LUK 5

Puilani sagrirokno Jisu ring gramani

(Mat 4.18-22; Mar 1.16-20)

1Salsa Genesaret twibom rukungo Jisu bachaui tong phuru bororok uphla káphla khe Kaitorni kók khnanani hwnwi bini sago phaiwi klaiwi rw phai bai kha, 2bo twibom rukungo rung khungnwi nuhur kha; gaborrok rungni ongkhorwi cheirok sú-ui tongwi lai-o. 3#Mat 13.1-2; Mar 3.9-10; 4.1.Bo rung khungsa-o kasa kha; abo Simonni rung; hakhe bono twi rukungni tei kisa hakchalo tlang di hwnwi sa kha. Hakhe bo rungo achugwi lukuno phrwng kha.

4Bo kók sa baiwi Simonno hai hwnwi sa kha, “Twi kuthugo rung tlang di, hakhe a romna bagwi chei bu di.”

5 # Joh 21.3. Simon hai hwnwi sa kha, “Hoda, chwng hopung bu sini bu-ui masa phano man ya. Hai phano nini kók bai tei uáisa bu khe bu-ui nai phina ta.” 6#Joh 21.6.Bórok chei bu-ui nai ba á kwbángma kasaui chei se kichik twtwi wngwi tong kha. 7Hakhe bórok kubun rungni logisongrokno yak tail khlaiwi á rom chru phai di hwn hor kha. Bórok phaiwi rung khungnwino a supung phai kha; á belai bángma bagwi rung se kwlwkna naiwi tong si-o. 8Ahai wngmarokno nugwi Simon Pitor Jisuni yakung yaphango klaiwi “Subrai, ang sumsok gwnang borok! ani oroni tháng di!” hwnwi sa kha.

9Simon bai bini logi-o tongnairok aswk á kwbángma khlaima nugwi uanajak lai kha. 10Simonni logisong Sebedaini bwsla takhuknwi Jakob bai Johonbo abo hai’-no uanajak kha. Hakhe Jisu Simonno hai hwnwi sa kha, “Ta kiri di, tabukni simi nwng borok rom anw.”

11Rung khungnwino hakungo tisaui bórok tong kwrwi bebak’-no khibi kabu-ui Jisuni logi tháng lai kha.

Biyadi chájakno Jisu ham rwmani

(Mat 8.1-4; Mar 1.40-45)

12Salsa Jisu taun khungsa-o tongmani, aro bwsak gwnangwi biyadi chájak borok khoroksa tongo. Bo Jisuno nuk kheno pwtapsa klaiwi hai hwnwi koiwi kha, “Hodasa, nwng ano ham rwna khe ham rwui mano.”

13Jisu yak phologwi bono tangwi “Ham di, ang nai-o,” hwnwi sa kha. Logi logi’-no a borokni biyadi kwmaui tháng kha. 14“O kókno kebono ta sa di,” hwnwi Jisu sa kha. “Tháng di, ochaino thángwi phunugui di. Nwng tabuk ham kha hwnwi lukuno phunukna bagwi Musi rathar di hwnwi dagima hai’-no ratharwi di.”#Leb 14.1-32.

15Hai phano Jisuni kók yang yang kaham khe pírjak kha. Bini kók khnana hwnwi tei hamya hamna hwnwi borok kwbángma bini thani phai lai kha. 16Bo khe siring siring kwrẃngsa-o thángwi suri sanwi tongwi kha.

Yakung yak man yano Jisu ham rwmani

(Mat 9.1-8; Mar 2.1-12)

17Salsa Jisu bororokno phrwngwi tong phuru baksa Pharisairok tei Kerong phrwngnairok aro achuk laijak. Bórok Galili bai Judiani bebak kamiyungni tei Jerusalemni phaimani. Jisu hamyarokno ham rwna bagwi Subraini phan manjak. 18Aphuru borok khoroknwi khoroktham uaingo khe balwi yakung yak man ya khoroksano tubu-ui phai kha. Bórok bono nok bisingo sitogwi Jisuni bwskango tonna nai kha. 19Borok kwbángmani bai bórok bono bisingo sitoknani lama man li ya, hakhe bórok bono núkhúng saka tlang kha, hakhe núkhúng khugwi uaing bai bono buini kwcharo Jisuni bwskango tikhlaiwi rohor kha. 20Bórok aswk poito khlaimano nugwi Jisu a yakung yak man yano “Kiching, nini sumsok nakarjak kha,” hwnwi sa kha.

21Hakhe Kerong phrwngnairok tei Pharisairok hai hwnwi uansuk lai kha, “Kaitorno omo hai khe hamya sanai o borok sabo? Kaitorno karwi sumsok nakarwi mannai tei sabo tong?”

22Bórok uansukma kókno Jisu saui manẃi hai hwnwi sa kha, “Tamo wngwi norok omo hai uansuk lai? 23‘Nini sumsok nakarjak kha,’ hwnwi sana da lai kuk eba khe ‘Bachaui him gra di,’ hwnwi sana da lai kuk; bubo lai kuk? 24Hakhe o swngcharo Borokni Sajla sumsok nakarwi mano abono ang norokno phunuk anw.” Hakhe a yakung yak man yano Jisu hai hwnwi sa kha, “Ang nono sa-o, bacha di, nini uaing khochaui nogo tháng di.”

25A borok logi logi’-no bebakni bwskango bini uaingno khochaui Kaitorno lob twtwi nogo tháng kha. 26Bebakno belai uanajak bai kha, hakhe “Chwng tini uanamasingcha manwi nuk kha,” hwnwi bórok kirima habwi Kaitorno lob lai kha.

Lebino Jisu ringmani

(Mat 9.9-13; Mar 2.13-17)

27Aboni ulo Jisu ongkhorwi tháng kha, aphuru Lebi hwnwi teks romnai khoroksano bini tangnogo achugwi tongma nuhur kha. “Ani logi phai di,” hwnwi Jisu bono ring kha. 28Hakhe bo bachaui tong kwrwi bebak’-no khibiui klangwi Jisuni logi tháng kha.

29Lebi aphuru khe bini nogo Jisuno tẃiwi panda kotor achuk rw kha; hakhe aro teks romnairok tei kwbángma kubun bororok bórok bai baksa panda-o achuk laijak. 30Hakhe Pharisairok baksa tei bórokni bisingni Kerong phrwngnairok bini sagrirokno hunu-hanai khe hai hwnwi hwn lai kha, “Norok tamo wngwi teks romnairok bai tei basijakrok bai baksa chá lai-nung lai?”#Luk 15.1-2.

31Jisu bórokno hai hwnwi sa kha, “Kahamni daktor nang ya, hamyani se nango. 32Ang bórom gwnangrokno sumsok yakar di hwnwi sana phai ya, basijakrokno se ang sana phai-o.”

Ubasni kók sẃngmani

(Mat 9.14-17; Mar 2.18-22)

33Baksa bororok Jisuno hai hwnwi sa kha, “Johonni sagrirok udam udam ubas khe suri sano, Pharisairokni sagrirokbo ahai’-no khlai-o; nini sagrirok le chá-o nungo.”

34Jisu hai hwnwi sa kha, “Káijaknaisa tong twtwi kái lai panda-o phainairok ma chá ya wng anw da norok hwn? I’nhi, ahai ya. 35Tamo khe omo tẃi sal phai anw káijaknaisa bórok bai swkagwi tlangjak anw, a salo bórok chá yaui ma tong anw.”

36Jisu bórokno o rwngthomabo sa kha, “Rí kwtal sichigwi khoroksa phano rí kwchamo thap ya; thap khe bo rí kwtalno kichik rwnai, phiya rí kwcham bai rí kwtal mwchang lai glak. 37Eba khe khoroksa phano angur bwtwi kwtalno twk mosonjago ton ya; ton khe angur bwtwi kwtal a twkno rechek-rachak khlainai, hakhe bwtwibo kwsar bainai, twkbo báinai 38Tamo khe angur bwtwi kwtalno le twk kwtalo’-no tonna nangnai. 39Angur bwtwi kwcham nung baiwi kebo kwtal san ya; ‘Kwcham’-no kaham’ hwnwi bo sa-o.”

Currently Selected:

LUK 5: KOKBSI

Highlight

Copy