LOBMUNG 40
40
1Ang bwkha logwi Subraiyungno naising kha;
bo ano mokol kai kha tei ani kapma khna kha.
2Bo ano kirimasingcha hakhorni,
ha kokhlaijakni socha kha,
tei ani yakungno holongthai saka ka rwui
ani yapri rak rw kha.
3Bo ani búkhúgo kwtal rwchapmung rw kha,
tei chini Kaitorno lobmungni rwchapmung rw kha.
Kwbángmano abono nugwi kirinai
tei bórok Kaitorni thani bwkha beranai.
4Subraiyungno bwkha beraui tongnai borok bo hamchajak,
bororok tatal mwtairokni bwkhak lama phérwi thángma hai,
bo phérwi kung chugwi tháng ya,
5O Subraiyung ani Kaitor nwng uanamasingcha khlaima,
samungrok chini bagwi uansukmarok kwbángma; nwng bai kebono su thai kwrwi.
Ang abórokno sa baiwi páina khe
ang abono lekhaui pái man ya.
6 #
Hib 10.5-7. Ratharmung bai barokmungno nwng nai ya,
tamo khe nwng ani khunjurokno phiyok kha.
Nwng sógwi yapharmabo nai ya
sumsokni bagwi ratharmungbo nai ya.
7Aphuru ang hai hwnwi sa kha, “Nai di ang oro se;
bijabo ani kók swijak tongo.
8O ani Kaitor, ang nini muchung tẃi tongna hamjago;
nini kerong ani bwkha bisingo tongo.”
9Borok kwbángma kuthumjago ang
nini phiyókmani kókno sakhlai-o;
O Subraiyung nwng si-o, nai di ang ani khúk muthup ya.
10Ang nini o mwthangmani kóktmarokno ani bwkha bisingo khe hui ton li ya,
ang nini kók narwkma bai mwthangma kókno pír kha; nini pái phlai ya
hamjakmano, nini kók narwkma kókno ang lukuthum kotoro khna rw yaui ton li ya.
11O Subraiyung nwng ani bagwi khairokmano ta kasu ja di;
nini khairokma bai nini kók narwkmani sal brúm ano mwthang thung.
Chubachu sanwi surimani
(Lob 70)
12Kwbángma borok hamyarok ano
chorsa khe kiting kha; ani samung hamyarok bángwi
ano phinkhlaisaui ang tei nuk li ya;
abórok ani khorokni khnaini slái
báng kha tei ani bwkha thwi súk kha.
13Subraiyung, ano khairogwi phiyók ja di;
O Subraiyung, ano dakti chuba ja si di.
14Ano butharna naituknairok bebakno
ma lachi thung tei bwkha bái thung;
ano hamya khlaina muchungnairok bórokno kiphil rwui rohor di tei mwkhang man ya khlai di.
15Ano “Wng kha, ham kha!” hwnnairokno sakni lachimung bai’-no kwma thung.
16Tamo khe nono naituknairok bórok nini thani bwkha srangwi tongthok thung;
nini mwthangmano hamjaknairok,
“Subraiyung wng kha Kotor!” hwnwi sa phlai máng tong thung.
17Ang le bigrasa tei biyalo klaijak,
tamo khe Subraiyung se ani bagwi uansugo.
Nwng’-no ani chubamung tei phiyóknai;
O ani Kaitor ta ler ja di.
Sak hamya wngjak borokni surimung
Rwchapmung tẃithenani Bagwi Daudni rwchapmung
Currently Selected:
LOBMUNG 40: KOKBSI
Highlight
Share
Copy
Want to have your highlights saved across all your devices? Sign up or sign in
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.
