LUK 9
9
Sagri chiknwirokno pírna rohormani
(Mat 10.5-15; Mar 6.7-13)
1Sagri chiknwirokno Jisu kwrẃngsa khe ringwi bórokni yago bebak mwtai hamya rwkhlainani bai hamyarok ham rwnani phan rw kha. 2Hakhe Kaitorni hani kók pírnani tei hamyarokno ham rwnani bagwi bo bórokno rohor kha. 3Bo bórokno hai hwnwi sa kha, “Lama him thani mungsa phano ta tẃi di; raidang buya, bogol buya, maichu buya, rang buya kamchlwi suda kangsani bára ta tẃi di. 4Norok kasa rwjakmani a nogo’-no tong di, phiya a taunni kutul ya sak arono tong di. 5Norokno yachak sokyarokni tauno ta tong bu di. Bórokno hus khlai rwna bagwi yakung hadlwi bupraui kabu di.”#Sam 13.51.
6Sagrirok aroni kak laiwi kami brúm brúm thángwi joto jaga-o Kothoma Kaham pírna bai hamya ham rwma bai khali tongwi lai kha.
Herod uanajakmani
(Mat 14.1-12; Mar 6.14-29)
7Galilini habugra Herod aswk wngmarokno khna kha. Bo belai uanajak kha, tamni hwn khe “Baptisma rwnai Johon thangcha phiro,” hwnwi baksa baksa sa lai-o. 8Baksa ba “Elia nukjak phai-o,” hwnwi sa lai-o, baksa ba “Agini diyarirokni bere khoroksa thangcha phiro,” hwnwi sa lai-o.#Mat 16.14; Mar 8.28; Luk 9.19. 9Herod hai hwnwi sa kha, “Ang agi’-no Johonni bokhorok tan rwui khibi kha. Ang omo tẃi kókmung khnamani o borok le sabo sla?” Bo Jisu bai malaina naiwi tong kha.
Borok khorok basaino Jisu chá rwmani
(Mat 14.13-21; Mar 6.30-44; Joh 6.1-14)
10Bórok khlaiwi phaimarokno chonghorrok kiphilwi Jisuno sa phai kha. Bo bórokno bini logi tlang kha, hakhe bórok simi Betsaida tauno tháng kha.
11Bororok abono saui man kheno bono rwkthar lai kha. Bo bórokno yachak sok kha, hakhe Kaitorni hani kók bórokno saui khna rw kha, phiya hamya hamna muchungnairokno ham rw kha.
12Sal thángnanogo sagri chiknwirok Jisuno hai hwnwi sa phai kha, “O bororokno rohor si di. Bórok gana-gini kamirogo thángwi tongna-chána jugali thung; oro mungsa phano manthok ya.”
13“Norok’-no chá rw di,” hwnwi Jisu sa kha.
Hakhe bórok hai hwnwi sa lai kha, “Ruti lepba bai á maknwi simi se chini thani tongo. Aswk bororokni bagwi nwng chwngno chámung pai di da hwn?” 14(Aro chwlarok simi’-no khorokbasai wng anw.)
“Bororokno bachi bachi khe achuk rw di,” hwnwi Jisu bini sagrirokno sa kha.
15Sagrirok abo hai kheno bebakno achuk rw kha. 16Jisu a ruti lepba bai a á maknwi naui nokhasa naisaui Kaitorno hambai rw kha. Hakhe bo ruti bai áno swkagwi lukuno rw di hwnwi sagrirokno rw kha. 17Bórok bebak’-no ok pungwi chá kha. A bororok cháma bára tong rwkmarokno sagrirok khochamani ura chiknwi pung kha.
Jisuno Masia hwnwi Pitor gosimani
(Mat 16.13-19; Mar 8.27-29)
18Salsa Jisu saichung suri sanwi tong phuru sagrirok bini thani phai kha. “Bororok ano sabo hwn?” hwnwi bo bórokno sẃng kha.
19Bórok hai hwnwi sa kha, “Baksa nono baptisma rwnai Johon hwn lai-o, baksa ba Elia hwn lai-o, phiya agini diyarirokni bere khoroksa thangcha phiro hwnwi baksa ba sa lai-o.”#Mat 14.1-2; Mar 6.14-15; Luk 9.7-8.
20Jisu bórokno hai hwnwi sẃng kha, “Norok le tamo hwn? Ang sabo?”
“Nwng Khristo, Kaitor bai rohorjaknai Masia,” hwnwi Pitor sa kha.#Joh 6.68-69.
Bo butharjagwi se thwinai hwnwi Jisu samani
(Mat 16.20-28; Mar 8.30—9.1)
21“Buino omono ta sa di,” hwnwi Jisu bórokno ragdama khe saui rw kha. 22Bo hai hwnwibo sa kha, “Borokni Sajla panjalwi’-no sátokjakna nangnai, okra chakrarok, ochai okrarok tei Kerong phrwngnairok bai norjakna nangnai. Bo butharjaknai, hai phano salthamni salo mwthangwi tisajaknai.”
23Bo bebakno hai hwnwi sa kha, “Ani logi phaina khe a borok bini sakni kók ta uansuk thung, sal brúm brúm sakni krus balwi ani logi phai thung.#Mat 10.38; Luk 14.27. 24Kwthang tongna muchungnai borok bo thwinai; phiya ani bagwi thwinai borok bo thangnai.#Mat 10.39; Luk 17.33; Joh 12.25. 25Thwi tháng kha hwn khe eba komorwi tháng kha hwn khe bebak swngcharno manẃi ba a borok tamo manma klai? 26Ano tẃi eba ang samani kókno tẃi tumungno khoroksa swk lachijak khe Borokni Sajlabo sakni chẃngsacha bai, Buphani chẃngsacha bai tei suari kwtharrokni chẃngsacha bai chẃngsacha khe phai phuru a borokno tẃi lachijaknai. 27Muitu narwk di, oro baksa tongo Kaitorni ha nuk ya sak thwi glak.”
Jisu mul philmani
(Mat 17.1-8; Mar 9.2-8)
28Jisu o kókrok sa laimani nokha salchar lái khe bo Pitor, Johon tei Jakobno bini logi tlangwi suri sanna bagwi hathái-o kasaui tháng kha. 29Bo suri sanwi tong phuru bini mwkhang juda wngwi tháng kha, bini rírokbo chẃngsaui phurchaui phai kha. 30Achomsa nai ba borok khoroknwi bo bai kók sa laiwi tong lai kha. Bórok wng kha Musi bai Elia. 31Bórok chuknohani chẃngsacha bai nukjak phai kha, hakhe Kaitor bwkha chapma tẃi Jisu Jerusalemo butharjaknani kókno sa lai tong lai kha. 32Pitor bai bini logisongrok jai kheno muktrwi tháng laijak. Bórok sichaui Jisuno chẃngsajak nuk kha, bo bai bachajak a borok khoroknwinobo nuk kha. 33A borok khoroknwi Jisu bai kagwi thángna nai phuru Pitor bono ahai hwnwi sa kha, “Hoda, chwng oro tongmani abo kaham’-no. Chwng oro basai khungtham tang anw, nini khungsa, Musini khungsa tei khungsa Eliani.” (Aile bo tamo saui tong kha abo bo’-no saui man ya.)
34Bo o kók saui tong phuru chumui dolasa bórokno kobol phai kha; bórokno chumui kobol kheno sagrirok kirijak kha. 35Aphuru chumui bisingni o kók sakhlaijak kha, “Bo ani Sajla, ani chongjak; bini kók khna di!”#Jis 42.1; Mat 3.17; 12.18; Mar 1.11; Luk 3.22.
36O kók sajak bai khe nai ba Jisu saichung se. Sagrirok siring sorok, a nukmanino bórok aphuru khoroksano phano sa li ya.
Jisu chwrai khoroksano sra rwmani
(Mat 17.14-18; Mar 9.14-27)
37Teini salo bórok hatháini ongkhorwi phai kha, aphuru borok kwbángma Jisu bai malai phai kha. 38Borok kwbángma bisingni borok khoroksa hai hwnwi chirikhók kha, “Hodakra, ani chwraisano kisa nai jaba di, omo simi’-no ani chwla bwsa! 39Bono mwtai hamya masa achomsa chirikhógwi kolob phai-o, hakhe bono leng rwui khuktwi phena ongkhor rw-o; bono akhini’-no leng khro-khro khlai ya sak thángna nai ya. 40Ang nini sagrirokno bono sra rw ja di hwnwi koimani, bórok man li ya.”
41Hakhe Jisu hai hwnwi sa kha, “Norok bwswk se poito kwrwi gwja! Norok bwswk se cha ya gwja! Norok bai ang tei sal bwswk ma tongna nangno? Tei sal bwswk khá ma lokna nangno? Nwslano oro tubu di.”
42A chwrai phai phuru bono a mwtai ha-o popsa khiklaiwi leng rw kha. Jisu a mwtai hamyano damrogwi chwraino sra rw kha, hakhe buphani yago kiphilwi rw kha. 43Kaitorni phan kwplaino nugwi bebak’-no uanajak bai kha.
Bo butharjakna kókno Jisu hai’-no hai samani
(Mat 17.22-23; Mar 9.30-32)
Jisu samung khlaimarokno nugwi bebak’-no mwlang chaui tong bai kha. Aphuru Jisu bini sagrirokno hai hwnwi sa kha, 44“Ani o kókrokno khunju kan di. Borokni Sajla bororokni yago yapharwi rohorjaknai.” 45Bórok o kókno romwi man li ya. Bórok romwi ta man thung hwnwi’-no a kókno khogwi ton kha. Hai phano “O kókno swbai sa di,” hwnwi bórok bono sẃng rak li ya.
Sabo tor kuk?
(Mat 18.1-5; Mar 9.33-37)
46Bórokni bisingo sabo tor kuk, o kókno tẃiwi sagrirok tokra rw lai tong lai kha.#Luk 22.24. 47Bórok uansukma kókno Jisu saui manẃi chwrai khoroksa náhárẃi gana-o bacha rwui 48hai hwnwi sa kha, “Ani mungwi o chwraino yachaknai borok bo ano’-no yachago; phiya ano yachaknai borok bo ano rohornainobo yachago. Norokni bisingo kusu hwn khe bo’-no tor kugo.”#Mat 10.40; Luk 10.16; Joh 13.20.
Norokno kebeng ya borok bo norokni bwkhak se
(Mar 9.38-40)
49Aphuru Johon hai hwnwi sacha kha, “Hoda, nini mungwi khoroksano mwtai hamyarok rwkhlaimani chwng nuk kha. Chini borok ya hwnwi chwng bono ahai ta khlai di hwn kha.”
50Jisu bono hai hwnwi sa kha, “Hai ta hwn di. Norokno kebeng ya borok bo norokni bwkhak se.”
Samaria kami khungsa Jisuno yachak sok li ya
51Jisu chuknoha-o tisaui tlangjaknani sampha rwrwk kha, hakhe bo Jerusalemo thángna hwnwi khá chong súk kha. 52Bo kók tunnai borok rohor gra kha, bórok nangmani manwi jugalina hwnwi Samariani kami khungsa-o thángwi habwi kha. 53Tamo khe Jisu Jerusalem bwkhak thángnai hwnwi aroni bororok bono yachak li ya. 54Sagri Johon bai Jakob abono nugwi hai hwnwi sa kha, “Subrai, bórokno gaija rwna bagwi chwngno nokhani hór tikhlai di da hwn?”#2Ha 1.9-16.
55Jisu bórokno uphilwi naisigwi khorai kha. 56Aboni ulo bórok tei khungsa kami-o tháng lai kha.
Jisuni logi tongna nainairok
(Mat 8.19-22)
57Bórok lama himwi tong phuru borok khoroksa Jisuno hai hwnwi sa kha, “Nwng tháng thani angbo thángnai.”
58Jisu bono hai hwnwi sa kha, “Siyalni hakhor tongo, toksa-toktẃirokni bothop tongo, Borokni Sajlani le kwrẃngsa phano bokhorok bomna se kwrwi.” 59Bo tei khoroksano hai hwnwi sa kha, “Ani logi phai di.”
Hakhe a borok Jisuno hai hwnwi sa kha, “Aphano phobwi rwi grana.”
60Jisu hai hwnwi sa kha, “Kwthwi bai kwthwino phob lai thung. Tháng di nwng, Kaitorni hani kók pírwi di.”
61Tei khoroksa hai hwnwi sa kha, “Hodasa, ang nini logi thángnai, tamo khe nokni bororokno saui phai grana.”#1Ha 19.20.
62“Al chuai twtwi uklok naisik naisiknai borok bo Kaitorni hani borok wngna chúk ya,” hwnwi Jisu sa kha.
Currently Selected:
LUK 9: KOKBSI
Highlight
Share
Copy
Want to have your highlights saved across all your devices? Sign up or sign in
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.
