LOBMUNG 49
49
1Bebak bororok o kókno khna di;
swngcharo tongnairok bebakno khunju kai bai di,
2kuchuk bai hache, kwrwi bai
gwnang bebakno khna di.
3Ani khúk kók elem sanai;
ani bwkhani uansukma abo saui man rwnai.
4Ang phrwngmungo khunju kainai;
chongpreng bai khe ang kók phumukmungno
kiphilwi sanai.
5Samung hamya tangnai kebengnai arirok ano kiting khe ang tamoni kirinai,
digi-sigini salrokno ang tamoni kirinai?
6Bórok sakni rang-rí-o bwkha bera-o
tei abono tẃi kung chugo.
7Bórokni bisingo khoroksa phano, khoroksani langmano le phiyógwi man ya,
Kaitorno mungsa phano abono rwui su-ui man ya.
8Tamoni hwn ba borokni langma belai khe morok,
tei aboni bagwi nangma swk khoroksa phano rwui man ya,
9abo bai khoroksa swk mol brúm kwthang tongwi
mangkhoro klaina nangmani yakni yóknani bagwi rang-rí bai man ya.
10Chwng elem gwnangrokno nuk kha, bórokbo thwi bai kha;
butuarok tei ailangrok uáisa bai
komorwi thángo tei bórok buini bagwi rangchak-ríchakrok khibiui ma klango.
11Bórokni mungwi bórokni harokni mung rw phano,
tei bórokni bosong thwgwi kusung kusung abo bórokni tongthai hwnwi tong phano,
mangkhor se bórokni mol brúmni tongthai wngnai.
12Borokni jolma-jolsa rang-rí tong phlai glak;
bórok pun-tokrok hai komornai.
13Sakni rang-rí bai bwkha kochomnai butua bororok omo tẃi kheno manthai mannai. Sela
14Bórok hakhorni bagwi tonjak merarok hai;
thwimung se bórokno mwrwknai wngnai;
bórok katswi kwthwirokni ha-ono tongo,
tei bórokni sakdukrok kwmaui páinai;
kwthwi hano bórokni tongthai wngnai.
15Tamo khe Kaitor ani pholano kwthwi hani phanni yakni phiyóknai,
tamni hwn ba bo ano yachaknai. Sela
16Khoroksa swk gwnang wng khe,
bórokni nogo rang-rí bángsa khe ta kiri di.
17Tamoni hwn ba bórok thwiwi tháng khe mungsa phano tlangwi man glak;
bini rang-rírok bo bai baksano hakhoro thángnai.
18Bórok bórokni thangsungo nini jarwi tongthothok khe tong kha hwnjaknai tei nwng nini bagwi samung kaham tang khe bórok lobjago
19bórok bórokni chuchusongni aro kiphilwi ma thángnai
bórok tei pohor nuk phi glak.
20Borokni jolma-jolsa rang-rí tong phlai glak;
bórok pun-tokrok hai komornai.
Bajumung kubui
Asapni lobmung
Currently Selected:
LOBMUNG 49: KOKBSI
Highlight
Share
Copy
Want to have your highlights saved across all your devices? Sign up or sign in
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.
