LOBMUNG 38
38
1O Subraiyung nini jolima bai ano ta kul ja di,
eba thamchi tungjak khe ano ta phrwngja di.
2Tamoni hwn ba nini chakhlarok ano supla kha,
tei nini yakbo ano belai khe sinklwk kha.
3Nwng jolima bagwi ani sak hamwi man li ya;
ani sumsokni bagwi ani bekrengbo hamchaui man li ya.
4Ani samung hamyarok ani khorok lái kha;
abórok manwi hilik hai khe ani thani belai hilik kha.
5Ang butua wngma bagwi ani kwsarok sogwi mwnam kha;
6ang ma kong kha tei botok khe ma súkpái kha;
ang sapung kengai-o.
7Ani bwchango yoksa kha tei
ani sakrok kisa phano hamwi man li ya.
8Ang belai phan kwrwi kha tei báikhrup súk kha;
ani bwkha yokmani bagwi ang kengai-o.
9O Subraiyung ani bebak naimarok nwng si-o;
ang kapmani nwng saui man ya wng ya.
10Ani bwkha kwlwibra-o, ani phan chúk li ya;
tei ang mokolbo nuk tha ya wng rw rwk laha.
11Ani kichingsong tei logisongrok
ang bai kwchal khe tong lai-o,
tei ani nok arini bororokbo hakchal khe tong kha.
12Ano butharna nainairok ani bagwi khẃi chak lai-o;
ano dera rwna nainairok ano sokomorna kók chap lai-o,
tei sapung bandina máng uansuk lai-o.
13Tamo khe ang nathong hai khe khna ya tongo;
kók man yarok hai khe kók sa yaui tongo.
14Kubui’-no, ang khunju khna yarok wng kha,
bórok búkhúkbo per ya.
15Tamo khe o Subraiyung ang nono khatungwi tongo;
o Subraiyung ani Kaitor, nwng se khnanai.
16Ang hai hwnwi ma koija-o, “Ang yapri kásleui klai phuru
nwng bórokno ano nugwi ta tongthok rw di,
kók kotor sa lainairokno.”
17Ang klai twtwi wngwi tong kha,
ani dukhubo ang bai máng tongwi tong kha.
18Ang ani cha yano gosi-o;
ani sumsokni bagwi ang khá yógo.
19Ano kwrwi kwrwini kebengnai arirok phan gwnang
tei kwbángma’-no ano kwrwi kwrwini naislerjago.
20Ang bórokni kaham khlaimano hamya bai khe yagul sunairok khe ani kena arirok,
tamni hwn ba ang kahamo se tongo.
21O Subraiyung ano ta khibi ja di;
o ani Kaitor ang bai ta chal ja di;
22o ano mwthangnai Subraiyung ano dakti chuba ja di.
Digi-sigi klaijak borokni sumsok gosimani
Rwchapmung tẃithernai Jeduthunni bagwi Daudni rwchapmung
Currently Selected:
LOBMUNG 38: KOKBSI
Highlight
Share
Copy
Want to have your highlights saved across all your devices? Sign up or sign in
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.
