LUKE 1
1
Lungsa Kakung Theophilus:
1Aliu ruangga padmibo lamga maidung kakengniu raopad raleng paliu lai padjiu kamkhai mibo-e. 2Aliuniu dinbo kumjiu paliuniu raokhai mide chiubora paphibang gasu paliuniu haidungse ngaolujiu pachamdi paoron khai mibo-e. 3Sichiujiu, Pakendibo piu yo, Iniudi paphibang gasu phui mawikhai mibo donniu, padmibo saisuijiu Idi nakhuga raokhai sai wisune chiu maningbo-e. 4Iniu haise raokhaibo lamra nangniu katikhai mibo, majibo lamga masan siakjiu silura leng-e.
John Baptist Tu Manarabo Lamga Pisikhaibo
5 #
1 Char 24.10. Herod niu Judaea ga mawang bambo tingga, Abijah gu singku kiriangga, Zechariah chiu kubo singku khat bamme. Panao zanniu Elizabeth chiu ku-e; padi singku kiriang gasu-e. 6Panai khangniase Tingwang mikphuiga matipjiu Rapiu gu Tacheng-tajai hina majaijiu khatdi kadin piujiu lungbam mai-e. 7Panaira panai nah lung makge palamra Elizabeth hai nakampui-e, khatdi Zechariah panai khangniase thenthui mide.
8Naikhatra Zechariah damdi wangtangjiu Charaky lungga singku tiense kamra wangde. 9Paliugu singku cheng saisuijiu paniu rathakbamga maru mataora taden thonpadle. Sijengniu paniu Rapiu gu Charaky lungga ngutde, 10paniu maru matao bambo wan gase maidungniu lenlam kahumjiu bamme.
11Paniu maru matao bamga, rathakbam majadlamse Rapiu gu maza khat chapbambo patu lenkhaide. 12Zechariah niu patu ngaoluboga pingmide khatdi manang mide. 13Chiudi maza siniu pakhuga din-e, “Pingtulo, Zechariah yo! Nangniu khengbo rathoise Tingwang niu chiukhaide, sichiujiu nanao Elizabeth niu piumainah khat lungsune. Nangniu pazan John chiujiu kurabo-e. 14Pah lungwang dasai nang dejiuga chunwi-matha ralo, khatdi maidung kakeng niudi dejiukha chunwi ralo! 15#Par 6.3.Pahai Rapiu mikphuiga kadibo mai khat thiu rabo-e. Para mumjaw maksai chiangna sakmak rabo-e. Patu managap gasu Masanbo Hiupuina siniu phuikhai mirabo-e, 16sichiujiu paniu Israel mai kakengtu paliu Rapiu Tingwang khulam malankhai birabo-e. 17#Mal 4.5,6.Pahai phaimiukakung Elijah kumjiu pumtan bamjiu khatdi tanjiu Rapiu masuangga tadrai sune. Paniu papiudung nai panahdungtu pui aruang khai lanne; paniu kadin piumakbo nahdungtu tacheng matipbo lun-lungga jukhaine; paniu Rapiu maidungtu kadenkhai rabo-e.”
18Zechariah niu maza khuga din-e, “Haise dechiu pad ralo chiubo Iniu dechiu silu ralo? I tanpao mide, khatdi anaodi tanpeh mide.”
19 #
Dan 8.16; 9.21. “I hai Gabriel si-e”, chiujiu maza siniu paokakge. “I hai Tingwang masuangga chapbambo, kawicham haise nakhuga paokhaira atu langwangbo-e. 20Chiudi pawan wangtang dasai majijiu padrabo haise, nakhuga Iniu dinkhaiboga nangniu malum makge. Haise nangniu malum makbo jengniu, nakhuga Iniu ladrian thiukhaibo haise wangtang makthen nakhuan hamijiu, npao ngamlak mirabo-e.”
21Sichiujiu bamga maidung siniu Zechariah tu khuanjiu, paniu haitheng-theng dekamjiu Charaky lungga bammi gulo chiujiu paliu suang hajiu bamde. 22Paniu padlanboga, paliutu npao ngamlak mide, sijengniu Charaky lungga wa tasibo khat ngao mide chiubo paliuniu simide. Paniu pakhuan pad lulak mibo donniu, pabenniu paliu khuga kamlen khaide
23Zechariah niu Charakyga patiense loilujiu paky lam malanwang mide. 24Sibosai panao Elizabeth papum ripmide, sichiujiu chahiu mangiuse paky gasu tadpad makjiu bam khangde. 25Sichiujiu Elizabeth niu din-e, “Tuhoira Rapiu niu kanamboga atu nkha khai bide. Maidung ruangga Iniu mangambo haise paniu luthon khai bide.”
Jesu Tu Manarabo Lam Pisikhaibo
26Elizabeth niu papum ripmibo chahiu charuk tangmiboga Tingwang niu pagu maza Gabriel situ Galilee ga bambo Nazareth namdakga langkhaide. 27#Mt 1.18.Chawang David kiriang gasu Joseph leng khammibo riliu khatleng champao paniu phungwangde. Riliupui zanse Mary chiu ku-e. 28maza siniu pakhuga wangjiu din-e, “Nakhuga agi-manai bamlo! Rapiu niu natu maluang bamme khatdi natu dijiu thoikhai bide! Npuimai ruangga nangra sanwibo pui-e.”
29maza gu champao siniu Mary lungchun kam chariusui mide, sibo cham siniu degu padsu ralo chiubo pasuang hamide. 30Siga maza siniu pakhuga din-e, “Pingtulo, Mary yo, Tingwang niu natu lungsa khai bide. 31#Mt 1.21.Nangniu napum ripjiu nangnah piumai khat lungsune, khatdi nangniu pazanse Jesu chiu mathak rabo-e. 32#2 Sa 7.12,13,16; Isa 9.7.Pase paken dirabo-e khatdi Kukachangbo Tingwang Nahpiu chiujiu kurabo-e. Rapiu Tingwang niu papao David kumjiu patu chawang khat pithiu khai rabo-e, 33khatdi paniu Jacob kai-kikga tingthengjiu chawang thiurabo-e; pawangdihse wadaodi pamalan thiulakge!
34Mary niu maza khuga din-e, “I hai liuchang khatle. Dechiujiu haikumbose padsu ralo?”
35maza siniu paokakge, “Masanbo Hiupuina siniu nariga wangrabo-e sichiujiu Tingwang pumtan nariga wangkiu rabo-e. Haijengniu masanbo ngena situ Tingwang Nahpiu chiujiu kurabo-e. 36Naky phiuga Elizabeth tu maningtaolo. Pase thenthui mibo sai, tuhoi papum ripbo chahiu charuk tangmide, patuse nakampui chiujiu kumibo-e. 37#Chab 18.14.Palamra Tingwang niu kam ngammakbo wadi ha-e.
38Mary niu din-e, “I hai Rapiu vangpui-e, nangniu dinbo kumjiu akhuga padmi sulo.” Siga mazase tadmide.
Mary Niu Elizabeth Tu Phuira Tadbo
39Sibosai Mary niu kalangjiu Judea ramluonggu namdi khatga tadmide. 40Paniu Zechariah kyga tadlujiu Elizabeth tu kahum sude. 41Elizabeth niu Mary gu kahumbo khuanse chiuboga palungga bambo ngenase nbob khang-e. Elizabeth se Masanbo Hiupuina niu phuilujiu, 42pakhuan tanjiu din-e, “Nang hai npuimai ruanggasu nasan withubo pui-e, khatdi nangniu lungrabo ngenase paphaw chagaa-e! 43Dekamjiu haijiukha kadibose akhuga padjiulo, chiubora a-Rapiu puiniu akhuga wangjiu atu phuikhai bibo hai! 44Palamra nangniu zu-ngaobo cham dinbose chiugap, alungga bambo ngenase pachun wijiu nbob khang-e. 45Nangniu Rapiu chamse nakhuga pachang palingjiu padrabo-e chiubo malum kalubo hai dejiuga nasan wibo gulo!”
Mary Niu Thuonbo Lui Thiubo
46Mary niu din-e: “Alung chunniu Rapiu tu thuon-e;
47Tingwang, atu Rankhaipiu donniu ahiupuina chun wi-e.
48 #
1 Sa 1.11. Palamra luimakbo pavangpui atu, paniu maningtao khaibi-e!
Tuhoi gasu mai hinaniu atu sanwibo pui chiujiu kumine.
49Palamra Kangambo Tingwang niu wa kadibo aleng kamkhai bide. Pazan hai masanbo-e.
50Patu chakhuang thiu maitu chaken machang paniu lungsa khaibi-e,
51pagu kangambo benpomse henpadjiu tasaothiu mainiu rangbo hinase kam mara khaibi-e.
52 #
Job 5.11; 12.19. Paniu chawangdungtu paliu wangbam gasu jukiu lujiu,
lung manon maitu jusu khaibi-e.
53Mariu maitu kawibo tatekniu pimagiu khaibi-e,
kalekwi maitu papumruang phutkhai bi-e.
54Paniu aliu pao-pehmai khuga ladriat khaibose
wangtang khaijiu, Israel maitu lungsa khai bi-e!”
55 #
Chab 17.7. #1 Sa 2.1-10.Paniu Abraham tu maningtao khaijiu
pakai-pakik hina khuga lungsiat hai lenkhai bi-e!”
56Mary niu Elizabeth tu chahiu sum kumbo maluang bamlujiu paky lam malanwang mide.
John Baptist Tu Manabo
57Elizabeth niu ngena lungrabo ting wangtangjiu, paniu npiumainah khat manade. 58Pakining maidung nai pasingnadungniu Rapiu gu maisuang habo lungsiatse patu pikhai bide chiubo chiuluboga, paliu mathiu chunwi machamde.
59 #
Lev 12.3. Ngenase nidkak khat tangmiboga paliuniu pagi romraleng wangde, khatdi paliuniu pazan hai papiu zan champonjiu Zechariah chiu kura kam sude. 60Siga papuiniu din-e, “Chiulakge! Pazanra John chiu kurabo-e.”
61Paliuniu pakhuga din-e, “Chiudi sibo zan kajon sira nakiriangga ha-e!” 62Sichiujiu paliuniu papiu khuga kamlenjiu ngena zan paniu dechiu kunilo chiujiu maniu-e.
63Zechariah niu raokhai rabo pek khat khenglujiu raokhaide, “Pazan hai John chiu kurabo-e.” Dejiuga paliu suang hamilo! 64Sibo wansiak gasu Zechariah pakhuan padlanjiu npaolan mide, sichiujiu paniu Tingwang tu thuon sude. 65Pakining maidungse pingmide, sichiujiu sibo chamse Judaea ramlung pakhiangnaga dinchia mide. 66Haibo cham chiumai hinaniu paliu lungga makumjiu haichiu din-e, “Haibo nah hai dechiu padsu ralo?” Palamra Rapiu pumtan hai pariga bamme.
Zechariah Niu Sailad Dinbo
67John piu Zechariah se Masanbo Hiupuina niu phuilujiu, Charawang chamse haichiu dinsude:
68“Israel mai Rawang Rapiu tu aliu thuon sukhe!
Paniu pamaidungtu nkha khaijiu, khenrang pithiu khai bide.
69Paniu pavang David kai-kik gasu aliuleng kangambo Rankhaipiu pikhaide.
70Pagu masanbo phaimiukakung mai khuga nda ladriat thiukhai mibo-e.
71Paniu aliu mikremai khugasu gukhai bine,
paliugu pumtan gasu gukhai bine chiujiu ladriat thiukhai mibo-e.
72Paniu din-e, aliu pao-peh maidungtu lungsabo lenkhai bide;
pagu masanbo ladriatse maningtao khai bide.
73-74Paniu aliu pao Abraham khuga ladriat khaibo kumjiu,
aliugu mikremai khugasu gukhajiu, aliuniu ping makjiu patu macha rabo-e.
75Aliu ringting bamthen pasuangga masanjiu khatdi nchangjiu lung rabo-e.
76 #
Mal 3.1. “Ngena yo, natu, Kukachangbo Tingwang gu phaimiukakung chiujiu kurabo-e.
Rapiu masuangga nangniu tadraijiu paleng npui kaden khai rabo-e.
77Sichiujiu maidung nuanse kuak khaijiu paliutu gukhai rabo-e,
chiubose pamaidung khuga dinkhai rabo-e.
78Aliu Rawang haira lungsasibo nai palung manuonbo piu-e.
Pagu juringbo nbiuse aliu riga thaoben khai bine.
79 #
Isa 9.2. Kashaibo mahiuga bammai riga tinggen lamsu thaokhai bine;
agi-manaibo npuiga aliutu jukhaijiu aliutu gukhai bine.”
80Ngena siniu papumdi, hiupuina gadi tanjiu mawi khangde. Paniu Israel maidung ruangga lunglen makhabo suangga ramjingga lung-e.
Currently Selected:
LUKE 1: LIANBSI
Highlight
Share
Copy
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
