LUKE 4
4
Jesu Mathlema A-om
(Mt 4.1–11; Mk 1.12–13)
1Jesu Jordan tuidunga inphut Rathla Intheng kasip phet a he’nle khana Rathla khan nêrdiram thōia aṭhōi jo, 2khava hmun a khan ni 40 Diabol in ama amathlema kae. Khava kanihei shunga khan ama’n heite sâk mak, khava jâra khava kanihei kha a’nchai pha ama avon leikaṭâm jo.
3Diabol in ahnenga, “Nang Pathen sapa nachang inchu, hiva hlunghei hi buhlom achangna sik ṭong pe roh,” ati.
4Jesu’n amasôn, “Ṭong intheng in, ‘Mihring hi buhlom vâng rōk hring tor mak.’”#Dân 8.3
5Diabol in ama aṭhōitoua hmitkhap kâra vânhnōi rengram rakip amanhmua kae. 6Diabol khan ahnenga ati, “Hiva ratha neina rakip leh haona rakip hi nang kapek sik che. Hihei seng hi kei kut a aka-om kae, tu enum ke’n kapek hnōm mi kha kakadeia kapek tor a kae. 7Nang in nakamuk eng inchu, hihei seng hi nangta akachang sik kae.”
8Jesu’n amasôn, “Rōngpu na-Pathen rōk kha nang in kamuk roh khana ama rōk kha razen roh, tia ṭong intheng in ahri.”#Dân 6.13
9Khava sōa Diabol khan ama Jerusalema aṭhōia Bek-inn chunga a’nshângpen hmun a amanonga ahnenga ahri, “Nang Pathen sapa nachang inchu, hinna inphut nang nabinga inchôm inthla roh, 10ajârchu ṭong intheng in ati, “Nang kaṭha ani ka-ensui sik a Pathen in angevahei ṭong apek sik hei,’ ati.#Hl 91.11 11Khan chu hing’hinum ahri, ‘Nakehei hlunga nasuk makna sik anmani’n ankut vâng anleirahlâng sik che.’#Hl 91.12
12Tâk-kha Jesu’n ama amasôn, ‘Ṭong Intheng in ahri, ‘Nang in na-Rōngpu na-Pathen kha enmansin mak roh.’”#Dân 6.16
13Diabol in Jesu kha ahlam rakip a amathlemsō pha, pha bongkhat sik a adahlon jo.
Jesu’n Galileea Aṭōn Aphutna
(Mt 4.12–17; Mk 1.14–15)
14Khava sōa Jesu Galileea he’nle jo, khana Rathla Intheng ratha hratna khan ama a-ompui jo. Khana khava ram pumpuia khan ama chungchâng ṭong inthangsō joa kae. 15Ama’n an-intûpna innheia amanthei heia, khana anmani seng in anmanpâk joa kae.
Jesu Nazareth a A’nle
(Mt 13.53–58; Mk 6.1–6)
16Khava sōa Jesu kha aseilenna Nazareth khōa kase jo, khana Châmhngat kani ning ama angaia intûpna inna leikase. Ṭong Intheng katei sik a kangirsōt jo, 17Isaiah sânkathem lekha kha anmani’n anheipek a, ama’n a’nze kha anmazera, hiva hmuntak hi aleitei:
18“Rōngpu Rathla kha kachunga ka-om,#Is 61.1-2
ajârchu sara khōdeng katheihei hneng ṭong kaṭha kahri sik a akadei jo eng.
Sura ka-om hei hneng masōna ṭong avakahri inthangle sik
leh hmitkachohei khō hmuna sik atir jo eng;
suk manrima ka-om hei masōna sik,
19khana Rōngpu’n amihei ahuk sōtna sik pha kha,
hong katlung jo tia kahri inthangle sik a atir jo eng.”
20Jesu’n lekha kha akaze malea, mi inzenle inkhat kut a apek a intung jo. Intûpna innpui shunga mi rakip in kasang kanga alei ena kae. 21Ama’n anhnenga ahri, “Ahe’n teisōt nantathei khan, hiva ṭong intheng bong hi tuning hui amathlung jo kae.”
22Anmani ankhenga ahnenga anmalung leikahlut et jo khana ama’n kathemtak a ahrina hei chunga inlak anleisak a kae. Anmani’n, “Ama hi Joseph sapa kha changmak mo?” anti.
23Ama’n anhnenga, “Inchêna kamanhret ti chu nangni’n hiva ṭongchîk, ‘Thempu nang nabinga indam roh,’ ti hi kei hneng nantalati sik kae. Khana Capernauma a’ntlo nantathei hei kha kakhōpuia hin tlo roh nantalati sik eng kae.” 24Jesu’n ahri nôk a, “Hivahi kamanthei chei kae, sânkathem inkhat akhō mi leh aram shung mi’n rahlâng phungmak hei.#Jn 4.44
25“Rangei ruh! Elijah phalai Israel kâra renghmeinu katamtak leika-om hei, kum 3 leh thla 6 khō leisûr mak khana ram pumpuia inhnaktak a sâk leikatâng ti hi akadik kae.#1 Rn 17.1 26Kha achang inum Elijah kha Sidon ram a Zarephath a renghmeinu inkhat hneng tei loa Israel shunga tûte hneng leitir mak a kae.#1 Rn 17.8-16 27Khana Elisha phalai khan Israel kâra kaphâr karôn katamtak leika-om hei; kha achang inum Syria ram a Naaman teilo tûte inkhatbek um le’nthengmak.”#2 Rn 5.1-14
28Intûpna innpuia aka-om mi rakip in hivahi anthei pha, ahnuk kana hêr jo. 29Khana anmani kathōi heia, Jesu kha khōpuia inphut ankeisōt a ankhōpui sakna tlâng lera ankei jo. Karekōkting nam mathlâk sik a anrei 30tâk mipui kâra inphut kasōk a ahlam ajōn jo.
Rathla Kaṭhamak Karôn Pase Inkhat
(Mk 1.21–28)
31Khava sōa Jesu Galilee ram a Capernaum khōpuia kasea Châmhngat kania ama’n mihei aleimanthei heia kae. 32Ama’n amanthei dânhei kha anlei mandonhla hêr, ajârchu ratha kaneitak a ṭong aleihria kae.#Mt 7.28-29 33An-intûpna innpuia khan ṭai kaṭhamak karôn pase inkhat leika-om; rasa inhnaktak a heika-ônga ati, 34“Eh Nazareth Jesu, keini heimo namanlo hnōm ung? Nang kankasuk inhmang sik a akahong che mo? Nang tu che mo ti ke’n kamanhret che: Nang a’ntheng Pathen ṭongkarôn che kae!”
35Jesu’n ṭai hneng ṭong apek a, “Sip ti roh, mipa khana inphut heisōk roh!” ati. Ṭai khan anhmai kunga ahlon mathlûk a khana heite suksetna neilo jena ama inphut leikasōk jo.
36Anmani seng in andet-hla a, inkhat in inkhat hneng, “Hihei hi heiṭong jo mo? Ratha kaneitak a leh ṭong inhnaktak a ama’n ṭai hneng ṭong apek a ahei kasōk hei hi?” inti hei. 37Khana Jesu chungchâng ṭong khava hmun rakip a inthang joa kae.
Jesu’n Mi katamtak Amandam
(Mt 8.14–17; Mk 1.29–34)
38Jesu’n intûpna innpui adahlona Simon inna leikase. Simon terpi kha hritluna inhnaktak a leikana, asonle he’n amanu nat ṭong anvahri pek a kae. 39Jesu ahnenga kasea ajekhum hnenga kangira, hritlun kha ṭong apek. Khana hritlun nat khan amanu amasō joa, inrangtak a kathōia arazen jo hei.
40Kani ahlutsō pha, mihe’n anṭim anre hrise jât-jât a akana rakip Jesu hneng anheiṭhōi hei; inkhat et chunga akut adapek heia amandam heia kae. 41Mi katamtak a inphut ṭai heikasōk heia, “Nang Pathen sapa che kae,” tia anlei-ôn.
Jesu’n ṭaihei kha ṭong apek heia manṭong mak hei, ajârchu ama Messiah kae ti kha anmanhret a kae.
Jesu’n Judea Ram a Ṭong Ahrile
(Mk 1.35–39)
42Khō ahong vâr pha Jesu’n khōpui kha adahlona abing rōk a kadâi hngera omna sik hmun a leikase, mihe’n ama anleijong, khana anhmu pha mansesōt makna sik a anleitlo. 43Tâk-kha ama’n anhnenga, “Ke’n khōpui ralak-heia son’um Pathen Rengram ṭong kaṭha hi kavahrile nger sik kae, ajârchu khava sik a Pathen in ajōngtir eng kae,” ati.
44Khava jâra ama’n Judea ram a intûpna innpui heia ṭong avahrilea kae.
Currently Selected:
LUKE 4: KOMRBSI
Highlight
Share
Copy
Want to have your highlights saved across all your devices? Sign up or sign in
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.
