MATTHEW 19

Sanghram Inṭhen Chungchânga Jesu Mantheina

(Mk 10.1–12)

1Jesu’n khaseng ahrisōa, Galilee adahlona Jordan tuidung rekhat tinga Judea ramting kase jo. 2Mipui katamtak in ama anleijui, khana khava hmun a khan mi katamtak annat aleimandam hei.

3Pharisee ṭhahrep ahnenga kahong heia anchânga man-ôkna sik ahnenga ṭong inkhat anhongder, “Heikhat jâra pase inkhat in anuhmei a’nṭhenpui sik hi nidân in ahnōm pek mo?”

4 # Aph 1.27; 5.2 Jesu’n amasôn hei, “A’nphutbia Akasyempa’n pase leh nuhmei aleisyem hei inti ṭong intheng hi teiphung mak chei mo? 5#Aph 2.24Khana Pathen in ati, ‘Hiva sik jâra pase inkhat in anu leh apa adahlon sik hei kae, khana anuhmei leh a’nchun sik hei kae, khana 2 hei kha inkhat rōk akachang sik hei kae.’ 6Achang jâra anmani mi 2 changmak jo hei, inkhat rōk jo hei kae. Pathen tamanchun jo hei kha tûte’n ṭhenmak hei rasoh.”

7 # Dân 24.1-4; Mt 5.31 Pharisee he’n ahnenga, “Khan chu heisa mo pase inkhat in anuhmei hneng indana malârna lekha inkhat pek a tirsōtna sik Moses’n dân aleipek,” anti.

8Jesu’n anhnenga, “Ajârchu nangni manse nan-intakrei jâra nan-inṭhen sik kha Moses’n aleihnōm pek chei kae. Tâk anphutbia chu kha leichang mak. 9#Mt 5.32; 1 Cor 7.10,11Kahri pek chei kae, tu achang inum jông leh kik jâra tei loa, anuhmei a’nṭhenpuia nuhmei lak inkhat kanei mi kha mikajông kae,” ati.

10Asonle he’n ahnenga, “Pase inkhat leh anuhmei kâra khanga anti’nchu inn neimak kha kaṭha jôk,” anti.

11Jesu’n amasôn hei, “Hiva mantheina hichu mi rakip chunga mansethei changmak, tâk Pathen tapek rōk hei sik a kae. 12Ajârchu mihe’n lu anhông makna ajâr katamtak ka-om: ṭhahrep in khanga ajo’nte ka-om hei, alak he’n khanga mihring tasyem ka-om hei, khana alak he’n marvân Rengram sik a lu kahongmak um ka-om hei. Hiva ṭong hichu akalotor mi khan inlo rasoh.”

Jesu’n Naipang Kasinhei Vâng apek hei

(Mk 10.13–16; Lk 18.15–17)

13Mi ṭhahrep in naipanghei luchunga Jesu’n akut adapek a aderpekna sik heia ahnenga anhongṭhōi hei, tâk asonle he’n mihei kha anleirasei hei. 14Jesu’n anhnenga, “Naipanghei kha kahnenga heimanhong hei ruh, khâm mak hei ruh, ajârchu marvân Rengram kha anmani kapō hei ta kae,” ati.

15Ama’n akut kha anlu chunga ada a khava sōa kasesōt jo.

Khangdông Mikahaopa

(Mk 10.17–31; Lk 18.18–30)

16Vōi khat mi inkhat Jesu hneng kahonga ahnenga ahongder, “Oja, ke’n kumleikōa hringna sik ṭōn kaṭha heimo katlo sik?”

17Jesu’n ahnenga, “Akaṭha chungchânga heisa mo nahongder eng? Akaṭha Inkhat rōk ka-om. Kumsôt hringna khan nahlut-hnōm inchu ṭongpek-hei kha jui roh,” atipek.

18 # Sōk 20.13; Dân 5.17; Sōk 20.14; Dân 5.18; Sōk 20.15; Dân 5.19; Sōk 20.16; Dân 5.20 Mipa khan, “Hei ṭongpek-hei kha mo?” ati.

Jesu’n amasôn, “Mi that mak roh; jông mak roh; inru mak roh; dik loa mi demmak roh; 19#Sōk 20.12; Dân 5.16; Lev 19.18nanu napa kaja roh; khana nang nabinga na’nlungset kapōa nakhō naven lungset roh.”

20Rether khan ahnenga amasôn, “Hiva ṭongpek-hei seng hichu ke’n kahei juisa hei kae. Heimo kalavât aka-om?”

21Jesu’n ahnenga, “Pui mathluk sik namadu’n chu, se ina nanei rakip vajōr roh, sêr kha sara khōdeng katheihei vasempek hei roh, khana marvâna karōi nanei sik; khava sōa hong inna kakahnung ajui roh,” atipek.

22Rether khan kha athei pha malung inrimtak a kase jo ajârchu ama kha mi kaneitak kae.

23Jesu’n khava sōa asonlehei hneng, “Kadiktak a kahri pek chei kae, mikahao inkhat marvân Rengram ahlut sik hi intak hranghra. 24Ke’n kahri nôk: mikahao inkhat marvân Rengram ahlut sik kha ṭimphōi kōr a sharîngsei ahlut sik kanek a intak jôk a kae,” ati.

25Asonle he’n kha anthei pha, inlak ansak hêr jo. “Khan chu, tu hmen hukmanhring akachang tor sik jo?” tia ander.

26Khava pha Jesu’n kasang kanga a-en heia amasôn hei, “Mihring sik a chu kha chang tor mak, tâk Pathen sik a chu heirakip kachang tor,” ati.

27Khava sōa Peter kaṭonga ati. “Enroh, keini’n heirakip kandahlona kanjui che, keini’n heihmen kantachen sik?”

28 # Mt 25.31; Lk 22.30 Jesu’n ahnenga ahri, “Kadiktak a kahri pek chei kae, Khang athera Mihring Sapa khan alûrna leh alen in-ongna chunga a’n-ong pha nangni ani kajui 12 seng um Israel phung 12 hei chunga ṭong katan sik a reng in-ongna chunga a’n-ong sik chei kae. 29Khana tu achang inum a-inn, asōpuinu leh asōpuipa, anu leh apa khana asahei leh ahlei, kei sik jâra akadahlon mi khan araja kakhea ahmu sik, khana kumsôt hringna kha achen sik. 30#Mt 20.16; Lk 13.30Tâk tuna hmakakei mi katamtak in hnung ankhôr sik, khana tuna hnung kakhôr mi katamtak in hma ankei sik.”

Currently Selected:

MATTHEW 19: KOMRBSI

Highlight

Copy