LOBMUNG 37
37
1Samung hamya tangnairokni bagwi nwng ayuk-muyuk ta wngjak di;
samung cha ya khlainairoknobo ta músú di,
2bórok daktino samrok hai khe mwrannai,
sam kwkhrangrok hoicha tẃi khe hoichaui thángnai.
3Subraiyungno poito khlai di tei samung kaham tang di;
hakhe nwng ha-o tongnai tei kirimung kwrwi khe tongthogwi tongnai.
4Subraiyungni thani bwkha srang di,
hakhe bo nini bwkha muchungmano rwnai.
5Nini yapri Subraiyungno yaphar di;
bini thani bwkha bera di, hakhe bo nono chubanai.
6Bo nini kahamno chati hai khe kwchẃng khlainai,
nini bujsóino dibor khiring khiring phuruni hai khe kwchẃng khlainai.
7Subraiyungni bwskango siring siring wng di,
tei bwkha logwi naisingwi tong di;
hamya chapmung chapnairokni hamma chamano nugwi
ámang-chímang ta wngjak di.
8Thamchi tung yaui tong di, jolimano khibi di.
Ta músú di, abo bai hamya se khlai-o.
9Tamoni hwn ba samung hamya tangnairok ma kwma anw,
tamo khe Kaitorno naisingwi tongnairok khe hano man anw.
10Tei srapsa tong kheno, borok hamyarok tei tong glak;
nwng bórokno bórokni tongthai-o kaham kwrwng khe nugwi tong phano, bórokno aro tei nuk glak.
11 #
Mat 5.5. Tamo khe koinenerok hano mannai,
tei kwbángma khe hamari manẃi bórok kirimung kwrwi khe tongnai.
12Borok hamyarok, borok kahamrokni bagwi hamya chap lai-o,
tei bono naisigwi ua hul lai-o;
13tamo khe Subraiyung borok hamyarokno naisigwi mwnwi anw,
tamni hwn ba bo bini bwskango phaiwi tongmani salrokno nugo.
14Tongmung kaham tongnairokno butharna
bagwi borok hamyarok seng sotrosa kha
tei badukhungrok thon kha;
15bórokni seng bórokni bwkha-o hapnai,
tei bórokni dangai báinai.
16Borok hamyani kwbángma tongmani slái,
borok kahamni kisicha tongma phano kaham.
17Tamoni hwn ba borok hamyarokni yak báinai,
tamo khe Subraiyung borok kahamrokno khe naikolwi tono.
18Subraiyung borok kahamrokni salno si-o,
tei bórok mol brúm tong phlainai sokat mannai;
19jora hamyarok sók phaibo bórok lachina nang glak,
chacharara phurubo bórok asuda khe tongnai.
20Tamo khe borok hamyarok khe komornai,
tei Subraiyungno kebengnai arirok hapharni sam hai
srapsa se naithok wngwi tong anw;
bórok hoku hai khe kwmaui thángnai.
21Borok hamyarok lakai naui su phi ya,
tamo khe borok kahamrok le khairokma gwnang tei rw thani yak kuar;
22phiya Subraiyung bai hamari rwjaknairok hani bugra wngnai,
tamo khe bini bati nangnairok khe komornai.
23Borokni yaprirok le Subraiyungni aroni se,
tei bo bwkha phurjakma tẃi yapri sénaino songcha-o;
24bo klai phano katswi klaiwi tháng súk glak,
tamni hwn ba Subraiyung bini yakno romwi tongo.
25Ang sikla tongmani tabuk chakra wng kha,
tamo khe tabuk phano borok kahamrokno haino klaijak khe eba
bini bwsaroknobo chámung ma bírma nuk ya kho.
26Bo yak kuar khe solok rw máng tongo,
bini bwsarok hamari mano.
27Hamya bai kak di tei samung kaham tang di;
hakhe nwng mol brúmno tongnai.
28Tamoni hwn ba Subraiyung bujsóino hamjago; bo bini
kók khnaui tongnairokno khibi ya.
Borok kahamrok mol brúm brúmno darok rwui tonjaknai,
tamo khe borok hamyani bosongrok kwmanai.
29Borok kahamrok ha mannai tei
aro mol brúmno tongnai.
30Borok kahamni khukrok kók elemi sa-o tei bini
bwslai bujsóini kók sa-o.
31Bini bwkha-o bini Kaitorni kerong tongo;
bini yaprirok kásle ya.
32Borok hamya, borok kahamno mokol kaiwi tongo,
tei bono butharna lama naitugo.
33Subraiyung bono borok hamyani yago yapharwi rw glak,
eba buj thumjak phurubo bono majra ber glak.
34Subraiyungno naising di, bini lama-o him di,
tei bo nini yago ha rwna bagwi nono kuchugo tisanai;
nwng borok hamyarok komormano nuk anw.
35Ang borok hamyano phan gwnang khe nukmani,
Lebanonni sidar phang hai#37.35: Lebanonni Sidar hai: Kaisa kwcham kók séma-o Lebanonni sidarno kosol. Hibru-o srai-srai wng ya. khe chuksajak khe nukmani.
36Ang ayang tẃi tei uáisa lái phuru khe abono aro tei nuk phi li ya;
ang#37.36: Ang: Baksa kwcham kók séma-o khe ang; Hibru-o khe bo. abono naituk kha, tamo khe ma se man phi li ya.
37Borok kahamno mokol kaiwi tong di,
tei borok sutrangnobo mokol kaiwi tong di,
bórokni bwsarok kwchang kwchang khe ma tongnai.
38Tamo khe samung sitra tangnairok le uáisa bai sokomorjaknai;
borok hamyarokni ulni bosongrok sokomorjaknai.
39Borok kahamrokno Subraiyung se mwthango;
digi-sigi phuru bo se bórokni tongthai.
40Subraiyung bórokno chuba-o tei phiyógo;
bono poito khlaimani bagwibo bo bórokno
borok hamyarokni yakni phiyógo tei bini thani
tongthai na phaimani bagwi mwthango.
Dukhu manẃi tongnaini surimani
Daudni rwchapmung
Currently Selected:
LOBMUNG 37: KOKBSI
Highlight
Share
Copy
Want to have your highlights saved across all your devices? Sign up or sign in
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.
