MATHAI 24

Nokthar swbaijak anw hwnwi Jisu samani

(Mar 13.1-2; Luk 21.5-6)

1Jisu aroni kutulwi noktharni ongkhorwi tháng phuru sagrirok bono noktharni dolan-pakino phunukna bagwi bini thani phai kha. 2Bo hai hwnwi sa kha, “Au, norok omorokno nukma da! Ang norokno o kók sa-o, oro holong saka holong dulsa phano tong glak; joto swbai khibijak anw.”

Mol pái ya sini tamo tamo wngnai

(Mar 13.3-13; Luk 21.7-19)

3Jisu Tháistwi Hathái-o achugwi tong phuru sagrirok tepsa khe bini thani phai kha. Bórok hai hwnwi sẃng kha, “Chwngno sa di, omo hai bu phuru wngnai? Nwng phaina kasu kha, molbo páina kasu kha hwnwi saui manna bagwi bubo tẃi tamo phunukjak granai?”

4Jisu hai hwnwi sa kha, “Hus khe tong di, kebo bai lama ta koró rwjak di, 5tamni hwn khe baksa baksa ani mungwi ‘Angno Masia!’ hwnwi sa phai anw, hakhe baksa baksano lama koró rw anw. 6Norok gana-o chobani khorang khna anw, hakchalo choba nang lai kha hwnwi kók khna anw; hai phano ta uana di. Abo hairok ma wngnai’-no, aphurubo o mol pái ya kho. 7Dopha bai dopha choba wng lai anw, ha bai ha nang lai anw. Kwrẃngsa kwrẃngsa-o asaribo wng anw, banglabo phai anw. 8Omorok bebak’-no bwsa bána phuru bohok sa grama hai se.

9“Aphuru norok romjak anw, sátokjakna bagwi yapharwi rohorjak anw, norok butharjak anw. Bebak borok’-no ani bagwi norokno naisler anw.#Mat 10.22. 10Aphuru baksa baksa uslu anw; bo’-bo bono rom rw anw, bo’-bo bono naisler lai anw. 11Aphuru diyari phatrarok kwbángma bachaui baksa baksano lama koró rw anw. 12Hamya báng rwrwkma bai baksa baksani hamjak laima kwma rwrwk anw. 13Tamo khe soiwi man suknai borok bo se mwthangjaknai.#Mat 10.22. 14Hakhe Kaitorni hani o Kothoma Kaham swngchar gwnangwi bebak bororokni thani khna rwna bagwi pírjak anw; aphuru khe o mol pái anw.”

Gojob Khlainai Selengmasingcha

(Mar 13.14-23; Luk 21.20-24)

15“Daniel diyari sa langmani a Gojob Khlainai Selengmasingcha norok nok kwtharno bachajak nuk anw.” (Omo tamo hwnmani abo porinaisa saui man thung).#Dan 9.27; 11.31; 12.11. 16“Aphuru Judia-o tongnairok hathái bwkhak khárwi tháng thung. 17Nuka#24.17: nuka: Kók yaphango ‘núkhúng’. tongnai borok bo bini manwirok nauina hwnwi noksingo ta hap si thung. 18Kheto tongnai borok bo dulai nauina hwnwi kiphilwi ta phai si thung.#Luk 17.31. 19A salo sakderiya bai sagwnangmarokni bwswk se birman wng ja no! 20Masing phuru eba Sabat salo khárna nang ya tẃi khe norok Kaitorno suri san di. 21Tamni hwn khe swngchar snam phuruni simi tabuk jora abo hai digi-sigi uáisa phano wng ya kho, abo hai tei w bo wng glak kha.#Dan 12.1; Phu 7.14. 22Tamo khe Kaitor a salrokno bara rw kha, wng ya khe khoroksa phano kwthang tong glak kha mun. Hai phano bini chongjak bororokni bagwi Kaitor a salrokno bara rwnai.

23“Aphuru norokno khoroksa swk ‘Iko, nahar di, oro se Masia!’ eba khe ‘Uko, aro se bo! hwnwi sa khe bini kók ta na di. 24Masia phatrarok bai diyari phatrarok bacha anw. Bórok soidom bai uanamasingcha samungrok phunuk anw, wng khe ba Kaitorni chongjak bororokno suda lama koró rw anw. 25Khna di, swkang baira’-no ang norokno o kók sa-o.

26“Hakhe tumungno bororok norokno ‘Iko, nahar di, bo u hasing panthoro se!’ hwnwi sa khe aro ta tháng di; eba khe ‘Nahar di, bo oro bisingo se!’ hwnwi sa khe a kók ta na di. 27Tamni hwn khe salkabaini sal thángbai bwkhak nokha jiliksa khe nokha philikma hai khe se Borokni Sajla phai anw.#Luk 17.23-24.

28“Kwthwi tong thani’-no sikruk kuthum anw.#Luk 17.37.

Borokni Sajla phainani kók

(Mar 13.24-27; Luk 21.25-28)

29“Aphuruni a digi-sigi pái kheno sal mwnak anw, tal tei chẃng glak, nokhani athukirirok klai anw, nokha gwnangwi jangrijak anw.#Jis 13.13; Jol 2.10,31; 3.15; Phu 6.12-13; Esk 32.7; Jis 34.5. 30Aphuru khe Borokni Sajla phaina nai tong kha hwnwi nokha-o sijak anw, aphuru swngcharni bebak bosong kap lai anw, Bórokni Sajlano nokhani chumui-o khe kwplai wngwi belai chẃngsacha khe phaima nuk anw.#Dan 7.13; Phu 1.7. 31Totro kotor sotonwi pung anw, hakhe bo bini suarirokno haktorni babai brwi-o rohor anw, bórok bini chongjak bororokno haktorni yaphang buchukni thum phai anw.”

Khwichang buphang bai phrwngmani

(Mar 13.28-31; Luk 21.29-33)

32“Norok khwichang buphangno naisigwi srwng di. Bini bedek khrangsaui bwlái rotomwi phai phuru tangbla sampha kha hwnwi norok saui mano. 33Omo hai kheno norok omorok bebakno nuk phuru mol sampha kha hwnwi khá ka di, sók phai se tong kha hwnwi khá ka di. 34O kókno muitu narwk di, o molni bororok thwi bai ya sini’-no omorok bebak’-no wng anw. 35Ha bai nokha se kwma anw ba, ani kókrok kwma glak.”

A sal bu phuru phai no abo kebo saui man ya

(Mar 13.32-37; Luk 17.26-30,34-36)

36“A sal bai a jora bu phuru phai no abo kebo saui man ya; chuknohani suarirok buya, Sajla buya; Apha simi se abo saui mano. 37Borokni Sajla phai phuru khe Noani phuru wngma hai se wng anw.#Yap 6.5-8. 38Twi tor ya sini wng laima hai, Noa rungtoro kasa ya sini bororok chá lai-o nung lai-o; 39hai phano twi torwi bórokno bebakno kochok rw ya sini tamo wngna naiwi tong kha abono bórok saui man ya. Borokni Sajla phai phurubo abo hai’-no wngnai.#Yap 7.6-24. 40Aphuru borok khoroknwi kheto samung tang laiwi tong khe khoroksa tlangjak anw, tei khoroksa klangjak anw. 41Bwrwi khoroknwi mai súk lai tong khe khoroksa tlangjak anw, tei khoroksa klangjak anw. 42Hakhe hus khe tong di, tamni hwn khe norokni Subrai bu phuru phai no abo norok saui man ya. 43O kókno muitu narwk di, sikhok bu phuru hap phai no abo nokphang saui man khe bo sichaui tongwi nogo sikhokno hap rw glak. 44Hakhe aboni bagwino norok tiyar khe ma tongthai, tamni hwn khe phai glak hwnwi tong phuru’-no Borokni Sajla phai anw.”#Luk 12.39-40.

Sabo seleng kaham

(Luk 12.41-48)

45“Hakhe sabo seleng kaham? Sabo khá sinai seleng sla? Bo wng kha omo tẃi: Nokphang khoroksa tei selengrokno sal brúm brúm chá rwna bagwi bini seleng khoroksano barja berwi rw kha. 46Nogo kiphil phuru nokphang a selengno omo hai samung khlaijak nuk phai khe a seleng hamchanai. 47Ang norokno sói kókno sa-o, ahai khe a nokphang a selengno bini bebak sompotini barja snam anw. 48Phiya bo tumungno seleng hamya wng khe bo khá bising bising ‘Ani nokphang phaina ler anw,’ hwnwi uansuknai, 49hakhe bo tei selengrokno bunai-toknai phiya phekplairok bai chánai nungnai. 50Hakhe phai glak hwnwi tongmani salono, bo saui man slap ya sini bini nokphang phainai. 51Hakhe nokphang bono kochok nwi khe tan phainai, phatrarok bai baksa’-no bonobo ton anw. Bo aro ua hului ma kap anw.”

Currently Selected:

MATHAI 24: KOKBSI

Highlight

Copy