ṬŌNTLOHEI 10

Peter leh Cornelius

1Caesarea hmun a khan, “Italy Regiment” tia inhret Rome sepei Captain, arahming Cornelius inti mi inkhat leika-om. 2Ama kha beklang tinga malung kahluttak inkhat kae; ama leh a-innshung mi pumpui in Pathen anleikamuk. Sara khōdeng kathei Jehudihei kha atlo theina chenna ale’nthōpui hei khana Pathen hneng um aleider ṭhak. 3Ni khat khōhlei pung 3 radona hin hmangtalâr inkhat aleinei, khava hmangtalâra khan Pathen ngeva jōng kahlut a, “Cornelius” tia aleibek kha inchêntak a aleithei.

4Ṭitpum a ngeva kha a-en kanga, “Heimo kae, apu?” aleiti.

Ngeva khan ati, “Naderna leh nami bômna ṭōn chunga Pathen malung katlai jo, khana masôn sik chea intluk jo. 5Khana tûnhin Joppa khōa ka-om, mi inkhat, arahming kaseia Simon Peter intipa kabek sik a mi tir hei roh. 6Ama hi tui-ôngpui panga ka-om shavun kasyempa, Simon intipa inna khōhmea akatlung kae.” 7Khava sōa chu ngeva kha kasesōt jo, khava pha Cornelius in akahngâk sepeihei kâra bektinga malung kahlut mi inkhat leh asōk 2 aleibek hei. 8Ṭōn kasōk hei kha ahri pek hei khana Joppa kajōn sik a aleitirsōt jo hei.

9Ajîng kania khanga anselai Joppa lang anhnai jo, sûnṭim radona Peter kha derna kanei sik a innphu chunga leikake. 10Avon hongkaṭâm joa heikhat aleisâk hnōm jo; bu leh thlai ansōng laitak hmangtalâr inkhat aleinei. 11Ama’n marvân ahe’n hlânga arakir manlia a’nkhit apheng kalentak kapō heimo inkhat hi raleia ahe’nkhei inthla aleihmu. 12Khava shunga khan ranhring rakip, bok a insôn rakip khana va rakip leika-om hei. 13Rasa inkhat in, “Thōi roh, Peter, that hei inna sâk roh!” ati.

14Tâk-kha Peter in, “Changmak, Rōngpu! Bek ngaia a’nthengmak a-emak leh akabōk hei sâkphung mak eng,” ati.

15Rasa khan avea, “Hei-hei achang inum Pathen in intheng jo tia aphôngsōt jo hei kha a’nthengmak a mandon mak jo roh,” ati. 16Khang’khan vōi 3 inlâra khava sōa chu marvânting le’nlotou jo.

17Hiva hmangtalâr hi heitina jo mo tia Peter in amandonhla laitak, Cornelius tahei tir mihei khan Simon inn kha anhei jongsōt joa, kekot kunga leikangir jo hei. 18Anmani ka-ông heia, “Simon Peter inti khōhmepa kha hin aka-om mo?” tia ander.

19Hmangtalâr kha heitina tâk mo akachang sik tia Peter in amandon laitak Rathla khan, “Rangei roh! Nakajong mi 3 hin ka-om jo hei. 20Khava jâra intluk ina ṭumsuk roh, khana anmani leh sesap sik hi inkei-chio mak roh, ajârchu anmani hei hi kei tahei tir hei kae,” atipek. 21Khava pha Peter kaṭumsuk a mihei hneng khan, “Nanta jongpa kha kei eng kae. Heisik a mo akahong chei?” ati.

22Anmani’n anmasôn, “Captain Cornelius tahei tir ung kae. Ama hi Pathen inmuk leh mikaṭha khana Jehudi mipui in inshângtak a kajana antanei mi inkhat kae. Naṭong hri arangeina sik nang hi a-inna abekna sik che Pathen ngeva’n aleihri pek kae.” 23Peter in abek manhlut heia khava jân khachu khava hmun a anrek sapna sik a aleikhâm jo hei.

Ajîng kania intluk a kasesap jo hei. Khana Joppa a ka-om takkasen ṭhahrep inum akahnung anleijuia kae. 24Abân kania Caesarea katlung jo hei, Cornelius khan a-innkōhei seng leh aṭhōn marit hei seng aleibek mantûp heia aleihngâk ṭhak heia kae. 25Peter kha aheihlut sik ting Cornelius in avaratōa, akekunga inkuna kajana chibei aleipek. 26Tâk-kha Peter in akei mathōia, “Inding roh, ke’m mihring inkhat-hrep eng kae” ati. 27Peter in Cornelius kha khanga a’nbekpuia innshunga aheihlut pha, mi katamtak anle’nkhôm kha ahmu jo hei. 28Ama’n anhnenga ati, “Jehudi inkhat in Jât-hlop hei avaphak sik hei a-emak leh a’nthloppui sik hei hi apathen ôi dân in phemak ti hi nanmanhret pet. Tâk-kha tu inkhat hi beklanga a’nthengmak a-emak leh akabōk kae tia kamandon makna sik a Pathen in animanhmu jo eng. 29Khava jâra kakabek a nantahei tir hei kha makheloa kahei jui jo hei kae. Khan chu, kader chei, heisik a mo kakabek nantahei tir hei?”

30Cornelius in ati, “Ni 3 kathleng jo, tûn pha radona, khōhlei pung 3 a hiva ka-inna hin derna kaleinei. Sōkphutrōia pōn kavâr kasi pase inkhat kahmai kunga hong kangira, 31‘Cornelius! Naderna kha Pathen in athei pek jo che khana nami bômna hei kha’m amanhret pek jo che. 32Joppa hmun a ka-om arahming kaseia Simon Peter inti mi inkhat hnenga sik tu mo inkhat tir roh. Ama kha tui-ôngpui panga ka-om Simon mama anti, Savun kasyempa inna khōhmea akatlung kae. 33Khava jâra inrangtak a nakajong kahei tir hei kae, khana mankhôksak tak a najōng pek jo eng. Tûnchu Rōngpu’n nahri sik a amanthei che rakip inngei sik a Pathen ângshunga kankhenga ka-om jo ung.”

Peter Ṭonghri

34Peter in hing’hin aṭong hri aphut jo: “Pathen in mi rakip hi in-ang et a a-en me ti hi adikje tûnchu inchêna kamanhret sōt jo.#Dân 10.17 35Tu jât-jât um chang rasoh ama inmuk leh akadik katlo rakip kha ama sik a rahlângthei kae. 36Heirakip Rōngpu, Jesu Christa a inphut mōngna ṭong kaṭha Israelhei hnenga a’nphôngsōt kha nangni’n nanmanhret jo. 37Tuihlut chungchânga John mantheina a’nchaisōa Galileea inphut ahe’nphut a Israel ram pumpui chunga ṭōn kalentak aleikasōk kha’m nanmanhret jo. 38Nangni’n Nazareth Jesu chungchâng khana heikhong mo achunga Pathen in Rathla Intheng leh ratha neina aheibun mathlâk pek ti hi’m nanmanhret jo. Hmun rakip a ama kasea ṭōn kaṭha aleitlo khana Seitan ratha neina thōia ka-om rakip aleimandam hei, ajârchu ama kha Pathen in aleiompui. 39Jerusalem leh Israel ram pumpui shunga aṭōn leitlo inhret inchênkhet hi keini ung kae. Khang’khan ama kha thingrakea anhem mankop a anleithat jo. 40Tâk-kha ni 3 sōa Pathen in thina inphut aleikei mathōi, 41amirōkchu mi rakip hneng changloa asâkhi kachang sik a Pathen in akadeisōt, keini hei hneng aleimalâr, thina inphut athōisōt sōa khan bu leh thlai kanleisâksap pui jo. 42Mi rakip hnenga ṭong kaṭha kaphông sik khana akathi leh akahring hei ṭong katan sik kha Pathen in ama hi amanṭang jo tina sâkhi akachang sik a ṭong pekna anei ung. 43Tu achang inum ama taksenna kanei rakip hei setnahei kha arahming ratha neina jâra rangei mandam anchen sik tia ama chungchânga sânkathem rakip in anta leihridek jo kae.”

Jât-hlop he’n Rathla Intheng Antachen

44Khang’khan Peter in ṭong ahrilai, aṭong hri inngeia ka-om mi rakip chunga Rathla Intheng jōng kaṭum jo. 45Jât-hlop hei chunga’m Pathen kutchoi pek, Rathla Intheng ajōng bun mathlâk kha Joppa inphut Peter leh ale’nṭhōipui takkasen, Jehudi he’n anhmu pha inlak anleisak hêr jo. 46Ajârchu ṭonghlop a akaṭong heia Pathen lenna antachoi ka-ân kha anmani’n anleitheia kae. Khang’khan Peter in: 47“Eini chunga ajōng katlung kapōa, hiva mihei hinum Rathla Intheng hi anchen jo. Tuihlut sik a inphut tu inkhat in akhâmtor sik hei mo?” aleiti. 48Khava jâra ama’n anmani kha Jesu Christa rahminga tuihlut anchenna sik ṭong apek jo hei. Khava jâra kanikhō ṭhahrep ala-ompuina sik heia ngekna anleineia kae.

Currently Selected:

ṬŌNTLOHEI 10: KOMRBSI

Highlight

Copy