LUK 8

Jisuni logi bwrwi khoroknwi khoroktham

1Aboni ulo Jisu kamirogo tei taunrogo tháng twtwi Kaitorni hani Kothoma Kaham pír kha. Sagri chiknwirok bini logi tháng kha. 2Bwrwi khoroknwi khorokthambo bini logi-o tongo, bórok mwtai hamya kolobjagwi sra rwjak tei hamya ham rwjak-bórokni bere Mariam (bono Magdalinibo hwno), bini bisingni mwtai hamya maksni rwkhlai rohorjak kha, 3Herodni noyungni tangphang Khuchani bihik Johana; Suchana, phiya teibo bwrwirok tongo. Bórokni parima tẃi Jisu bai bini sagrirokno bórok nai lai-o nuk lai-o.#Mat 27.55-56; Mar 15.40-41; Luk 23.49.

Maichlwi sarmani rwngthoma

(Mat 13.1-9; Mar 4.1-9)

4Taun brúm brúmni aswk borok Jisuni thani kuthum phai kha. Borok kwbángma kuthum phai bai khe Jisu o rwngthoma sa kha:

5“Borok khoroksa maichlwi sarna hwnwi tháng kha. Sar phuru baksa maichlwi lama-o klai kha, abo káduljak khe tei toksa-toktẃirok cháui khibi kha. 6Baksa ba holong saka-o klai kha; bumuk perma le per kha, tamo khe tos kwrwini bagwi rampraui tháng kha. 7Baksa ba busulwngo klai kha, hakhe busurok abo bai baksa torsaui abono kobolwi khibi kha. 8Baksa ba ha kahamo klai kha. Abo torwi logwi bwthái sara thái kha.”

Hakhe bo hai hwnwi saui kók mwthak kha, “Khunju tong khe ba o kókno khna di.”

Tamni bagwi rwngthoma sajak kha

(Mat 13.10-17; Mar 4.10-12)

9Bini sagrirok Jisuno a rwngthomano swbaiwi sa di hwn lai kha. 10Bo hai hwnwi sa kha, “Kaitorni hani bisingni kókno norokno saui man rw kha; phiya omono’-no buino rwngthoma tẃi sajak kha. Hakhe bórok nugwibo nuk ya, khnauibo romwi man ya wng thung.”#Jis 6.9-10.

Maichlwi sarmani rwngthomano Jisu swbaiwi samani

(Mat 13.18-23; Mar 4.13-20)

11“A rwngthoma khe ahai: A maichlwi’-no Kaitorni kók. 12A kók khnanairokno poito thángwi ta mwthangjak thung hwnwi Soitan bórokni khá bisingni kók tlang phai-o, omo tẃi bororok’-no a lama-o klainai maichlwi. 13A kóknobo khna-o, khápang srangjagwi bwkha-obo chobo, tamo khe a kók bwkha-o hap súk ya, hakhe bórok srapsani bagwi poito khlai-o, potalijak khe uslu-o, omo tẃi bororok’-no holongthai-o klainai maichlwi. 14A kókno le khna-o, tamo khe o swngcharni kók uansugo, rang-ríno mokol chẃngo, tongthok-cháthokno khatungo, aboni bagwino bórok koboljago, hakhe bumuk cha ya wngwi thángo, omo tẃi borok’-no a busulwngo klainai maichlwi. 15A kókno khnaui sutrang khe kaichomwi kha lokma bai khe bwthái tháinairok bórok a ha kahamo klainai maichlwi.”

Chati kholopjak ya

(Mar 4.21-25)

16“Chati phnangwi khoroksa phano twk bai kholobwi ton ya, chuki tola’-obo ton ya. Tamo khe nok bisingo hapnairok pohor nukna tẃi thopna’-ono tono.#Mat 5.15; Luk 11.33. 17Huijak tonmarok tikhlai phunukjak anw, kholopjakrok pháng-phángo kariui phunukjak anw.#Mat 10.26; Luk 12.2.

18“Hakhe nwng bwswk khe khunju kaichomwi khna nai di; tamni hwn ba gwnang teibo rwjaknai; phiya kwrwi hwn khe bo kisa tongo hwnwi kha kamani abo suda bini yakni najaknai.”#Mat 25.29; Luk 19.26.

Jisuni sakni borok

(Mat 12.46-50; Mar 3.31-35)

19Jisuni buma bai bini takhuksong aphuru bini aro phai kha. Borok kwbángmani bai bórok bini thani thángwi man li ya. 20Hakhe bono hai hwnwi sajak kha, “Nwma bai nini takhuksong phataro bacha laijak, bórok nwng bai malaina phai-o.”

21Tamo khe bo bórokno hai hwnwi sa kha, “Kaitorni kók khnaui abo hai khe tongnairok bórok se ani ama ani takhuk.”

Jisu nokbar kotor thak rwmani

(Mat 8.23-27; Mar 4.35-41)

22Salsa Jisu bini sagrirok bai baksa rungo kasaui hai hwnwi sa kha, “Hwm tho, chwng twibom ayang naro tháng anw.” Hakhe bórok lam rw lai kha. 23Tháng twtwi’-no Jisu muktrwi tháng kha. Yang le twibomo nokbar kotor sipchaui phai kha, hakhe rungo twi pungwi bórok kwlwkna nai kha. 24Sagrirok Jisuni thani thángwi bono sochaui hai hwnwi sa kha, “O hoda! O hoda! Chwng thw se thwi nai kha!”

Hakhe Jisu bachaui nokbar bai twi kutukjakno damrogwi rw kheno nokbar thagwi kwchang kwchang wng kha. 25Hakhe bo bini sagrirokno hai hwnwi sa kha, “Bihi sla norokni poito?”

Bórok uabo uanajak kha, kibo kirijak kha, hakhe hai hwnwi sa lai kha, “O borok sabo? Bo damrok khe nokbar bai twi suda bini kók khnaui ma tongo.”

Mwtai hamya kolobjakno Jisu sra rwmani

(Mat 8.28-34; Mar 5.1-20)

26Bórok Gergesenrokni amchoi-o sógwi kha; abo twibom ayang naro. Galili bai nahar lalai. 27Jisu hakungo ongkhorma logi’-no a taunni mwtai hamyarok kolobjak borok khoroksa bini thani sók phai kha. Búmasíngni simi bo rí kan li ya, nogobo tong li ya, simalwngrogo se tongo. 28Jisuno nuk kheno bo chirikhógwi bini bwskango klai phai kha, hakhe sotonwi hai hwnwi sa kha, “O Kaitor Kaitorni Sajla Jisu! Nwng ang bai tamo nangjak? Ano ta sátok jaba di hwnwi ang nono koi ja-o!” 29Bo o kók sama khe Jisu a mwtai hamyano bini bisingni ongkhorwi tháng di hwnwi dagima bagwi se bo o kók sa-o. (A mwtai hamya agirogo bono teibo kwbángma kolob kha; bono sorduk bai yakung yak khaui mwrwk phano mwtai hamya kolob phuru bo sorduk sachu-ui siring siring kwrẃngsa-o tlangwi thángjago.)

30Hakhe Jisu bono “Nini mung tamo?” hwnwi sẃng kha,

“Ani mung Kwbángma,” hwnwi bo sa kha, tamni hwn khe mwtai hamya kwbángma bono kolob kha. 31Mwtai hamyarok “Chwngno ha tola-o ta rohor ja di,” hwnwi Jisuno koi kha.

32Aro hadugo uak kwbángma ada chá laiwi tongmani; a mwtai hamyarok bórokno u uakrokni bisingo hapna rw di hwnwi Jisuno koi kha. Hakhe bo bórokno rohor kha. 33Hakhe a mwtai hamyarok a borokni bisingni ongkhorwi uakrokni bisingo habwi kha, hai kheno aswk uakrok harwbra tẃi ongkhor klaiwi twibomo kwlwgwi thwi bai kha.

34Abono nugwi uak mwrwknairok khárwi tháng lai kha tei bórok a wngmano tauno tei kamirogo saui rwui bai kha. 35Hakhe bororok tamo wng kha hwnwi naina hwnwi tháng lai kha tei bórok Jisuni thani phaiwi a mwtai hamyarok kolobjakno srajak nuk phai kha; bono rí-chum kanwi Jisuni yakung yaphango kwchang kwchang khe achugwi tongma nugwi bórok kirijak kha. 36A borok bahai khe sra rwjak kha abono nuknairok bororokno saui khna rw kha. 37Gergesenrokni amchoini bebak bororok belai kirima bai Jisuno aroni tháng ja di hwnwi sa kha. Hakhe Jisu rungo kasaui kiphilwi tháng kha. 38A mwtai hamyarok kolobwi srajak a borok bono bini logi tẃi ja di hwnwi koi kha;

Tamo khe Jisu bono hai hwnwi saui rohor kha, 39“Nwng nogo kiphilwi tháng di. Kaitor nini bagwi aswk samung khlaimano saui di.”

Jisu bini bagwi aswk samung khlaimano a borok thángwi taun gwnangwi pírwi kha.

Jairni bwsajwk bai Jisuni dulai tangnaijwk

(Mat 9.18-26; Mar 5.21-43)

40Jisu twibom ayang narni kiphilwi phai phuru borok kwbángma bono bóri sok kha, bórok bebak’-no bono naisingwi tongo. 41Aphuru Jair hwnwi aroni thumnokni hoda khoroksa sók phai kha. Bo Jisuni yakung yaphango klaiwi bono bini nogo phaina bagwi koi kha; 42tamni hwn khe nokha bisi chiknwini bwsajwk khoroksa susuk lái tẃi-lái tẃi wngwi tong kha.

Jisu lama-o him phuru yang yangni luku kwbángma kese-rebe khe bini thani klaiwi rw phai bai kha. 43A luku bisingo bwrwi khoroksa tongo, a bwrwi nokha bisi chiknwi wng kha rí súma thak ya; bini tong-kwrwi swbai baiwi ochai-khama nai rwui nai kha tamo khe bono khoroksa phano ham rwui man li ya. 44A bwrwi luku bising tẃi Jisuni uklogo phaiwi bini dulai buchuk tangwi rw phai kha. Aboni logi’-no thẃi thak kha. 45“Ano abo tang phai?” hwnwi Jisu sẃng kha.

Kebo gosi li ya, hakhe Pitor hai hwnwi sa kha, “Hoda, yang-yangni borok kwbángma kese-rebe khe nini sago hai’-no klai rw phaijak bla!”

46Tamo khe Jisu hai hwnwi sa kha, “Ano khoroksa swk ta se tang kha ta. Ani bisingni phan ongkhorwi thángmani ang romwi mano.” 47Omono khogwi tonwi manna nuhur li ya khe a bwrwi kwlwi twtwi Jisuni yakung yaphango klai rw phai kha. Hakhe tamni bagwi bo Jisuno tang kha, bahai khe tangma logi’-no ham kha, jotoni bwskango bo o kókno saui khna rw kha. 48Jisu bono hai hwnwi sa kha, “Bwrwima, nini poito nono ham rw kha; kwchang kwchang khe tháng si di.”

49Bo kók saui tong phuru thumnokni hodani nokni borok khoroksa phai kha. “Nwsajwk thwi kha. Hodakrano tei ta leng rw si di,” hwnwi bo Jairno sa phai kha.

50Jisu o kók khnaui Jairno hai hwnwi sa kha, “Ta kiri di, poito simi khlai di. Bo ham phinai.”

51Jisu nogo sógwi khe Pitor, Johon, Jakob bai a bwrwini buma buphano simi hap rwui tei kebono bo bai baksa hap rw li ya. 52Jotono a bwrwini bagwi muisubuk chaui kap lai tong lai kha. “Ta kap lai di, o chwrai thwi ya; thu-ui se tongo!” hwnwi Jisu sa kha.

53Bo kwthwi se hwnwi bórok le saui manjak ba, aboni bagwi bórok bono mwnwi laiwi tong kha. 54Hai phano Jisu bini yak romwi “O bwrwima, bacha di!” hwnwi sotonwi sa kha. 55hakhe bini phola kiphilwi bo doropsa thangwi bacha kha. Hakhe bo a chwraino chána rw gra di hwnwi bórokno sa kha. 56Buma buphasong belai uanajak bai kha; bo a wngmano kebono ta sa di hwnwi bórokno ragdama khlai sa kha.

Currently Selected:

LUK 8: KOKBSI

Highlight

Copy