LOBMUNG 44
44
1O Kaitor chwng chini khunju baithang khna kha,
chini chuchusongni jora-o nwng tamo samung khlai kha,
chuchusong sa lang kha;
2nwng bahai khe dopharokno yak baithang rwkhlaiwi bórokno tongthai ha rw kha;
nwng dopharokno sátok kha tei bórokno khe phiyók kha;
3tamni hwn ba bórok sakni seng bai ha manma ya,
eba bórokni phan bai kwplai wng ya;
tamo khe nini yagra yak se,
nini khairokma bai se bwkha phurjakma bai se
nini chẃngsacha bai nwng bórokno khairok kha.
4Nwng se ani Kaitor ani bugra;
nwng Jakobno mwthangna dagi kha.
5Nini phan bai nwng chini kebengnai arirokno
dagarwi rohor kha; nini mung bai chini
kebengnai arirokno chwng kádul kha.
6Ang ani badukhung bai khom-khom wngjak glak,
ani sengbo ano mwthangwi man glak.
7Tamo khe nwng chini kebengnai arirokni yakni mwthango,
tei chwngno naislernairokno nwng bwkha urumuru khlai kha.
8Chwng Kaitorno tẃiwi kung chugui tongnai,
tei nini mungno mol brúm brúm lobnai. Sela
9Nwng chwngno khibi kha, lachi rw kha,
tei chini sengkrakrok bai nwng tháng li ya.
10Nwng chini kebengnai arirokni yakni chwngno kiphil rw kha,
tei chini kebengnai arirok chwngno swprak phai kha.
11Nwng chwngno ratharjakna bagwi tonma mera hai khe yapharwi rw kha,
tei dopharokni bisingo chwngno piring-poroi khlai kha.
12Nwng nini bororokno haino phal kha,
bórokno phalma rang bo morok rw li ya.
13Nok arini thani nwng chwngno mwnwimung tei chini yang ayang
tongnairokni thanibo thesra kariui mwnwijaknai se khlai si-o.
14Nwng chwngno dopharokni thani kók phunugui sajaknai
tei lukurokni thani khorok jangrijaknai se khlai si-o.
15Sal brúmno ani lachimung ani bwskango,
tei ani lachimasingcha se ano kholop si-o,
16abo thesra karinairokni kókrok tei kók sitra sanairok bai se khlaijago,
ani yagul sunairokni mokol bwskango.
17Omorok bebakno chini saka-o klai kha,
hai phano nwng chwngno pok ya,
eba nini swmaino sak nang ya wng ya.
18Chini bwkha nono khibi ya khu,
chini yapri nini lamani phér ya khu,
19siyal tong thani nwng chwngno swbaiwi sukhrup kha
tei chwngno mwnakma bai kholop kha.
20Tumung chwng chini Kaitorni mungno pok khe,
eba chini yak kubun mwtaino khulumna tháng khe,
21Kaitor abono nuk glak diba?
Tamoni hwn ba bo bwkhani huijakrokno saui mano.
22 #
Rum 8.36. Tamoni hwn ba nini bagwi chwng sapung butharjago,
tei ratharjakna tonjaknai merarok hai khe lekhajago.
23O Subraiyung, sicha di, nwng tamoni thu-ui tong?
Bacha di, chwngno mol brúmni bagwi ta khibi di!
24Nwng tamoni nini mwkhang hui?
Tamoni chini dukhurokno tei sátokjakmano pok?
25Tamoni hwn ba chini phola hadlwi-o kwlwk kha;
chini bwsak ha bai swrap kha.
26Chwngno chubana bagwi phai di bacha di.
Nini pái phlai ya khairokmani jarwi chwngno phiyók ja di.
Habugrani káilai pandani rwchapmung
Rwchapmung tẃithernaini bagwi. Lilini rwchapmung bai. Kurani bwsarokni hamjakmungni rwchapmung
Currently Selected:
LOBMUNG 44: KOKBSI
Highlight
Share
Copy
Want to have your highlights saved across all your devices? Sign up or sign in
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.
