, “Kahri pek chei kae, nankâra inkhat in mikut a apek sōt sik eng,” ati.

22Sonlehei anmalung kadong hêr joa inkha-khat in ahnenga ander et, “Kei natina eng chu chang hêrmak nu, Rōngpu?”

23 # Hl 41.9 Jesu’n amasôn heia, “Kei leh thleng shunga kut inporsap khan kei apek sōt sik eng. 24Mihring Sapa kha ṭong intheng tahri kapōa akathi sik kae, tâk Mihring Sapa kha mikut chunga akapek sōt sikpa kha heituk a ṭitpek aka-om jo mo! Ama ale’ntet hêrmak achang inchu ama sik a akaṭha jôk sik kae!” ati.

25Akapek sōt sik Judas khan heikaṭonga, “Oja, kei natina eng chu changmak nu?” ati.

Jesu’n ahnenga, “Nang in khanga nati jo,” atipek.

Rōngpu Jân-thlaisâk

(Mk 14.22–26; Lk 22.14–20; 1 Cor 11.23–25)

26Anmani’n ansâklai, Jesu’n buhlom har kha aloa manpâkna derna anei, khana akhōia asonlehei hneng apek heia, “Lo una sâk ruh, hivahi kataksa kae,” ati.

27Khava sōa ama’n kōklei kha aloa, Pathen manpâkna anei, khana anhnenga apek jo hei. Ama’n ati, “Hi nankhenga in ruh, 28#Sōk 24.8; Jer 31.31-34hivahi Pathena intepna chunga mêrchîkna a’ntat, mi katamtak set rangei mandamna sik a akalōng kathisen kha kae. 29Ke’n kahri pek chei kae, kapa rengram a nangni leh vomhrui tuither kha ni-insap mak kârseng, tuna inphut a hiva vomhrui tui ke’n avea in nôk mak jo ning.”

30Khana anmani’n hla inkhat anleisak a Olive Tlâng ting kasesōt jo hei.

Jesu’n Peter Inphe sik Ahri sōt

(Mk 14.27–31; Lk 22.31–34; Jn 13.36–38)

31 # Zec 13.7 Khava sōa Jesu’n anhnenga ati, “Tûnjân tak hin nankhenga kei nandahlon enga katlânsō sik chei, ajârchu ṭong intheng in ahri, ‘Pathen in kemōng kakhempa athat sik, khana kemōng rup-hei kha a’nchekdâk sik hei kae.’ 32#Mt 28.16Tâk kei kathōisōtsō leh, nanhma Galileea leikase sik eng.”

33Peter hongkaṭonga, Jesu hneng, “Ankhenga andahlon che’num, kei chu dahlon hêrmak che ning!” ati.

34Jesu’n Peter hneng, “Kahri pek che kae, tûnjân âr akhōng mak hma vōi 3 manhret mak eng nati sik kae,” ati.

35Peter in amasôn, “Nang leh akathisap sik me achang inum khanga chu tihêr mak ning!”

Alak sonle rakip inum in-ang et a antia kae.

Gethsemane Rahōn shunga Jesu’n Ader

(Mk 14.32–42; Lk 22.39–46)

36Khava sōa Jesu’n asonlehei leh Gethsemane inti hmun a leikase hei, ama’n ahnenga, “Kei soson kasea derna kavanei shunga nangni hin le’n ong ruh,” ati hei. 37Peter leh Zebedi sa 2 hei aleiṭhōi hei. Malung inrimna leh lungdongna’n amakhusi jo, 38khana anhnenga ati, “Kamalung inrengna hi inhnakreia asuk manchip sik jo eng. Hin om-una ahei enṭhak ruh.”

39Hmating ajingte kasea, ahmai raleia kakhup a, “Apa, achangthei sik inchu, hiva inrengna kōklei hi keia inphut alosōt pek roh! Tâk kei racham changmak sona nang racham chang rasoh,” ati.

40Asonle 3 hei hneng he’nlea aleikaje hei kha avahmu hei; Peter hneng, “Pung khat rōk um nangni’n nantathōkpui tor mak eng mo? 41Mathlemna nantlâk makna sik der una thōk ruh; Rathla’n chu intluk, tâk taksa’n chu katlasama kae,” ati.

42Vōi khat nôk Jesu kasea avader, “Apa, hiva inrengna kōklei hi kei ta-inmak sik a losōtthei achangmak inchu nang racham kha chang jo rasoh.” 43Ama vōi khat he’nle nôk a sonlehei aleikaje hei kha avahmu nôk hei; anhmit hmu jâra le’nṭhang tor mak jo hei.

44Avea Jesu’n adahlon heia kasea hma a akaṭong kapō-pōa vōi 3 tlukna avader nôk jo. 45Khava sōa sonlehei hneng he’nlea anhnenga, “Tûn katlung châm a’nhnga cheia alakaje chei mo? Enruh! Mihring Sapa kha mikasehei ratha neina thōia pek sōtna sik pha kha hong katlung jo. 46Thōi ruh, se jo rih. Enruh, ani kapesōt sikpa kha hin ka-om jo!” ati.

Jesu Antasur

(Mk 14.43–50; Lk 22.47–53; Jn 18.3–12)

47Jesu’n khanga ahrilai, 12 hei kâra Judas kha heikatlung jo. Ama leh mi katamtak in chemjâm leh sung anheichoia thempu leh upahei mansena thōia kahong jo hei. 48Akapek sōt sikpa khan mipuihei hneng chîkna inkhat aleipek hei: “Ke’n kamajôp pa kha nanta madupa kha kae. Kha sur ruh!” atipek hei.

49Judas kha Jesu hneng intlunhrek a kahonga, “Mōngna’n ompui che rasoh, Oja,” atia avamajôp jo.

50Jesu’n amasôn, “Ṭhōnpa, natlo sik kha inranga tlo jo roh!”

Khava pha, anmani kahong heia Jesu kha ansur jo, anmatutlit jo. 51Jesu leh a’nṭhōi mi inkhat khan achemjâm aradok a Thempu Kalen sōkpa kōr atuk mathlâk jo. 52Jesu’n ahnenga, “Nachemjâm kha apaia thōn male roh. Chemjâm kahmang rakip khan chemjâm vâng akathi sik kae. 53Kapa hnenga inthōpuina kadertor khana inrangtak a marvân ngeva remi legion 12 kakhe ajōngtir pek sik eng ti hi manhret mak che mo? 54Tâk khanga achang inchu hinga kasōk sik tia Ṭong intheng taleihri kha heikhong mo hui akatlung sik?”

55 # Lk 19.47; 21.37 Khava pha Jesu’n mipuihei hneng, “Dân kajuimak inkhat kasur sik kapōa chemjâm leh sung inthōa kei kasur akahong chei mo? Ani tina bek-inna in-ong enga kalei manthei chei; aleisur mak chei. 56Tâk hihei seng hi sânkathem he’n ṭong inthenga antamazet kha huitlungna sik a akasōk jo kae,” ati.

Khava sōa sonlehei seng in ama andahlona katlân jo hei.

Jesu Upa Rup-hei Hmaikunga

(Mk 14.53–65; Lk 22.54–55,63–71; Jn 18.13–14,19–24)

57Jesu kasur hei khan Thempu Kalen Caiaphas inna anṭhōi jo, khana khan Dân ojahei leh Sehmang-Pachong le’ntûp hei. 58Thempu kalenpen lâmte katlunga Peter khan inkârjap a ahei jui. Lâmte shunga kasea heimo kasōk sik enhnōm jâra mikahrunghei kâra va’n-onga kae. 59Thempu kalenhei leh Sehmang-Pachong he’n Jesu thatna sik maleiseia sâkhi anleijong; 60tâk mi katamtak hmating heikasōk heia adikmakna anhri ravâng, inkhatbek hmutor mak heia kae. Hnungpena mi 2 hmating kahong heia 61#Jn 2.19“Hiva mi hin, ‘Pathen Bek-inn hi kaṭhet a ni 3 sō leh avea kasaksōt tor sik’ ati,” anhei ti.

62Thempu Kalen kha kangira Jesu hneng, “Nakadōia anmaherna che hi heite masôn mak hei tin che mo?” ati. 63Tâk Jesu chu kadai hngera leika-om. Thempu Kalen khan ahnenga, “Akahring Pathen rahminga tûn hâksêrna thōia kada che kae: namanthei sik unga kader che kae: nang Pathen Sapa, Messiah nachang inchu amanthei roh?” ati.

64 # Dn 7.13 Jesu’n amasôn, “Nang in khanga nahri jo. Khana nankhenga kahri pek chei kae: tuna inphut Mihring Sapa kha Akahratpen ama changting a’n-ong leh marvâna sumtuk chunga ajōng ṭum kha nanhmu sik!”

65 # Lev 24.16 Hi atheia Thempu Kalen kha apōn akei hlera, “Pathen hmumasina ṭong ahri jo! Sâkhi katamtak rangei mak jo! Ama’n Pathen hmumasina ahri kha tûntak khan nanthei jo! 66Heimo nanmandon?” ati hei.

Anmani’n anmasôn, “Ama aṭhe jo, akathi nger sik kae.”

67 # Is 50.6 Khava pha anmani’n ahmai anmachi thlōna ankaben jo; ama inben hei khan 68ander, “Messiah, keini sik a sânsōt roh! Tu mo nakavōk kha hri roh!” anti.

Peter in Jesu Ahri manhlem

(Mk 14.66–72; Lk 22.56–62; Jn 18.15–18,25–27)

69Vânga lâmtea Peter kha in-onga aleiomlai Thempu Kalen sōknu inkhat ahnenga kahonga, “Nang um Galileea Jesu leh le’nṭhōi chei,” ati.

70Tâk ankhenga hmaikunga leihnōm mak. “Nang in heimo nahri manhret mak eng,” tia amasôn, 71khana ama kha lâmte heihlutna kekot a kasōk jo. Alak sōknu inkhat in ahmua khava hmun a ka-om pasehei hneng “Ama hi Nazareth Jesu leh a’nṭhōi hei kae,” ati.

72Avea Peter in hnōm mak a aleimasôn, “Kei khōmâk kasâm kae mipa kha manhret mak eng.”

73Pha bongkhat sōa khava hnenga akangir pasehei Peter hneng kahong hei. “Kadiktak a nang ankâra inkhat che kae. Hei-achanga, naṭong jôm hin nang amalâr che!” anti.

74Khava pha Peter in ati, “Kei intep eng, akadik kahri kae! Kadikmak inchu Pathen in akarâk rasoh! Mipa kha manhret mak eng!”

Khava laitak ârkhōng hong kakhōng jo, 75khana Peter in Jesu ṭong: “Âr akhōng mak hma, vōi 3 manhret mak eng nati sik eng kae,” aleiti kha amandonsōt jo. Ama kasesōt a inhnaktak a vakaṭap jo.

Currently Selected:

MATTHEW 26: KOMRBSI

Highlight

Copy