LOBMUNG 25
25
1O Subraiyung, ani bwkhano nini thani yaphar ja-o.
2O ani Kaitor, ang nini thani bwkha bera ja-o;
ano lachimasingcha ta khlai ja di;
ani kebengnai arirokno ano mechenwi ta tongthok rw di.
3Nono naisingnai bororok lachimung ta man thung;
buino bandinai borok hamyarok lachimasingcha ma wng thung.
4O Subraiyung, ano nini lamarokno si rw ja di;
nini lamarokno ano phrwng ja di.
5Nini lama kubui-o ano tẃither ja di,
tei ano si rw ja di, tamni hwn ba nwng se ano mwthangnai ani Kaitor;
6O Subraiyung, muitu khlai ja di,
agi phuruni simi nini khairokma
tei hamjagwi phaimani kókno.
7Ani sikla phuruni sumsokrok eba samung hamyarokno muitu ta khlai ja di;
o Subraiyung, nini khairokma bai tei nini kha kaham
bai ano muitu khlai ja di.
8Subraiyung le kaham tei sói se;
aboni bagwi bo sumsok gwnangrokno lama phunugo.
9Bo koinenerokno kubui tẃi tẃinai,
tei koinenerokno bini lama phunugo.
10Subraiyungni kerong tei dagimung tẃi tongnairokni thani khe
bini bebak lamarok
pái phlai ya hamjakmung tei kók rwma narwkma tongo.
11O Subraiyung nini mungni jarwi ani cha yarokno nakar ja di,
tamni hwn ba abo belai báng laha.
12Subraiyungno kirinai borok le sabo?
Bo bini lamano chongwi nanani phrwngnai.
13Bo langmarogo hamari kupulung khe tongnai,
bini bosongrok ha mannai.
14Subraiyungno kiriui tongnairok
bo bai kiching halok khe tongnai tei bo bórokno bini swmaino saui man rwnai.
15Ani Subraiyungni bwkhak máng naisigwi tongo,
tamni hwn ba bo ani yakungno khẃini kati rwui tonnai.
16Ani bwkhak kiphil ja di, ano khairok ja di,
tamni hwn ba ang saichung susuk dukhu manjak.
17Ani bwkhani dukhuno phiyók ja si di,
tei tong keseprokni ano phiyók ja si di.
18Ani dukhu bai ani samano naikhlai ja si di,
tei ani bebak sumsokrokno nakar ja si di.
19Ani arirok bwswk khe báng kha naisik di,
tei bórok bwswk khe ano naislerjak nai di.
20Ani langmano kati rwja ja di tei phiyók ja di;
ano lachimasingcha ta khlai ja di,
tamni hwn ba ang nini thani bwkha bera kha.
21Sói khe tei sutrang khe tongmani ano kati rwui tong thung,
tamni hwn ba ang nono naisingwi tongo.
22O Kaitor Israilno phiyók ja di,
bini bebak digi-sigini phiyók ja di.
Khoroksa borok kahamni surimung
Daudni rwchapmung
Currently Selected:
LOBMUNG 25: KOKBSI
Highlight
Share
Copy
Want to have your highlights saved across all your devices? Sign up or sign in
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.
