ṬŌNTLOHEI 11

Jerusalem Bekrup hnenga Peter Ṭongphông

1Jât-hlop he’num Pathen ṭong hi anchen jo ti hi Judea ram pumpuia ka-om Sonlehei leh alak takkasen he’num anleithei jo. 2Peter kha Jerusalema avase pha, Jât-hlop hei sik a’m vuntan arangei tia akahnōmloi he’n anmaset a anti, 3“Nang hi vun katanmak hei inna akatlung che rōk changloa thlai katlung um nalei sâkpui hei!” 4Khava jâra Peter in omchen kasōk rakip kha akunga inphut aleihri pek jo hei.

5“Joppa khōpuia ke’n derna kaleineilai, hmangtalâr inkhat kaleinei. Ke’n arakir 4 a a’nkhit apheng kalentak kapō, heimo inkhat hi marvâna inphut ahe’nkhei inthla kahnengtak a a’nhnga kaleihmu. 6Ashunga ka-en manchên pha, inna ranhei, ramshahei, bok a kalôn hei leh vahei kaleihmu hei. 7Khava pha rasa inkhat in kahnenga, ‘Thōi roh, Peter; that hei inna sâk roh!’ aleiti eng. 8Tâk-kha ke’n, ‘Changthei mak ning, Rōngpu! Bek ngaia a’nthengmak leh akabōk him-him hei hi kabeia thlai lahlut phungmak,’ kalei ti. 9Rasa khan marvâna inphut avea, ‘Hei-hei achang inum Pathen in intheng jo ati jo kha a’nthengmak a mandon mak roh’ aheiti nôk. 10Hivahi vōi 3 atisōa akhenga marvânting ṭhōisōt a leika-om jo. 11Khava phatak a khan Caesarea a inphut kei hnenga sik a anta heitir mi 3 hei kha kalei omna inn heikatlung jo hei. 12Malung inkei-chiona kasea kajuina sik heia Rathla khan aleihri pek eng. Hiva takkasen sōpui 6 hei hin Joppa inphut anjui unga Caesarea a ka-om Cornelius inna leikase ung. 13Ama’n ‘Joppa a ka-om arahming kaseia Simon Peter intipa hneng mi tir roh,’ tia akahri pek ngeva kha a-innshunga kahonga ajōng kangir aleihmuna kha ahri pek ung. 14‘Ama’n ahri pek sik chei ṭong vâng khan nang leh na-innshung nankhenga hukmanhring nanchen sik,’ tia aleihrina kha’m ahri peksa ung. 15Khana ke’n ṭonghri kahei phut pha, aphutna pet a eini chunga ajōng katlung kapōa, anmani chunga’m Rathla Intheng kha jōng kaṭum jo. 16Khava pha Rōngpu’n, ‘John inchu tui vâng tui hlutna atlo chei, tâk nangni chu Rathla Intheng vânga manhlut akachang sik chei kae,’ aleiti kha kamandonsōt jo.#Ṭōn 1.5 17Rōngpu Jesu nitaksen jâra apek me khava kutchoi leh in-anghrep kha tûnchu Pathen in Jât-hlop he’m apek jo hei ti hi inchên jo; kei hi tu mo akae enga, Pathen kha kakhâm tor sik!” ati.

18Hivahi anthei pha anṭong masetna kha kahai jo hei khana Pathen anchoi ka-âna, “Pathen in Jât-hlop hei hneng kapha malung thlengna leh hringna pha apek jo hei,” anti jo.

Antioch a Bekrup

19Stephen anthat lai suk man-rimna’n amanchek chai takkasen ṭhahrep hei kha Phoenicia, Cyprus, khana Antioch katlunga leikase heia Jehudihei hneng rōk ṭong anleihri.#Ṭōn 8.1-4 20Tâk-kha Cyprus leh Cyrenea inphut akava takkasen alak-hei khan chu, Antioch a kase heia Rōngpu Jesu chungchâng leh ṭong hi Jât-hlop hei hneng um anleiphôngle jo. 21Rōngpu ratha hratna’n a’nthloppui heia, mi katamtak in taksenna anleinei khana Rōngpu langting he’nhe jo hei.

22Khava ṭong kha Jerusalema ka-om Bekrup atlung jo pha, Barnabas kha Antioch a anleitir. 23Avatlung jo pha mipuihei chunga Pathen in mahâmṭhat abukna hei avahmu sōt a inpâk hêr jo, khava jâra anmalung pumpui vâng Rōngpu sik a hlamrinthei leh akadik anchangna sik a aleimathok hei. 24Barnabas kha Rathla Intheng leh taksenna kasip mikaṭha inkhat kae, khana ama’n mi hingja Rōngpu hneng aheiṭhōi manhlut heia kae.

25Khava sōa Barnabas kha Saul kajōnga Tarsusting kase jo. 26Ama’n avahmu pha, Antioch ting aleiṭhōia kum khat katluk set a an-inhnia Bekrup mipuihei anle’nhmupui hei khana rup kalen he’m anleimanthei hei. Takkasenhei kha Christian tia bekna masa pen hei hi Antioch a inphut kae.

27Khava pha shunga khan sânkathem ṭhahrep Jerusalema inphut Antioch a leikase hei. 28Ankâra inkhat Agaba intipa kha, hong kangira raleichung pumpuia ṭâmpui inhnaktak ajōng kasōk sik kae tia Rathla hratna inphut aleisânsōt. (Hivahi Claudius in Caesar achang shunga aleikasōk kae).#Ṭōn 21.10 29Khava pha Sonlehei khan Judea a ka-om ansōpui, takkasenhei inthōpuina sik a antator kakham manrônna nei sik a inhnōmtō et jo hei. 30Khang’khan antlosōa, khava sêr kha Bekrup upahei sik Barnabas leh Saul kut a anleimanrôn jo hei.

Currently Selected:

ṬŌNTLOHEI 11: KOMRBSI

Highlight

Copy