YAPHANG 23
23
Sara thwimani tei Abraham simalwngni bagwi ha paimani
1Sara nokha bisi sara tei nwichisni jora kwthang tong lang kha; Sara omo swk bisi tong lang kha. 2Bo ha Kananni Hebrono thwi-o tei Abraham bini bagwi bwkha khamwi kap kha.
3Abraham a kwthwino klangwi Hitisarokni thani thángwi hai hwnwi saui kha. 4#Hib 11.9,13; Sam 7.16.“Ang buini hani borok norokni ha-o tong janai se; ani bwskangni mang kwthwino phobna bagwi ano ha kisa rw ja di.”
5Hakhe Hitisarok Abrahamno hai hwnwi sa kha, 6“Hodasa chini kók khna di; nwng chini bisingo phankrak tẃiphang. Nwng nini muchungma mangkhoro’-no nini mang kwthwi phob di; chini bisingo khoroksa phano bini mangkhoro’-no rw yaui tong glak eba nini kwthwino phob rw yaui tong glak.”
7Abraham bachaui a hani borok Hitisongno khulum kha. 8Tei bo bórokno hai hwnwi sa kha, “Norok ani mang kwthwino oro phob rwna lon khe, ani kók khna ja di; Joharni bwsla, Ephronni 9Makpelani hakhorno ano rwna bagwi saui rw di; abo bini hani páithago. A hano ang a mangkhorno paiwi namani marini bagwi bebak rang norokni bwskango’-no bono rwui páinai.”
10Ephron Hitirokni bisingo’-no achukjak, kamiyungni duglamo aro thángnai bebak Hitisarokni bwskango Hitisa Ephron Abrahamno sa kha, 11“I’nhi hoda ani kók khna gra di; ang nono a hanobo rw-o tei a hakhornobo rw-o; ang omo ani borokrokni bwskango’-no rw-o; nini mang kwthwino phob di.”
12Hakhe Abraham a hani borokrokno khulum kha. 13Hakhe bo bebak lukurokno khna rwui Ephronno hai hwnwi sa kha, “Nwng muchung khe ani kók khna ja di, ang ani mang kwthwino oro phobwi manna bagwi ang o hani rang rwmano yachak ja di.”
14Ephron Abrahamno hai hwnwi sa kha, 15“Hoda, ani kók khna ja di; ha phalasani rang khe brwi-ra rukphai budul se, abo nini bai ani bisingo ba tamo? Nini kwthwino phob di.” 16Abraham, Ephron bai lon lai kha; bo Ephronno Hitisarokno sama swk’-no rw kha, abo ra brwi rukphai belep, a jora-o bepar thwngnairokni rwta tẃi khe abono rwta kha.
17Mamreni salkabai-o Ephronni Makpelani ha tei aro tongma hakhor tei charani buphangrok, bebakno, 18Hitisarokni bwskango’-no tei bebak kamiyungni duglamo thángnairokni bwskango Abrahamni hwnwi rwjak kha.
19Aboni ulo khe Abraham bihik Sarano Mamreni salkabaini Makpela-o tongma a hakhoro phob kha, (abo wng kha Hebron) abo Kanan ha-o. 20Aroni ha tei aro tongma hakhor bebak Hitisarokni yakni paiwi Abraham bebakni nokphang wng kha.
Currently Selected:
YAPHANG 23: KOKBSI
Highlight
Share
Copy
Want to have your highlights saved across all your devices? Sign up or sign in
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.
