MAK 9
9
1Hana Arengpu na manita rilleh, “Keina adiek rou nangei kolla ril inge. Hina am ahre chu Chungthieng rengram na ane jaitha tolla jung malim ma athi ti dangpha ang no ae.”
Jisu Mel Rung Hlongna
(Mit. 17:1-13; Luk. 9:28-36)
2Rungnie aruk takka Jisu na Pitar, Jacob akha chu Johon tolla mullon sang nga manita ruija, hana chu mani ha mani thei chak rui kallea. Hana mani na anna am lei ah Jisu kolla ahlong waso ae. 3Akha chu apun adir chu deja warra haja war ae chuna aleiram ma atu akha na kom hahekti awar pun don nea no ae. 4Hana arui inthum na Moses hitta Elija na mani maikunga shuk weta manui na Jisu ta trong thou pi hari so ae. 5Jisu kolla Pitar na rillea, “Ocha, amunt hina ani amhi ehakta hra so weh. Thiel inthum ani na sa ei oh-akhana nataranga, akha na Moses tarang hana akhana Elija tarang.” 6Chuna amo akha chu adangei na elota rill ang mo dangthei no weh, ti chu mani na leima tri sarukka.
7Chuna mani chunga sumphai na li-weta sumphai sunga thou sanrol akha na ril shukkae, “Nahi kasanao pa ae, machunga keina lungshi inge maril hi ngai thei oh.” 8Edang dang nowa ahul tunga mani anjuija Jisu ano wa atu adang akha phao mani na ri pha ni jo weh.
9Chuna manina mulbung hai thou tumma junga Jisu na manita rillea meesanaopana athi ngei kar hai thou malim chu, atu akha kolla nangei na ri sa ha ril shuk no oh ta Jisu na rou manita rillea.
10Mani thei chakka hita ngai tu hlak thouso, “Athi hai thou wa ringthou tina meh.” 11Jisu ta manina hita sai, “Alo sarukka rouphun chui ngei na Elija na masha phao ange ta rilla meh?”
12Matrong sang chu, “Elija na masha jungweta eheilim pa hi tamasha ae ange ti ha adiek takkae. Chutiweta ejeranga abai sunga jiekka shi ah meh meesanao pana aol ana eja dong anga mee na junna hou anga meh? 13Chuti weta nangei kolla karil chu, Elija chu phao so weh hana marou hana jiekka shi hekta mani na dit ha makolla ae so weh.”
Jisu Na Hrano Muihla Am Apasanao Ta Dampi Na
(Mit. 17:14-21; Luk. 9:37-43)
14Amona arui ngei am na mawakka ehakta tam wairol rija na mani ta hulla rouphun chupi takpi ngeina trong sum hlakka am ripha so. 15Jisu wakhi meelim na rijuija mani na edang dangno wa angak shukka ma am na ah tanna thing weta amota mokso. 16Jisu na sai, “Ejongpa sarukka nangei na manita trong sum hlak chao?”
17Hana wairol rija sunga apa akhana sange “Ocha, kasanaopa ha hraihru na sunna atrong shukno akha nakolla ruija wa inge. 18Chuna amunt chang honna amota hlawang na sunna athei chakka alei chunga tabu ah athei chakka aha ril weta achel phul shukka keina narui ngei ta hraihru muihla jullanga karilla manina julla hao nea nijo weh,” Jisu na rilleh.
19“Ngoiring thei lou mee ngei.” “Echan sotta keina nangei hitta amha ang meh? Echan sotta keina nangei ta dangpi song ang meh? ruija wa oh apa sanao ha ka-am na ah.” 20Chunapa chu manina Jisu am na apa sanao ha ruija hlawang muihla na Jisu ta ri len apha hana makka apasanao hata ratta soum ma houphur weta alei chunga letta tu wa achilphul sakso ae. 21Apa sanao hina mapa kolla Jisu na sai, “Apha Eja sotta amona hihakta ae mo weh?” “Mapa na sange unga hai thou ah.” 22“Apha chang honna amota that ranga tuisunga maisunga denga hou ae. Chuna kani ta lungshi ringrei ah san changa nangna na ae nea tullu te lu pi oh.”
23Jisuna makolla rilleh, “Ejonga nangna ngoiring ta lea chu eheilim aneno am no ae atujong ngoiring mee taranga.”
24Hata leitakka mapana tappa aushukke, kangoi ringchu aminge chuti weta hane shulinge, “Ka ngoiring lel ranga sanpi oh!”
25Wairul rija na mani kolla naija wak juija Jisu na ri ah, hrano muihla ta amona trongshi rilleh, “Atrong shukno akha chu kurset muihla,” amona lul lea, “Keina nangta rou ril inge, na unga heithou woiha shuk jouwo waiha lea ah lutno sa oh.”
26Hrano muihla na amota mant phura aol ana pe hao phur weta shukka thingso. Chuna rungthar apa sanao ha athi sa hekso weh meelim na ko thi so weh ta rilleh. 27Chuti weta Jisu na makut ha ao weta thoupi so weh hana amoha ngir thou so weh.
28Jisu na inn sunga malut juija marui ngeina aru hanta amota sai, “Alo sarukka kanina hrano muihla hata julla hao nea no wa meh?”
29Jisu na sange, “Hijongpa hi chu ani nachakka julne ae.”
Mathit Rang Maramma Jisu Na Lea Ah Maril
(Mit. 17:22-23; Luk. 9:43-45)
30Chuna nutienga Jisu akha chu arui ngei na rammun ha hau phurra Galily lalla thingso. Mani na thingna munt ha Jisu na chu atu akha ta dangpi num no ae. 31Rouram chu arengpu na arui ngeita chupi ah, takpi ah hita rilleh, manita, “Meesanaopa hata meengei kut chunga pe ange akha chu mani na amota that tange. Chutihal kom rungnie na thum takka amo na ringthou ange.
32Chuti weta rilla am hi mani na dangpha nea no ae chu chakno ah manina hina rilna rouram kom sai angphao atri ae.”
Loktekti Na Atu Meh
(Mit. 18:1-5; Luk. 9:46-48)
33Manina Kaphernahum wakjuija mani lutna innsunga amona manita hita sai, “Ejongpa rou sarukka nangeina lampi ah trong sella chao?”
34Chuti weta manilim na daisiem ti ae rouram chu manina lampiah atu na atuta loktek mo ae ti hi trong shell hlakkae. 35Hana Jisu ong weta asom ani hata kok weta rilleh, “Ejong atu motieng na masha di lea chu, amo ha meenu tek ti ha chang weta meelim rui changa ta ae.” 36Amo na unga akha mani karra ngir pi weta amona kolku wa mani ta ril. 37“Atu jong pana na unga akha hita ariem tukka kaminga lapi lea chu kaita lapi ah ae; hana atu jong pana keita ariemma ngai pi lea chu keita ano weh chuti weta keita hlapa ta ngaipi ah ae.”
Anita Anda No Ngei Ha Anitaranga Ae
(Luk. 9:49-50)
38Johon na rilleh, “Ocha, malmashi ngei na naminga hrano triek julla hou juija kanina manita ha tullu ha lu no ranga ham unge, rouram chu amoha ani sunga ano weh.”
39Jisu na manita rilleh, “Amota nangei na hamma si no oh,” “Rouram chu kaminga atu jongna ae nea tullu lu weta hana nutienga kaming taranga hrano tronga rollang mee amono ae. 40Chuna atu motieng na anita anda no ngei ha ani taranga ae. 41Nangei hi Khrista mee ae ta hana minga atu jong pana in-ranga tui don pi lea chu keina adiek takka rilsinge ma ae na amant pha ange.
Pak Tulranga Ahlem
(Mit. 18:6-9; Luk. 17:1-2)
42“Atu jongpa ung sanao akhana keita ngoiring amota nangei karra atu jong pana amota pakka tulpi lea chu, mataranga shum alung ahonga ren weta tui pi linna denga haopana hella hratek kange. 43Hana ejonga nakut na nangta pakka tul pi lea chu, nakut tan na hao oh, rouram chu nakut akha chakka aring ringchang pha pa na hella hratek kae, nakut ani su wa sarmei ah luttang saruk chu. 44Amunt hana sarmei chu amit ti am no ae, hana alung na bakka athi ti am no ae. 45Hana ejonga nakae nakom nangta pakka tulpi lea chu, nakae tan na hao oh, rouram chu nakae hurra aring ringchang pha pa na hella hra tekka nakae ani su wa sermei ah luttang saruk chu. 46Amunt hana sarmei chu amit ti am no ae, hana alung na bakka athi ti am no ae. 47Hana ejonga namit na kom nangta pak tulpi lea chu lah ah hao oh, Chungthieng rengram ma namit akha chakna lutpa na hella hra tekke mit ani su wa sarmei kum ma deng ang saruk chu. 48‘Amunt hana ringphur lung ha adai am no ae hana sarmei kom adai am no ae.’
49“Sarmei ah malmashi lim pa hi chi-al an hek ti ange.
50“Chi hi hra ae; chuti weta ejonga chi-al ha am no lea chu nangei na olata al pi ang chau?
“Nangei karra chi hekti tonpi chang chu oh, akha chu akha lea akha adai am ha oh.”
Currently Selected:
MAK 9: CHOTBSI
Highlight
Share
Copy
Want to have your highlights saved across all your devices? Sign up or sign in
Chothe Naga NT - ATHARKUTHROU
Copyright © The Bible Society of India, 2014.
Used by permission. All rights reserved worldwide.
