LUK 6

Sabat salni kók sẃngmani

(Mat 12.1-8; Mar 2.23-28)

1Salsa Sabat salo Jisu gom bwlwng bising-bising himwi thángmani. Bini sagrirok him lai twtwi gom bwtang cherwi khugwi chána cheng lai kha.#Uái 23.25. 2Hakhe Pharisai khoroknwi khoroktham hai hwnwi sa kha, “Sabat salo ta khlai di hwnwi chini Kerong samani abono norok tamo wngwi khlai?”

3Jisu bórokno hai hwnwi sa kha, “Daud tei bini bayaprok ok khuijak phuru tamo khlai kha, abo norok poriui nai ya kho diba? 4Bo Kaitorni nogo habwi Kaitorno barokmani a ruti naui bo’-bo chá kha, bini logisongroknobo chá rw kha; aile ochairok simi se a ruti cháui mano, bui chá khe abo kerong swbaima klai-o.”#Leb 24.9.

5Bo bórokno hai hwnwi sa kha, “Borokni Sajla sabat salni bokhorok.”

Yak hoichajakano Jisu ham rwmani

(Mat 12.9-14; Mar 3.1-6)

6Jisu tei kaisa Sabat salo thumnogo habwi phrwngwi kha. Aro borok khoroksa yagra yak hoichajak tongo. 7Kerong phrwngnairok bai Pharisairok Jisuno majra berna lama naitugwi Sabat salo khoroksa swkno ha da ham rwno hwnwi bórok bono oiran khe naichom laiwi tong lai kha. 8Bórok uansukma kókno Jisu saui man phano bo a yak hoichajak borokno “Oro bachaui phai di,” hwnwi sa kha. A borok thángwi aro bachaui kha. 9Hakhe Jisu bórokno hai hwnwi sa kha, “Ang norokno o kók sẃngo, Sabat salo tamo tamo khlaiwi man hwnwi Kerongo sa? Kaham da khlai di hwn hamya? Mwthang di da hwn buthar di?” 10Bo yang yang bebakno naisigwi a borokno hai hwnwi sa kha, “Nini yak pholok di.” Hakhe bo yak pholok khe bini yak ham phi kha.

11Yang khe bórok belai jolijagwi Jisuno tamo khlainai hwnwi sa lai kha.

Jisu chonghor chiknwirokno chongmani

(Mat 10.1-4; Mar 3.13-19)

12Aphuru suri sanna hwnwi Jisu hathái-o kasaui tháng kha; hopung Kaitorni thani suri san kha. 13Ai khe bo bini sagrirokno bini thani ring kha, hakhe bórokni bere chiknwirokno chonghor hwnwi chong kha. 14Bórok khe Simon, Jisu bono Pitor hwnwi phar kha tei bini takhuk Andria, Jakob bai Johon, Philip, Bartholomai, 15Mathai, Thoma, Alphaini bwsla Jakob, Simon bo hano hamjaknaisa hwnwibo hwnjago, 16Jakobni bwsla Juda, tei khoroksa hwn khe Jisuno rom rwnai Judas Iskariot.

Jisu hamyarokno ham rwmani

(Mat 4.23-25)

17Jisu a sagri chiknwirok bai baksa hatháini ongkhorwi phaiwi teibo pal kotor sagrirok bai baksa panthoro bacha phai kha. Aro Judiani, Jerusalemni, phiya Tur bai Sidon taun bwkhakni twijlang ganani borok kwbángma phai kha. 18Bórok bini kók khnana bagwi tei hamya hamna hwnwi phai-o. Mwtai hamya kolobjakrokbo phai kha, swbo sra rwjak kha. 19Bini bisingni phan bai hamya ham rwma nugwi bororok bebak’-no bono tangna nai lai kha.

Kaham bai hamyani lama

(Mat 5.1-12)

20Jisu bini sagrirokno naisigwi hai hwnwi sa kha,

“Kwrwirok norok hamchajak;

Kaitorni ha norokni’-no!

21“Tabuk ok khuijakrok norok hamchajak;

norok ok supungjak anw!

“Tabuk kapnairok norok hamchajak;

norok ma mwnwi anw!

22“Borokni Sajlani bagwi norokno bui naisler khe, norokno basi khe, norokno lachi rw khe tei norokno hamya hwn khe norok hamchajak!#1Pi 4.14. 23Abo tẃi wng phuru khápang srang di, tongthok bára khe mwsa di, tamni hwn khe chuknoha-o norokni bagwi sokat kwbángma khatijak tongo. Bórokni chuchusong diyarirokno ahai’-no khlai lang kha.#2Bo 36.16; Sam 7.52.

24“Phiya, gwnangrok norok bwswk se hamya sitra no;

tamni hwn ba norokni tongthok

norok man bai kha!

25“Tabuk ok pungjakrok norok bwswk se hamya sitrano;

norok ok khuiwi ma tong anw!

“Tabuk mwnwinairok norok bwswk se hamya sitrano;

norok muisubuk chaui ma kap anw!

26“Joto bai kaham hwnjak khe norok bwswk se hamya sitra no; tamni hwn khe bórokni chuchusong diyari phatrarokno ahai kheno kaham hwn lai-o.”

Kena arirokno hamjak di

(Mat 5.38-48; 7.12)

27“Ani o kókno khnanairokno ang hai hwnwi sa-o: Norokni kena arirokno hamjak di, norokno naislernairokni kaham khlai di. 28Norokno swrainairokno kaham wng di hwnwi sa di, norokni hamya khlainairokni bagwi suri san di. 29Khoroksa swk nono khangaro thapra rw khe tei yasa khangarnobo hadiui rw di; khoroksa swk nini dulai sek khe kamchlwibo rw di. 30Nono mungsa swk sannairokno a manwi rw di; nini manwi khoroksa swk tlang khe abono ta san phi di. 31Norok bui bai khlaijakna muchung tẃi’-no norokbo buino khlai di.#Mat 7.12.

32“Norokno hamjaknairokno simi hamjak khe norok tamo khe hamnai? Borok hamyarokbo bórokno hamjaknairokno hamjago. 33Norokni kaham khlainairokni simi kaham khlai khe norok tamo khe hamnai? Borok hamyarokbo abo tẃi ba khlai lai bla. 34Su-ui man thotokrokno simi solok rw khe norok tamo khe hamnai? Rwmano man phir anw hwnwi borok hamyarokbo solok rw laiwi tong lai bla. 35Phiya ba kena arirokno se hamjak di, bórokni kaham khlai di, solok rw di, abono man phina ta muchung di. Hai khe norok sokat kwbángma mannai, phiya Kaitor Kotorni bwsa wngnai; tamni hwn khe kaham khlaijak phano khlaijak ya hai wngjaknairokno tei chengtaroknobo bo khairogo. 36Norokni Pha hai norokbo maya gwnang wng di.”

Buino majra ta ber di

(Mat 7.1-5)

37“Buino majra ta ber di, hakhe nwng bo majra berjak glak; buino borok hamya hwnwi phunukna ta nai di, hakhe nwng’-bo borok hamya hwnwi phunukjak glak; buino nakar di, hakhe nwng’-bo nakarjak nai; 38buino rw di, hakhe nwngbo rwjak anw. Katswi kwbángma khlaiwi, sinklwk sinklwgwi daui, jangri jangriui supungwi rwjak anw, pungma bára se kwsar anw. Phiya nwng buino su-ui rwma hai’-no nwngbo su-ui rwjak anw.”

39Jisu bórokno o rwngthoma sa kha, “Mokol nuk ya bai mokol nuk ya da lama phunugui tlangwi man lai? Khoroknwi’-no hakhoro pulumsa wng glak diba? 40Phrwngnaini slái srwngnai kotor ya; tamo khe srwng baisuk khe le phrwngnai bai baksa wngnai.#Mat 10.24-25; Joh 13.16; 15.20.

41“Tamni nini takhukni mokolo buphang biphiring tongma simi nwng nuk? Nini mokolni buphang bokocho le tamni nuk ya sla? 42Ahai tw tẃi bahai khe nini takhukno ‘Phai di, nini mokolni buphang biphiring tikhlai grana,’ hwnwi sanai ba? O phatra, nini mokolni buphang bokocho tikhlai gra di, hakhe nini takhukni mokolni buphang biphiring tikhlaina bagwi kaham khe nuk anw.”

Bwthái bai’-no buphang sinijago

(Mat 7.16-20; 12.33-35)

43“Buphang kaham bwthái hamya thái ya, phiya buphang hamyabo bwthái kaham thái ya; 44tamni hwn ba bwthái bai’-no joto buphang sinijago. Busulwngo kebo khwichang khak ya, eba khe raisoklwngo kebo angur khak ya.#Mat 12.33. 45Borok kaham bwkha-o kaham chu-ui tonmani aroni kaham tikhlai-o; borok hamya ba hamya chu-ui tonmani aroni hamya tikhlai-o. Bwkha-o kupulung wngwi tongma hai’-no borok búkhúk bai sa-o.”#Mat 12.34.

Nok tangnai khoroknwirok

(Mat 7.24-27)

46“Norok ano tamo wngwi ‘Subrai, Subrai,’ hwn, aile ang sama hai tong lai ya? 47Ani thani phaiwi ani kók khnaui abo hai tongnai a borok bubo tẃi borok saui khna rw anw. 48Bo holongdap saka nok tangnai hai. A borok hakhor kuthuk khe chogwi holongdap saka nokthai lu kha; ulo twisa twi torwi a nok lom phai kha, a nok kuak li ya; abo kwrak khe tangjak. 49Phiya, ani kók khnaui abo hai tong ya a borok nokthai kwrwi-o nok tangnai hai. Twima-o twi torwi phai kheno a nok logi logi’-no kuagwi tháng kha; a nok bwswk kirimasingcha khe gurumui kuak kha.”

Currently Selected:

LUK 6: KOKBSI

Highlight

Copy