MARK 16

Ringsulanbo

(Mt 28.1-8; Lk 24.1-12; Jn 20.1-10)

1Tabamnaise loimibo saiga, Mary Magdalene, Jacob pui Mary khatdi Salome paliuniu Jesu pumga wasa hai manuk khaira tadde. 2Nidnai nsuan kalu, naimik padgapbo tingga paliuniu charao lamse tadsude. 3Paliuniu npuiki gase khat khat khuga din-e, “ Saoniu aliuleng rawkham tuse kaladpad khai ralo?” (Sibo tukang haise disuang kha-e). 4Sichiujiu paliuniu phuikhangboga tatuse kalad padmi bamniu-e. 5Sijengniu paliuniu charao gase ngutle, siga paliuniu akhangmai khat, chafai kakabo benlujiu, majat jailam ntaobam niubo ngaode. Siga paliu hai pingchang-ping mide.

6Siga akhangmai siniu din-e, “Naliu ping mane, naliuniu singchaiga masengshat mibo Nazareth Jesu situ phiukin-e chiubo I si-e. Pah haiga hade—pah ringsulan mide! Phuilo, paliuniu haise patu baikhaibo bam haisi-e. 7#Mt 26.32; Mk 14.28.Tuhoira tadlujiu Peter nai pakhommaidung khuga haibo champao hai pikhai bilo: ‘Naliu masuang Galilee ga pah tadrai mide; paniu naliu khuga dinkhai mibo kumjiu naliuniu patu siga adao sune.’”

8Sijengniu paliuse charao gasu paliu lung magenthiubo nai pingboniu phuilujiu paktad sude. Paliuniu mai khat khugadi dinmakge, palamra paliu hai pingchang-ping mide.

Jesu Niu Mary Magdalene Khuga Lenkhaibo

(Mt 28.9-10; Jn 20.11-18)

9[Jesu niu kashaibo gasu ringsulan lubo saiga, Nidnai nsuan kalu paniu rasa chinnia hathonpad khaibo pui, Mary Magdalene khuga lenkhai raithu-e. 10Paniu tadlujiu pakahmaidung khuga dinkhai bide. Paliuse kapjiu achungbam kamme] 11Jesu ringbamme, khatdi paniu ngao-e chiubo paliu khuga dinboga, paliuniu patu malum makge.

Jesu Niu Khommai Khangnia Khuga Lenkhaibo

(Lk 24.13-35)

12Haibo saiga, Jesu niu paliu khangnia khuga, panainiu namdi npuikiga tadkinboga pathak tamjiu lenkhai-e. 13Panainiu malanwang, kaki maidung khu dinkhaiboga paliu malum makge.

Jesu Niu Khang Kariu-Je-Khatkiu Khuga Lenkhaibo

(Mt 28.16-20; Lk 24.36-49; Jn 20.19-23; Tk 1.6-8)

14Kanamthuboga, Jesu niu pakhommaidung khang kariu-je-khatkiu siniu katiu tiubamboga lenkhai-e. Paliuniu malum habo donniu, khatdi pah ringbamme chiubo ngaolu maidungtu paliuniu malum makbo jengniu sigasu paliu lungchun tanbo jengniu paliutu paniu rukhai bide. 15#Tk 1.8.Paniu paliu khuga din-e, kadihpiri pabam machang tadchiajiu Kawibo Champao hai chamai jat hina khuga paoron khailo. 16Mai khatniu malum lujiu tadui nphum lusai, patuse rankhai bine; mai khatniu malum maksai patuse kammao khai bine. 17Malum maidung situ maisuang habo ngam kamra pumtan pikhai bine; paliuniu chamtan gasu rasadungtu hathonpad lune; paliuniu katam tambo ladniu dinsune; 18paliuniu kaniu thinsu bamdi, maksai karabo-tai tiu-sak bamdi, wadi lakge; paliuniu thiuniumai riga paliu ben kabakhai sai wilu rabo-e.”

Jesu Tu Tinggen Lam Lukhang Mibo

(Lk 24.50-53; Tk 1.9-11)

19 # Tk 1.9-11. Rapiu Jesu niu paliutu npao lubo saiga patu tinggen lam lukhang mide khatdi Tingwang ben jatlam taobam mide, 20Khommaidung siniu pabam machang dinron tad sude, khatdi Rapiu niu paliutu maluang tatien thiukhai-e chiubo paliuniu dinron tadboga maisuang habo tienkamdung siniu madukhaijiu paliugu malum hai kam matip khai-e. (Chaladriang 9-20 haise khangsia maigu ariak gara khai makge).

Currently Selected:

MARK 16: LIANBSI

Highlight

Copy