LUKE 21

Renghmeinu Neitōk

(Mk 12.41–44)

1Jesu’n a-en manve heia Bek-inn shunga sêr manbukna mikahao he’n kutchoi antamathlâk kha ahmu hei, 2khana sara khōdeng kathei renghmeinu in peisa 2 amathlâk kha aleihmu. 3Ama’n ati, “Ke’n kahri pek chei kae, milak-hei seng tapek kanek a hiva renghmeinu tapek hin aja katam jôk. 4Ajârchu milak he’nchu akatam anneina shunga inphut anṭhensōt a antatōk kae; tâk amanu hinchu asara changa ahringna shunga aneiseng kha apek kae.”

Jesu’n Bek-inn Inhmang sik Ahrina

(Mt 24.1–2; Mk 13.1–2)

5Anmani kâra mi ṭhahrep khat in Bek-inn chungchânga anhria, Pathen sik a kutchoi pek hei leh hlung inne inkam hei hi heituk-hrep a akaṭha jo hei mo anti. Jesu’n ati, 6“Nangni’n nantahmu hlung rakip inkhatbek an-omna et a sukset loa indahlon mak ning; inkhat et a suk mathlâk sik hei kae.”

Suk manrimna leh Khōdeng theinahei

(Mt 24.3–14; Mk 13.3–13)

7Anmani’n ahnenga anhri, “Oja, khavakha heitik leh mo ajōng katlung sik? Khana khavakha asōk sik ting hei mêrchîkna mo aka-om sik?”

8Jesu’n ati, “Nangni mihe’n anhōn mathlâk makna sik chei insing thei ruh. Ajârchu mi katamtak in kei sik a ṭongkahri ung antia kahong sik hei, ‘Kei ama eng kha kae,’ khana, ‘Apha jōng katlung jo,’ anti sik. 9Tâk-kha juimak hei ruh; ajârchu khavahei kha hma inkeia ajōng kasōk nger sik kae; tâk khavakha pha a’nchaina lachang mak ning.”

10Khava sōa ama’n ahri nôk, “Ram inkhat leh ram inkhat, rengram inkhat leh rengram inkhat re intuk sik hei. 11Lingnu inhnaktak a innok sik, sâk kakhôk sik, natse hmun rakip a kasōk sik, ṭit ka-omtatak leh hme inlak bōirōk a hong kasōk sik. 12Hihei seng hi asōk mak hma, nangni ansur sik chei khana anmanrim sik chei; intûpna innheia ṭong tan sik a anpek sōt sik chei khana kurkhum a ankhum sik chei; kei jâra renghei leh vaikarônhei hmaikunga ankeimanhlut sik chei. 13Hivahi nangni sik a Ṭong Kaṭha hrina sik pha kaṭha kachang sik. 14Nanbinga heikhonga mo a’nhrung sik ung tia nan-Inreng makna sik a hmatak a malung insyem kaṭha ruh;#Lk 12.11-12 15ajârchu nan-inrepuihei tûte’n anmakhetor makna sik chei leh anmasônthei makna sik chei singna leh themna ṭong beisō ke’n kapek sik chei. 16Nangni nanpa he’n, nansōpui he’n, nanpare patung he’n, nanṭhōn he’n, mikut a anpek sōt sik chei; nangni ṭhahrep chu anthat sik cheia kae. 17Kei jâra nangni mi rakip in an-en kada sik chei. 18Tâk-kha nanlu chunga sam razang khatbek inhmang mak ning. 19Kahnet a ngir ruh, nanbinga inhuk sik chei.

Jesu’n Jerusalem Inhmang sik Ṭong Ahri

(Mt 24.15–21; Mk 13.14–19)

20“Remi he’n Jerusalem antakake khum nangni’n nanhmu pha a’nhmangna sik pha kahnai jo ti manhret ruh. 21Khava pha Judea ram a ka-om mihei hmebungting tlân hei rasoh. Khana khōpuia ka-om he’n khōpui kha dahlon hei rasoh; khan chu khava ram a vângtinga aka-om he’n khōpui shunga hlutmak hei rasoh. 22Ajârchu khava kani kha ṭong inthenga ale’nzet inhlut rakip hui atlungna sik ‘Karâk Ning’ kani akachang sik kae.#Ho 9.7 23Khava kanihei pha shunga nai kavonhei leh naidông kaneihei sik a heituk a ṭitpek aka-om sik mo! Hiva ram shunga hin ṭit ka-om dehlana jōng katlung sik, khana hiva mihei chunga Pathen hnuk natna jōng katlung sik a kae. 24Ṭhahrep chemjâm vâng anthat sik hei, khana ram rakip a sōk a ankei sik hei; anpha atluk mak kârseng Jât-hlop he’n Jerusalem kha antachōn rachi sik kae.

Mihring Sapa Jōngna sik

(Mt 24.29–31; Mk 13.24–27)

25“Kani leh thla khana ârsi chunga omchen inlak hong kasōk sik. Raleichung ram rakip mihei malung inrim sik khana tui-ôngpui leh tui in-nông rasa anṭit sik.#Is 13.10; Eze 32.7; Jl 2.31; Ṭph 6.12-13 26Raleichung pumpuia heimo ahong kasōk sik ti ṭitna khan inhmak sik hei; ajârchu marvân chunga ratha neina hei hi’m anngaia anhlam hrona inphut hnongsōt sik hei kae. 27Khava pha Mihring Sapa kha jōng inlâr sik, ratha kaneitak a leh kalûrtak a sumtuk chunga kajōng sik.#Dn 7.13; Ṭph 1.7 28Hivahei hi ajōngsōk inphut jo’nchu, ngir sōt ruh, nanlu radâk una khō thlir ruh, ajârchu nan-inhuk inhringna sik hong kahnai jo.”

Theichang Kunga Insena

(Mt 24.31–35; Mk 13.28–31)

29Khava sōa Jesu’n tekâk hi ahri pek hei, “Theichangkung leh thingkung ralak seng hi mandonsōt ruh. 30Thingbō heiso a’ndôna abō ahongcher nanhmu jo’nchu, khōlum kahnai jo ti nanmanhret. 31Kha leh in-anghrep a, hivahei hi ahon’phut jo’nchu, Pathen rengram kha jōng katlungbei sik jo ti nanmanhret sik.

32“Mandon ruh, tûnlaia mihei hi anthisō mak hma hiva rakip hei hi ajōng katlung sik kae. 33Marvân leh ralei chu inhmang sik, tâk kei ṭong chu inhmang mak ning.

Inrin ṭhak a Om sik Arangei

34“Insing thei ruh! Revei katamtak tlona sik rōk leh ju inruina sik khana hiva hringkhō sik a malung dongna khan nanbinga inpek inhlutmak ruh, akinchu khava Kani khan manhret manloa 35chângkap kapōa asurkhâk sik chei. Ajârchu ralei hmuntina mi rakip chunga hivahi ajōng katlung sik kae. 36Ajōng kasōk sik omchen heia inphut nanhringsōt torna sik leh Mihring Sapa hmaikunga ngir torna ratha nanchenna sik pha rakip a derṭhak una inrin ṭhak ruh.”

37Jesu’n ani tina Bek-inna aleimanthei ṭhak hei; tâk jân jân a chu kasesōt a Olive Tlânga vaka-om ria kae.#Lk 19.47 38Mi rakip hei kha jîngkâr hmatak Bek-inna aṭong hri inngei sik ahnenga kahong ri heia kae.

Currently Selected:

LUKE 21: KOMRBSI

Highlight

Copy