LUKE 20

Jesu Ratha Neina Chungchânga Ṭongder

(Mt 21.23–27; Mk 11.27–33)

1Jesu’n ni khat Bek-inn shunga Ṭong Kaṭha kha amanthei heia ahrilelai, thempu kalenhei leh Dân ojahei khana upahei inchun a kahong heia, 2ahnenga anhonghri, “Hivahei tlotheina sik heiratha mo nanei, amanthei roh? Hiva ratha hi tu’n mo apek che?”

3Jesu’n amasôn heia, “Tûn ke’n ṭong inkhat der chei rong. Amanthei ruh, 4John tui manhlutna ratha kha mihringa inphut mo a-emak leh Pathena inphut mo?”

5Anmani anbing rōk a ankâra inbe heia, “Heimo niti sik? ‘Pathena inphut’ niti’n leh kha, ama’n ‘Khan chu John kha heisa mo nanta taksen mak?’ ati sik me. 6Khana ‘Mihringa inphut’ niti’n leh kha, hinna ka-om mipuihei hin eini hlung vâng andenghlon sik me, ajârchu John kha sânkathem inkhat kae, ti hi anmani akahnōm et hei kae.” 7Khava jâra anmani’n anmasôna, “Ama khona inphut akajōng mo ti keini’n manhret mak ung,” anti.

8Khana Jesu’n anhnenga, “Ke’num heiratha neina vâng hihei hi katlo mo ti hrimak ning,” ati.

Vomhrui Rahōn Kasânhei Tekâk

(Mt 21.33–46; Mk 12.1–12)

9Khana Jesu’n mihei hneng hiva tekâk hi aleihri, “Mi inkhat vomhrui thei rahōn inkhat arahōna, khava thei rahōn kha mihei hneng asânsōt a, khava pha ama’n a-inn kha adahlona kase jo.#Is 5.1 10Vomhrui thei kha alōk pha ahongtluk jo pha, ama chen kalo sik a asōk inkhat aleitir jo. Tâk-kha thei rahōn kasânhei khan sōkpa kha anleivōk a heite pek loa antir male jo. 11Khava jâra ama’n sōk ahlop inkhat atir nôk a kae, tâk thei rahōn kasânhei khan ama’m anleivōk a, rahe kasetak a anleitloa, heite pek loa antirsōt jo. 12Khava pha ama’n sōk 3 tluknapa kha atir nôk a, thei rahōn kasânhei khan ama’m sungbi anleimanrôna, vângting anleihlonsōt jo. 13Khava pha vomhrui thei rahōn kapupa khan ahri, ‘Heimo ke’n katlo sik jo? Kasa hi tir jo rong, anmani’n soiloa ama hichu anleikaja sik!’ ati jo. 14Tâk-kha rahōn kasân he’n anhmu pha, inkhat leh inkhat inbek hei, ‘Ama hi rahōn kapupa sapa kae. Ama hi that jo rih, khana akarōi rakip einita kachang sik jo,’ anti. 15Khava jâra rahōn vângting anhlonsōt a anthat jo.

“Khan chu, vomhrui rahōn kapupa khan anmani heimo amanlo sik jo hei?” Jesu’n ader hei. 16“Ama kahong sik khana mihei kha athat sik hei, khana vomhrui rahōn kha mihlop hneng asânsōt sik jo,” ati.

Mihe’n kha anthei pha, “Kha changmak ning!” anti.

17Jesu’n anmani a-en heia ader hei, “Enchu, hiva ṭong intheng hi heitina mo?#Hl 118.22

‘Inn kasak he’n hnemna kase tia antahlonsōt hlung kha

akarôn pen chopui kha kachang jo.’

18Khava hlung chunga a’npai inthlûk rakip ahar-ahak a insukset sik, khana hlung khan tu mo inkhat chunga adehlon inchu vaiphin kapōa asuk mannōi sik a kae,” ati.

Ramsêrṭhei Chungchânga Ṭongder

(Mt 22.15–22; Mk 12.13–17)

19Dân ojahei leh thempu kalen he’n khava laitak a khan Jesu surna sik anmandona kae, ajârchu anmani dōina tekâk kha ahri kae ti anmanhret jo; tâk mipuihei kha anleiṭit heia kae. 20Khava jâra pha kaṭha anleihngâk a kae. Anmani’n mi ṭhahrep malung intheng inhlemsak sik a marûk a sêr anleipek hei, khana Jesu kha ratha kanei Rome vaikarôn kut a pek sōt theina sik ṭongderna vâng aṭhena akasursōt sik anleitir hei. 21Anmitir hei khan ahnenga ander, “Oja, nang in nahri leh namanthei hei hi akadik kae. Khana mi hmai kajalo jen a, ôtum kasea Pathen lungdo chunga akadik kha namanthei hei ti keini’n kanmanhret. 22Rome Rengkalen Caesar ramsêrṭhei pek sik leh pek mak sik hi nidân kadōi me mo kae? amanthei roh,” anti.

23Tâk-kha Jesu’n anmani lungthim tlo kha amanhret a, anhnenga ati, 24“Sêr inkhat amanhmu ruh, hiva chunga hin tu lim mo khana tu rahming mo a’nzet?” ati hei.

Anmani’n, “Rengkalen Caesar ta kae,” tia anmasôn.

25Ama’n anhnenga, “Chu achang inchu Caesar tâ kha Caesar hneng pek ruh, khana Pathen tâ kha Pathen hneng pek ruh,” ati hei.

26Khava mihei hmaikunga khan chu heikhat bek a leisur tor mak jo hei, aṭong masôn hei kha andet-hla joa sip anleiti jo.

Thina Inphut Thōi nôkna Ṭongder

(Mt 22.23–33; Mk 12.18–27)

27Sadducee ṭhahrep, thina inphut thōi nôkna omak kati loihei, Jesu hneng kahong heia anhri,#Ṭōn 23.8 28“Oja, keini sik Moses’n hiva dân hi aleimazet: ‘Mi inkhat in nuhmei inkhat aleineia sa neiloa athi dea adahlon jo’nchu, asōpuipa khan, asōpui akathipa sa kae ti a’nhret thei sik a, sa amanneina sik nuhmei kha a-ompui nger sik kae.’#Dân 25.5 29Pha khat a unai sōpui pase 7 leika-om hei, upapen khan nuhmei inkhat anei jo, khana sa neiloa ama kathi jo. 30Khava sōa 2 tluknapa leh 3 tluknapa khan, 31nuhmeinu kha abân bâna an-ompuia 7 hei kha in-ang et a sa neiloa khanga kathisō jo hei. 32Achaina pena nuhmeinu kha’m kathi jo. 33Tûnchu, thōi nôk ning amanu kha tupen nuhmei mo akachang sik jo? Amanu leh kha pase 7 he’n anta-ompui et kae!”

34Jesu’n amasôn hei, “Hiva khanga hin pase leh nuhmei ka-om hei, 35Tâk-kha akajōng sik khang shunga akahring sik a, thina inphut a akathōisōt sik rahōi kasōk pase leh nuhmeihei khachu lu hôngmak hei ning. 36Anmani marvân ngeva ka-ang sik hei khana thithei mak hei ning, Pathen sahei kae ajârchu thina inphut akathōi jo hei kae. 37Moses’n akathihei kahringa kathōisōt sik hei ti hi inthengtak a amanchêna kae. Thingbura hmei kasûk ṭong inzetna khan ama’n Rōngpu kha, ‘Abraham Pathen, Isaac Pathen, Jacob Pathen kae,’ ati.#Sōk 3.6 38Ama hi akahring hei Pathen kae, akathihei Pathen changmak, ama hneng chu mi rakip akahring hei kae.”

39Dân oja ṭhahrep in anhrisōt, “Oja, ṭong masôn kaṭhatak inkhat kae.” 40Ajârchu anmani’n Jesu kha kangamtak a ṭong dertor mak jo heia kae.

Messiah Chungchânga Ṭongder

(Mt 22.41-46; Mk 12.35–37)

41Jesu’n ader hei, “Messiah kha David sōn kae, heikhong mo a’nti thei sik? 42Ajârchu David khet in hlarabu shunga hinga ahri,#Hl 110.1

‘Rōngpu khan ka-Rōngpu hneng ahri:

Na’ndōipui hei nake chōnpha a kadamak kârseng

43Kachangting hin in-ong roh.’

44Khang’khan David in, ‘Rōngpu,’ ati’nchu, heikhong mo Messiah kha David sōn akachang thei sik?”

Dân Ojahei Kadōia Jesu Mansena

(Mt 23.1–36; Mk 12.38–40)

45Mipuihei seng in aṭong hri kha anrangeilai, Jesu’n asonlehei hneng aleihri, 46“Dân ojahei, anzakkō inse annei pum a akalôn hnōm hei, jōrtlâng hmun a mihe’n kajana chibei antapek sik a indu hei, khana intûpna innpui leh reveina hmun a in-ongna kalûrpen indu heia inphut insing thei ruh; 47anmani’n renghmeinu hei inn leh annei anchom pek hei, mihei tahmu sik a kasôt tatak a derna annei! Anmani karâkna chen sik kha akakhôk pen sik kae.”

Currently Selected:

LUKE 20: KOMRBSI

Highlight

Copy