LOBMUNG 42
42
1Mwswisa twi kangjagwi twi naitukma hai,
o Kaitor ani langmabo abo hai kheno nono kangwi khátango.
2Ani phola Kaitorno kango, kwthang Kaitorno kango.
ang buphuru Kaitorni bwskango sók phaiwi bini mwkhangno nuknai?
3Ani muktwirok se hor sal
ani chámung wng si-o,
lukurok khe ano “Nini Kaitor buro?”
hwnwi sẃng lai máng se tong lai si-o.
4Ang omorokno muitu manẃi
ani bwkha báiwi tongo:
ang borok kwbángmarok bai thángmani,
tei ang bórokno tẃiwi Kaitorni nogo thángmani,
tongthok khorang bai hambai rwui rwchabwi borok
kwbángma’-no terrok khlai lai-o.
5O ani phola nwng tamoni klai lang?
ani bwkha bisingo tamoni urumuru nang lang?
Kaitorno khatungnai;
tamni hwn ba ang bono lob phinai, ani chubanaisa
6tei ani Kaitor.
Ani bwkha báisuk kha; aboni bagwi ang nono
ha Jordan tei Harmono tongwi,
Mijar hathái-o
tongwi nono muitu khlai-o.
7Twi bakhlaiwi khorang gurumsama saka
teibo nini khorang gurumo;
nini twi pupakjak twi aphalrok ani saka tẃi lái thángo.
8Subraiyung salo khe bini pái phlai ya hamjakmano lukhlaiwi rw-o,
tei horo khe bini rwchapmungno rw-o, ano langma rwnaisano
surimungrok ani thani tongo.
9Ang ani holongthai Kaitorno hai hwnwi hwno,
“Nwng tamoni ano pok lang?
ano kebengnai arirok bai sátokjagwi
ang tamoni kabwi tong sinai?”
10Ani arirok ano thesra kari laiwi, “Buko sla nini Kaitor?”
hwnwi samani abo ani kirimasingcha kwsa hai wng kha,
11O ani phola, nwng tamoni khibiui rwjak lang?
ani bwkha bisingo tamoni urumuru nang lang?
Kaitorno khatungnai;
tamni hwn ba ang bono lob phinai, ani chubanaisa
Katimung sanwi surimani
Lobmung 42-no manju-ui sa phimani
Currently Selected:
LOBMUNG 42: KOKBSI
Highlight
Share
Copy
Want to have your highlights saved across all your devices? Sign up or sign in
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.
