YAPHANG 21

Isak achaimani

1Subraiyung kók sa langma tẃi’-no Sara bai malai phai kha tei swmai tangma tẃi’-no bo Sarani bagwi khlai kha. 2#Hib 11.11.Sara ogo bwsa wng kha tei Kaitor bono samani jora’-ono a chakra umor phuru Abrahamni bagwi chwla bwsa bá kha. 3Abrahamni bagwi Sara bámani a chwla bwsano Isak hwnwi mung phar kha. 4#Yap 17.12; Sam 7.8.Kaitor bono dagima hai kheno, Abraham bwsla Isakno achaiwi nokha salcharo sakur ra kha. 5Bwsla Isak achai phuru Abrahamni umor nokha bisi sara ká kha. 6Sara hai hwnwi sa kha, “Kaitor ano mwnwimung#21.6: Mwnwimung: Hibru kók bai Isak hwnma. khlai kha; ani o kókno khnanairok le bebakno ano mwnwinai.” 7Bo hai hwnwi sa kha, “Abrahamno sabo Sara bwsano abuk chá rwnai hwnwi sa kha mun? Hai phano bini umor chakrajak phano ang bini bagwi chwla bwsa khoroksa bá kha.”

8A chwrai tor kha tei abuk yakar khe Abraham, Isak abuk yakarmani salo chámung panda kotor kaisa khlai kha.

Hagar bai Ismael nokni tikhlaijakmani

9Salsa, Sara bwsla Isakno#21.9: Baksa kwcham kók séma-o khe Sarani bwsla Isak bai; Hibru-o o kók kwrwi. Ijipjwkma Hagar Abrahamni bagwi chwla bwsa bámani a chwraisano Isak bai khe thwng laiwi tongmano#21.9: thwng laiwi tongma; ebathesra karimano. nuk kha. 10#Gal 4.29-30.Hakhe Sara, Abrahamno hai hwnwi sa kha, “O selengjwkmano bwsa bai khe tikhlai rohor di; tamni hwn ba o selengjwkmani bwsla ani angsajla Isak bai baksa buphani manthai bantano man glak.” 11Omo belai kheno Abrahamni bwkha-o nang kha tamni hwn khe, Ismaelbo bini’-no bwsa ba. 12#Rum 9.7; Hib 11.18.Tamo khe, Kaitor Abrahamno hai hwnwi sa kha, “Nwng a chwraini bagwi tei nini selengjwkmani bagwi bwkha hamya ta wng di, Sara nono samani hai’-no nwng khlai di, tamni hwn ba Isakni bising tẃi se nini bosongni mung pharjaknai. 13Tei selengjwkmani bwsani bosongnobo ang dopha snamnai, tamni hwn ba bo’-bo nini’-no bwsa.”

14Hakhe Abraham phung aidrobo bachaui chámung tei bukurni twi dajaknai-o twi daui Hagarno rw kha, bo bwsano phikungo bárwi rwui rohor kha. Hagar lam rwui thángwi Birsebani hasinglwng bwkhak tháng kha. 15Bukurni twi tonjaknaini a twi pái khe Hagar a chwraino jabralwngni saklomo klangwi tháng kha. 16Aboni ulo khe bo thángwi kisa hakchalo achugwi tongwi kha, abo chalmani koslu kusungsa kok hórwi man anw; hakhe bo hai hwnwi sa kha, “O chwrai thwimano ang mokol baithang bahai khe nainai.” Bo bwsani bwkhak khe achugwi tong phuru a chwrai khorang torsaui kap kha.

17Kaitor a chwraini khorangno khna kha; tei Kaitorni suari chuknoha-o tong twtwi Hagarno hai hwnwi sakhlai kha, “Nini tamo dukhu tong Hagar? Ta kiri di; Kaitor a chwrai tongmani aroni bini khorangno khna kha. 18Bacha di, a chwraino nini yak bai kwbaksaui bam di; tamni hwn ba ang bono dopha kotor snamnai.” 19Kaitor bini mokol nuk rw kha hakhe samo’-no twikhor khorsa nuk kha tei bo aro thángwi a bukurni twi dajaknaino twi supungwi tubu-ui bwslano khan kha. 20Kaitor a chwrai bai tong kha tei chwraibo torsa kha; bo hasinglwngo tong kha tei belai’-no badukhung kwrwng wng kha. 21Bo Paranni hasinglwngo tong kha tei buma bini hik khlaina bagwi ha Ijipni bwrwino tubu kha.

Abraham bai Abimelek kók kha laimani

22 # Yap 26.26. A jora-o Abimelek bini sengkrak bokhorok Phikol bai khe thángwi Abrahamno hai hwnwi saui kha, “Kaitor nini bebak samungo’-no tongo; 23hakhe Kaitorni bwskango swmai tang di, nwng ano ani bwsarokno eba ani bosongrokno bandi glak. Ang nono bórom khlaiwi phai kha, abo bai’-no swmai tangwi sa di nwng’-bo ano tei nwng tabuk tongmani o hano bórom khlai tongnai.”

24“I’n ang tangnai,” hwnwi Abraham sa kha.

25Abraham, Abimelekni selengrok bini twikhor segwi namani kókno sa khe, 26Abimelek hai hwnwi sa kha, “Omo sabo khlai kha ang saui man ya; nwngbo ano sa ya kho ba, ang o kókno tini jora khw se khna ya kho.” 27Hakhe Abraham mera tei musuk chwlarokno Abimelekno rw kha tei o khoroknwirok swmai kaisa tang lai kha. 28Abraham mera bwrwi mak snino bodolni khak kha. 29Hakhe Abimelek Abrahamno hai hwnwi sẃng kha, “Nwng tamo o mera bwrwi mak snino bodolni khakma le tamni bagwi sla?”

30Bo hai hwnwi sa kha, “O mera bwrwi mak sni bodolni khakma merano nwng ani yakni yachak di, omo bai’-no ang’-no o twikhor khurmani nwng mokol baithang nukmani mari wngnai.” 31Aboni bagwino abo Birseba#21.31. Birseba: Hibru kók bai ‘Swmai Kaham’ hwnma se. hwnjago; tamni hwn ba oro’-no a khoroknwirok swmai tang lai-o.

32Hakhe bórok Birseba-o swmai tang lai kha. Aboni ulo khe Abimelek bini sengkrak bokhorok Phikolno tẃiwi bini ha Philistia-o kiphilwi tháng kha. 33Abraham a Birseba-o Tamarisk buphang káiwi Mol brúmni Kaitorno#21.33: Mol brúmni Kaitor: Hibru kók bai “El-Olam”. khulumo. 34Hakhe Abraham ha Philistia-o sal kwdwkma tong kha.

Currently Selected:

YAPHANG 21: KOKBSI

Highlight

Copy