ṬŌNTLOHEI 22

1“Kasōpui Jehudihei, nan-ângkunga hiva ka’nhrungna ṭong hi arangei pek ruh!” 2Hebrew ṭonga aṭong kha anthei pha, anrasa kadaichet jo; khang’khan Paul in amanjōm:

3“Kei hi Cilicia ram a Tarsus khōpuia a’nte Jehudi eng kae, tâk Gamaliel hnenga them inchu inkhat a hiva Jerusalema hin sei hong kalen eng. Tuninga hiva hmun a aka-om nangnihei seng kapōa Pathena a’npesōt, nipusōnhei dân hi kahnettak a mantheina ahong kachen inkhat eng kae.#Ṭōn 5.34-39 4Hinghiva Hlam a akase hei kha thina katlunga suk manrimna kaleipek hei. Nuhmei leh pase kasur heia kurkhum shunga kaleikhum hei.#Ṭōn 8.3; 26.9-11 5Kahri hi ṭongtak khet kae ti hi Thempu Kalen leh Sehmang-pachong rakip in anhri manchên tor. Damascus a ka-om nisōpuihei hnenga manrôn sik lekha anmania inphut kaleirahlâng, khava jâra khava hmun a ka-om hei kha vasur heia karâkna pek sik heia Jerusalema thirhrui vâng anvakakei inle sik a leikase eng.

Paul Hringkhō Hong-inthleng Ahrina

(Ṭōn 9.1–19; 26.12–18)

6“Khang’khan kase enga Damascus kaphâk sik ting, sûnṭim radona manhret manloa thangvâna inphut vâr inhnaktak inkhat in kakimve ajōng kakhōa kae. 7Raleia katlu enga karesō inkhat in, ‘Saul, Saul! Heisik a mo nasuk manrim eng?’ ati kha kalei thei. 8‘Tu che mo, Rōngpu?’ tia kaleider. ‘Nasuk manrim Nazareth Jesu eng kae,’ kahnenga aleiti. 9Ka’nṭhōipui mihei khan vâr khachu anhmu, tâk kahnenga ṭongkahri karesō khachu leithei mak hei. 10‘Rōngpu, heimo katlo sik jo?’ tia kader pha Rōngpu’n, ‘Inding ina Damascus a se roh, khana khava hmun a khan Pathen in natlo sik amantluk pek che rakip kha anhri pek sik che’ anileiti pek eng. 11Vâr kha a’nhnakrei jâra khō leihmu mak eng, khava jâra kaloihei khan Damascus katlung kakut a anileikei eng.

12“Khava khōpuia khan nidân kajui khana inshângtak a kajana antanei bektinga malung kahlut, Ananias inti mi inkhat leika-om. 13Ama kha kahonga, kasira kangira, ‘Sōpui Saul, khō hmu nôk jo roh!’ ati. Khava phatak a khan khō kahmu nôk jo khana ama kha kalei-ena kae. 14Ama’n, ‘Nipusōnhei Pathen khan alungdo inhret sik a, akadik Asōkpa akahmu sik a leh akaresōkhet a aṭong hri kathei sik a akadeisōt jo che kae. 15Khava jâra nahmu leh nathei rakip hi mi rakip hneng nahria asâkhi akachang sik jo che kae. 16Achang inchu tûnhin, heisik a mo phat nalahngâk sôt sik? Thōi inna tuihlut jo roh khana ahnenga derna vâng nasetnahei, insuk intheng jo roh.’

Jât-hlop hei hneng ṭong Kahrile sik Paul Bekna

17“Jerusalema inle nôk enga, Bek-inna derna kaneilai, hmangtalâr inkhat kaleihmu, 18khana khan, ‘Inranga Jerusalem dahlon jo roh, ajârchu hiva hmun a ka-om mihei hin kei chungchânga sâkhi napek hi rahlâng mak hei ning,’ tia Rōngpu’n ahri pek eng. 19Ke’n kalei masôn, ‘Rōngpu, intûpna innpui heia kase enga natakkasen hei kasura kalei vōk hei kha anmani’n kaṭhadek a anmanhret. 20Khana nasâkhi akapek Stephen anleithat lai khan kei khet um athatna sik kha kaleihnōma khana akathat-hei pōn leh der kha ke’n kalei hngâkpek heia kae.’#Ṭōn 7.58 21Rōngpu’n kahnenga, ‘Se roh, ajârchu ram kahlatak a Jât-hlop hei hneng katir sik jo che kae,’ ati eng.”

22Paul in hivahi ahri mak hma katlunga khan chu anleirangei; tâk hiva ahei hrisōttak a inphut chu ankare neisûn sûna, “Ṭhōisōt ruh! That ruh! Ama hi akahring sik rahōi changmak jo!” tia ông inphut jo hei. 23Leikapeng hei, anpōn ankalek khana chungting vuibō ankathek a kae. 24Rome rehlam kakeipa khan amihei hneng Paul kha rekur shunga anṭhōi manhlutna sik ṭong apek hei khana ama kadōia Jehudihei khang’khan anpengna ajâr manhret sōtna sik a vōk ruh tia aleihri pek hei. 25Tâk-kha ama kha vōk sik a anleikhit lai khan ahnenga aka-om ṭōnkarôn hnenga Paul in ader hei, “Rome milai inkhat aṭhena heikhat chunga aṭongbek um ala’ntan mak hma nantavōk sik hi dân mo kae?”

26Hivahi ṭōnkarônpa’n athei pha, rehlam kakeipa hneng kasea, “Heimo natlo jo? Sova mipa so Rome milai kae!” aleitipek.

27Khava pha rehlam kakeipa kha ahnenga kasea ader, “Nang hi Rome milai akachang che mo, ahri pek roh?”

“Ôk” tia Paul in aleimasôn.

28Rehlam kakeipa khan ati, “Ke’m sêr katamtak kapek a khava kapō inkhat akachang eng kae.”

Paul in amasôn, “Tâk-kha kei chu ka-intet a inphut akachang eng kae.”

29Kha anthei pha Paul ṭong kader sik mihei kha ankahnungting inkâi jo hei; khana thirhruia aleikhōp Paul kha Rome ram mi achang anmanhretsōt pha, rehlam kakeipa kha leikaṭi joa kae.

Sehmang-pachong Ângkunga Paul Angir

30Jehudihei khan Paul kha heipena mo antamaher ti kha rehlam kakeipa khan amanhret manchên hnōm; khava jâra ajîng kania Paul inkhōpna thirhrui kha asōt a khana thempu kalenhei leh Sehmang-pachong rakip an-intûpna sik ṭong aleipek hei. Khava sōa Paul kha aṭhōia an-ângkunga aleimanngira kae.

Currently Selected:

ṬŌNTLOHEI 22: KOMRBSI

Highlight

Copy