MAK 10

Ahran Hlak Na Lamtinga Jisu Chupi

(Mit. 19:1-12; Luk. 16:18)

1Jisu na rammun ha hou phur weta Judia ram tienga Jordon lalla thingso. Woihapa kom malmashi wairul rija makolla wa ah machupi ngei nujuija amona chupi takpi ae manita. 2Pharisi ahre na makolla phao weta mant rang hi rilleh, “Apa akha na anamei hran hi rouphun hana angei mo ae?”

3Jisu na shai weta sange, “Mosi na chu nangeita trongsan alota pe mo ae?”

4Manina sange, “Mosi na chu apa hana hran sange ta jieksha pe lea chu anamei ta hran na ngei ae.”

5Jisuna mani ta rilleh, “Nangei hi nalung hir hai sulla Mosi na rouphun ha nataranga jiekka sa ae. 6Chuti weta, ‘Chungthieng na shimlei shaklei athou na chu apa lea namei mamui chakkae,’ athieng trongshan na ril shi hekta, 7‘chuna rousarukka apa na anamei nei juija mapa manu ta houphu weta namei hitta am ha shu oh, 8hana manui ani ha atun chu pum akha chakso ae.’ Chuna manui ha etikom ani ha anijo weh, akha chak so ae. 9Chuna sarukka Chungthiengna tulpisha ani ha atu akhana hranpi no shu oh.”

10Mani na inn sunga amleija kom arui ngei na hina sarukka Jisu ta sai ae. 11Chuna Jisu na sange, “Atu jong pana anamei ta hran weta namei adangta nei lea chu amoha shimshi bhoron mee ae. 12Hana atu jongpa namei nu nakom mapishal ta hranweta pishal adang kolla palthing lea cha amo ha shimshi bhoron lal mee ae.”

Jisu Na Unga Ngeita Jaihra Pekpi

(Mit. 19:13-15; Luk. 18:15-17)

13Malmashi ngei na unga ngei chunga Jisu na makut shipi ranga rui phao pachu marui ngei na lungsha ah rilleh manita. 14Jisuna, nahi rijuija alung shukka hoino wa manita rilleh, “Unga ngei ha ka-am na ah wa shu oh hampi no oh, Chungthieng rengram ha mani jongpa taranga ae. 15Keina adiek rou nangei ta rillinge, atu jongpa na, na unga hekta la thei Chungthieng rengram hi unga akha na lak hekta lah no lea chu amunt hana lut pha ang no weh.” 16Hana aban chunga unga poi weta mani limta jaihra pe ae.

Achongpu Pa Akha

(Mit. 19:16-30; Luk. 18:18-30)

17Jisu na malam tienga thinga thou juija apa akha na tanna wa weta makae kunga ahuk hrun weta sai ae, “Ahra ocha, alo ta keina samla ringchang pha ranga etullu lu ang mo ae?”

18Jisuna sange, “Alo sarukka nangna keita ahra ocha kokka cha meh?” “Chungthieng ano wa chu atu akha ahra am no weh. 19Rakit rou dangno che: ‘Malmashi ta thatno, meenamei shimshi bhoron no, aru theino, dieklou saro ngir no rousa ah trongno, nanu napata ajak atri oh!’ ”

20Chuna Apa na hrabakta ril shukkae, “Ocha,” “Ka unga lei thou wa na limpa ha keina jui ah hang inge.”

21Jisu na amota takratta anweta lungshi ah hita rilleh, “Na jui lou akha am songe,” “Thingo akha chu na am nadon eheilimpa jur weta sara ringrei ngei ta sam thingo. Chule chu wanram ma anei adon ange. Hana wa oh, kanutieng juijo.” 22Apa hana mathei juija amai hai weta alung olla lea so weh, rouram chu amo ha anei adon mee ae.

23Jisu na arui ngeita hulla an weta hita ril, “Achongpu ngeina Chungthieng rengram lut rang hi ehekta alu akha ae!”

24Arui ngei na Jisu rouhi theijuija angak shukka amlei ah, Jisu na woihapa hita ril, “Unga ngei oh anei adon ta ngoiring taranga eja ah lu meh Chungthieng rengram lutrang! 25Achongpu pana Chungthieng rengram luttang chu jangkusha na ahriem na sunga lutpa na hella doktek kange.”

26Arui ngei na hella tieng ama acha ah mani akha lea akha ril hlakkae, “Chuleh chu atu jongpa chu aring koetlo pha ang mo nu?”

27Jisu na manita takratta an na ril, “Na hi malmashi ninga chu neno ae, chuti weta eheilimpa hi Chungthieng kolla chu neno am no ae.”

28Pitar na Jisu ta rillea, “Kani na eheilimpa nanutieng jui rang houphur songe!”

29Oh weh Jisuna sange, “Adiek rou keina nangei kolla rillinge,” “Atu jongpa na kataranga akha chu ahra rou taranga ma inn lou ano lea, ata asar anoleh manu mapa anoleh ma-u-manao houphur lea chu, 30amona atun mak chu saruk riha ha no wa ah inn alou ata asar, manu mapa, asanao ngei akha chu awut arel eja ngei hi phao angpa apha ah chu samla ringchang tukkange. 31Chuti weta mani atun masha ah am atam pana na ruinung ange, hana atun rui nunga atampa na masha ange.”

Jisuna Woithum Sunapa Athit Rang Rouril

(Mit. 20:17-19; Luk. 18:31-34)

32Jisu akha chu aruingeina Jerushalem thing rang lampiya am meh. Jisuna aruingei matinga thinge. Arui ngeiha ati alou na si so weh, anui jui mee ngei nako ati so weh. Woiha lea ah Jisuna arui asom ani ta adanga rui weta anutinga makolla shuk kang lim ha rilpi ae. 33Amo na ril, “Ani na Jerushalem ma kalla thinga mee sanaopa jur ange lok tek ti thiempu kolla akha chu roukung chupi ngei kolla manina thatta ngai mee ae ta vutta rella amota meejat adang ngei kolla peange. 34Manina chelshak ka nuisho simso ange akha chu amota thattange. Hana rungnie nathum nutinga amo ringthou ange.”

Jacob Lea Johona Roudoh Na

(Mit. 20:20-28)

35Zebedi sanaorel Jacob akha chu Johon na Jisu kolla wa weta shai ae, “Ocha,” “Kani taranga eyongpa akha nangta ae pi num unge.”

36“Naha chu e meh?” Jisu na manita shai ae.

37Mani na sange, “Kanui ni sunga akha na nachang tienga hana akha na navoi tienga na reng phom lu na ong ni ah ong pi oh.” 38Jisu na ril, “Nang na dangno che nang na roudoh am ha “aol tuidong ka een ang hi nang na een nea ang che? Ka baptias ae hekta baptias ae nea ang che?”

39“Kani nea ange manui na sange,” Jisu na manita ril, “Nangei na katui don na ka inn na inn halkom akha chu tui ka lut na lut hal kom. 40Ka ong na changtieng hal voitieng hal na ong ang chu keina kahal ang no ae. Chuti weta na amunt ha chu atujong mani tarang ae ta tamasha ae Chungthieng ta sa ae.”

41Rouhi arui asom na thei pa chu Jacob lea Johon ta mani na lungsha ae. 42Jisu na manilim ta ma am na ah kok weta mani ta rilleh, “Nangei na dangpha ange ejonga meejat ngei taranga ane angam akha ta rengpu mani taranga changpi hal hana mani chunga ane akha na ehei limpa ron na am meh. 43Nahi nangei karra hita ae ang no wa ae chutihalkom atu jong pana nangei karra alok sanum mee na nangei rui chang anga ae. 44Nangei kar rah akhana masha di lea chu amo ha meelim kou change. 45Chuna meesanao pana phao wa amota shilpi bolpi rang jung ah no ae chuti weta amo na tieng meeta shilpi bolpi ranga akha chu mee ejata sam ranga maring chan pe junge.”

Jisu na Mitcho Bartimas Ta Dampina

(Mit. 20:29-34; Luk. 18:35-43)

46Hana mani na Jerikho tunga Jisuna marui ngei akha chu wairul rija ngei ta houphur leija Timas sanaopa mitcho booni Bartimas amo ha chu lamhou ah onga am ae. 47Nazaret hai thou Jisu ae ti mathei pha juija amona aroul shukka au thou, “David sanaopa Jisu, keita ringrei ngei pi oh!”

48Mee atampa amota lungsha-ah dai tikta am mota, rilleh amo na chu tingtek kating au weh, “David sanaopa keita ringrei ngei pi oh!”

49Jisu na mauita ham ma ril lea, “Amota kok-ko” chuna mani na mitcho hata rilleh, “Ariem jou oh hana thoujou oh amo na nangta kokka am meh.”

50Mapunmani denga hau weta amona Jisu am na ah chom ma wa so ae.

51“Nataranga ejongpa tullu keita ae pi num ma chae?” Jisu na ril hana mitcho pana arengpu ta nie ae “Ocha, keina kamit woiha lea ripha num minge.”

52Chuna Jisu na amota ril, “Thingjou oh,” “Nangoiring hana nang dam pha so che ae.” Apha hana makka amit ripha nea ah amo lamhana Jisu nutieng jui so ae.

Currently Selected:

MAK 10: CHOTBSI

Highlight

Copy