YAPHANG 22

Kaitor Isakno tanwi barok di hwnwi dagima

1 # Hib 11.17-19. Aboni sal kisa ulo khe Kaitor Abrahamno amjogwi nai kha, bo bono “Abraham” hwnwi ring kha, hakhe Abraham khorang yachagwi “Ang oro se!” hwnwi sa kha.

2 # 2Bo 3.1. Kaitor hai hwnwi sa kha, “Nwslano na di, nini hamjak kukma khoroksa susuk nwsla Isakno tẃiwi ha Moria-o thángwi ang phunukma a hathái-o tlangwi tanwi sógwi ma barogwinai.”

3Hakhe Abraham phung aidrop bacha kha tei bini korai chirka saka-o manwirok boksa kha, bo bai baksa tei khoroknwi chwla siklano tei bwsla Isakno tẃi kha; sógwi barokna bagwi bo bol tẃi kha tei Kaitor bono tháng di hwnwi sama hathái phaising lam rwui tháng kha. 4Salthamni salo khe Abraham tháng di hwnjakma a hatháino naisik horwi hakchal khe nuhur kha. 5Aphuru khe Abraham bo bai baksa tlangma a sikla khoroknwino hai hwnwi sa kha, “Oro korai chirka bai baksa tong rwk di; ang bai chwraisa simi aro thángwi khulumui norokni thani kiphilwi phai anw.”

6Abraham sógwi barokna bagwi tlangma a bolno naui bwsla Isakno tẃi rw kha; tei bo sak khe bini yago hór bai dasano tẃi kha. 7Isak bupha Abrahamno hai hwnwi sẃng kha,

“Apha,” hakhe bupha hai hwnwi sa kha, “I’n tamo sajla?”

Isak hai hwnwi sẃng kha, “Nai di hór bai bol simi se tongo; tamo khe sógwi barokna bagwi mera le buko biyang?”

8Abraham hai hwnwi sa kha, “Sajla Kaitor baithang’-no, sógwi barokna bagwi jugaliui rwnai.” Hakhe bórok phasaknwi’-no tháng lai kha.

9 # Jak 2.21. Kaitor samani hathái-o bórok sók phai khe, Abraham aro háyá kaisa snam kha tei bolrokno jai khe bera kha tei bwsa Isakno khaui háyá-o bolrokni saka-o khe boksa kha. 10Hakhe Abraham bwslano tanna bagwi dasano kariui har kha. 11Tamo khe Subraiyungni suari chuknohani ringwi bono hai hwnwi sa kha, “Abraham, Abraham!” hakhe bo sa kha, “I’n ang oro se.” 12Kaitor hai hwnwi sa kha, “Nwng chwraini saka-o yak ta tisa di, bono mungsa ta khlai di; tamni hwn khe, ang saui man kha nwng Kaitorno kiri’-ono, ang nuk kha nwng nwsla khoroksa susuknobo ano rwnani yak kwcha li ya.”

13Abraham bokhorok tisaui naisigwi nai kha, hakhe bini uklogo budukrok bai khe bokorongo kubuljak mera masa nuk kha tei Abraham thángwi a merano romwi tubu-ui bwslani sak slái-o a merano sógwi yaphar kha. 14Aboni bagwi Abraham a hatháino Subraiyung se Jugaliui rwnai#22.14: Subraiyung se Jugaliui rwnai: Hibru kók bai “Jehoba-Jire”. hwnwi mung phar kha; a kók tabuk jorabo sajagwi’-no tongo, “Subraiyungni hathái-o Jugaliui rwjaknai.”

15Subraiyungni suari chuknohani tei uáisa Abrahamno ringwi sa kha, 16#Hib 6.13-14.“Ang baithangni mung bai’-no swmai tangwi sa-o, nwng omo tẃi samung tang kha, nwsla khoroksa susukno narwgwi ton li ya, 17#Hib 11.12.Ang nono hamari rw sinai’-no, ang nini bosongno nokhani athukiri hai khe tei twijlang rukungni hasing hai khe er rwnai. Tei nini bosongrok bórokni arirokni hapmani duglamno seknai, 18#Sam 3.25.phiya nini bosongrokni tẃi khe ha sakani bebak dopharok hamari mannai, tamni hwn ba nwng ani kókno khna kha.” 19Hakhe Abraham bo bai baksa khe tubuma a sikla khoroknwirokno kabuma-o kiphilwi phai kha tei pal khe lam rwui Birseba-o tháng lai kha; tei Abraham Birseba-o kami khaui tongwi kha.

Nahorni bosong

20Aboni sal kisa ulo khe Abraham hai hwnwi sajak kha, “Nai di Milka nini takhuk Nahorni bagwi bwsarok bá kha. 21Uj wng kha okra, buphayung khe Buj, Kemuel khe Aramni bupha, 22tei Kesed, Hajo, Pildas, Jidlap tei Bethuel.” 23Bethuel khe Rebekani bupha. Milka-o khorokcharno Abrahamni takhuk Nahorni bagwi bá kha. 24Abono karwibo bini hik kotoi Reuma khe, Teba, Goham, Tahas tei Makano bá kha.

Currently Selected:

YAPHANG 22: KOKBSI

Highlight

Copy