ṬŌNTLOHEI 23

1Sehmang-pachonghei kha Paul in kasang kanga a-en heia ahri, “Eh kasōpui Israelhei! Pathen hmit-hmua tuning katlunga kahringna hlam hro chungchânga kamalunga dik leh dikmak ṭhen theina hi pui katluk a la’ntlam senga kae.” 2Thempu Kalen Ananias khan Paul hnengtak a akangir hei hneng abei kha ankaben pekna sik ṭong aleipek hei. 3Paul in ahnenga atipek hei, “Pathen in arachâk nger sik che, nang, alâr kabang inno bang! Dân dungjuia kei ṭong katan sik a khava hmun a khan in-ong che, tâk kei kabenna sik ṭong napek hei jâra nang jôk in dân nasuk khōi jo!”#Mt 23.27,28

4Paul hnengtak a ka-ompa khan ahnenga ati, “Pathen Thempu Kalen hi nang in nateitôm kae!”

5Paul in amasôn, “Kasōpui Israelhei, ama hi Thempu Kalen achang ke’n manhret mak enga kae. Ṭong intheng in hing’hin ahri, ‘Namipui vaikarônhei chunga ṭongse nahri hêrmak sik kae.’”#Sōk 22.28

6Mipuihei kha ṭhahrep Sadduceehei khana ahlop khat in Phariseehei anchang kha Paul in ahmu sōt pha, Sehmang-pachong intûpna kâra khan ka-ônga ati, “Kasōpui Israelhei! Kei hi Phariseehei sapa Pharisee eng kae. Akathi kathōi nôk sik tia inhōrna kanei jâra hiva hmun a hin kaṭong antan eng hi kae!”#Ṭōn 26.5; Phl 3.5

7Hivahi ahrisō tak leh, Phariseehei leh Sadduceehei kha inkhe inphut jo hei, khana mipui kha rup hnia inṭhen jo hei. 8(Ajârchu Sadducee he’nchu mi kathi hi thōi nôk mak ning, ngeva a-emak leh rathla hi om mak anti, tâk Pharisee he’nchu an-inthum bât a hin antaksen.)#Mt 22.23; Mk 12.18; Lk 20.27 9Anrasa inshâng det-det joa Pharisee rup kâra ka-om dân oja ṭhahrep kangirsōt heia anhnōm makna hing’hin rahnak a anleiphông: “Hiva mipa chunga ṭhena heite hmutor mak ung! Rathla a-emak leh ngeva inkhat in amanṭong khet um kachang thei!”

10An-inkhena kha ahong inhnak jo pha akinlamchu Paul kha ahar-ahak a ankeirachen sik tia rehlam kakeipa kha leikaṭi jo. Khava jâra sepeihei kha khava rup kâra anhlut leh Paul kha anvaṭhōina sik leh rekur shunga anṭhōi manhlutna sik a ṭong apek jo hei.

11Khava jân a khan Paul hneng Rōngpu jōng kangira, “Ṭitmak roh! Hiva Jerusalem hmun a hin kasâkhi napek jo, khana hiva kapō tlit a Rome a’m nalatlo sik kae,” aleitipek.

Paul Thatna sik Ṭōnmantluk

12Ajîng kania Jehudi ṭhahrep intluk heia marûk a ṭōn inkhat anmantluk jo. Anmani’n Paul hi anthatsōt mak kârseng chu heitete sâk mak ning khana inmak ning tia intepna anleinei jo. 13Khava ṭōn intluk hei kha ankhenga mihring 40 kakhe hei kae. 14Khang’khan anmani thempu kalenhei leh upahei hneng kase heia anleiti, “Paul hi kanthatsōt mak kârseng chu heite sâk mak ning tia inhnaktak a intepna kannei jo. 15Tûnchu nangni Sehmang-pachong in a’nchênchet ṭong kajongsōt hnōm tia manhlem-una Paul kha sepei hlamkakei pa’n aheiṭhōisōtna sik a ṭong manrôn ruh. Tâk-kha hiva hmun aheitlung pha a, hlam kâra akathat sik a le’ntluk dek sik ung.”

16Amirōkchu khava anṭōn mantluk kha Paul unu sapa, atupa’n marûk a aleithei jo; khava jâra rekur shunga kahlut a Paul hneng ahri pek a kae. 17Khava pha Paul in sepei ṭōnpui karôn inkhat abek a ati, “Hiva rether naipangpa hi rehlam kakeipa hneng ṭhōi ruh, ama’n heimo khat hripek hnōm anei.” 18Ṭōnpui karônpa khan rehlam kakeipa hneng aṭhōia ati, “Nimi khumpa Paul in abek enga hiva rether naipangpa hin nahnenga hrihnōm anei, ṭhōi manhlut roh, tia ngekna aninei eng.”

19Rehlam kakeipa khan akut a akeia, ahlopdet a aṭhōisōt a ader, “Heimo hripek sik enga nahong rôn?”

20Ama’n ati, “Jehudi vaikarôn he’n ṭong manhlemna anneia achungchânga a’nchênchet manhretsa hnōm Sehmang-pachong he’n anlanei, nang in Paul hi ajîng kania aheiṭhōisōt pek roh tia nahnenga ani kader sik a inhnōmtō jo hei. 21Tâk-kha anṭong rangei pek mak hei roh, ajârchu hlam kâklak a ale’nthup a aleikahlō sik pase 40 inhleia ka-om hei. Anmani khan ama hi anthatmak kârsenga bu um sâk mak sik khana tui um inmak sik tia intep jo hei. Tûnhin anmani intlukdek a ka-om jo hei khana nang ṭong mathlâk sik rōk antahngâk jo kae.”

22Sepei rehlam kakeipa khan, “Hiva kahnenga naṭong thangkōi hi tûte hneng hrisōt mak roh,” atipek. Khana rether naipangpa kha atirsōt jo.

Ram vaikarôn Felix hnenga Paul Antatir

23Khava sōa rehlam kakeipa khan sepei ṭōnpui karôn 2 abek heia ati, “Caesarea a kase sik a sepei 200, shakor remi 70 leh kasei remi 200 mantluk una tûnjân pungkōa ke kathonsōt sik a mantluk hei ruh. 24Ram vaikarôn Felix hneng kadam senga mantlungna sik Paul tachōng sik shakor ṭhahrep pek ruh.” 25Khava sōa rehlam kakeipa khan lekha manrôn sik hing’hin aleimazet a kae: 26“Claudius Lysias in Lulenpui ka-om, ram vaikarôn Felix hneng: Chibei kahei pek che. 27Hiva mipa hi Jehudi he’n ansura that sik anleirei. Rome mi achang kamanhret sōt jâra kasepeihei leh kase unga kanva sansōt. 28Maset antapekna kha kamanhret hnōm jâra an-uparup intûpna kaleiṭhōi jo. 29Kurkhum a da sik leh thina sik a rahōi kasōk tloṭhe heite neimak ti kha kaleihmusōt; ama anmasetna hichu anbing dân chunga kae. 30Khana ama kadōia ṭōnmantluk annei jo tina ṭongmarûk kathei lim leh nahnenga heitir sik a kamandon jo kae. Ama chunga masetna kapek hei hneng na-ângkunga anva maherna sik a kahri pek jo hei.”

31Ṭong a’npek hei kapōa sepei he’n antlosōt jo. Khava ning jânbât a khan Paul kha anṭhōia Antipatri katlung anmathlung jo. 32Ajîng kania ke-remihei kha rekurting hong inle jo hei khana shakor remihei khachu ama kasepui sik a anhei dahlon jo hei. 33Anmani’n Caesarea katlung anleiṭhōi, lekha manrôn kha ram vaikarôn hneng anpek, khana Paul kha’m akut chunga anmanngan jo. 34Lekha manrôn kha ram vaikarôn in ateia khana Paul kha hei ramṭhen a che mo tia aleider. Ama kha Cilicia ram a inphut kae ti kha amanhretsōt pha, 35ama’n atipek, “Maset nakapek hei anheitlung pha leh naṭong hri karangei sik jo.” Khava sōa ram vaikarôn innpuia Paul kha antahngâk a antada sik a ṭong apek jo hei.

Currently Selected:

ṬŌNTLOHEI 23: KOMRBSI

Highlight

Copy