MARK 13
13
Jerusalem Xumk Namlog Dubdynam Pagoq
(Mt 24:1-2; Lk 21:5-6)
1Jisu Xumk nammam apaqpel wleq dukho mwwg buu akgon benum, “Tomswrbo, kaato! Soq wlw torab si ho nam sam hoggub kangam alwb mvpan!”
2Jisu birwqnum, “No soq wlw pvvsiq-paameql mvnam nam sam kaado, soq pengko so doonbo wlw pwkin gonkam mwwg dookho doom dvb jiram, wlw pwxiam mwwg dook hoqgv joopaq dvb nyitayin!”
Vs-axaq Kvla Mvnyi-mviyanam
(Mt 24:3-14; Lk 21:7-19)
3Kokw so Jisu Olib puutu aohog Xumk nam langk taqcib dookurl doodwk ho Pitor, Jems, Jon hoo Andriyo bulv vpwb mwwg dookub haanum. 4Bulv benum, “Soq tulu si hwdam nyitayin ngulam bekin tvb, hoo hoq moodv haaknam mam kaacin dvb hognvkv xeq nyitayin ham ngulam bekin tvb.”
5Jisu bulam birwqnum, “Hiyv nvkam nulv sup komab hengab dooto. 6Nyiv ngoqg eminb haal ngoqg puiyam bednvk hvl betayin, ho haal betayin, “Ngo mwv” hoo bulv nyi tulungam vigo sup tayin. 7Nulv ogumho nyob panam mam ho aado hoo nyob panam mam tapa tvl nulug hangv mwwkwq-svqwq maab, soq svk nyinam si nyiky dvb nyitayin, hvbmabde hvb nyijaqkam moodv wnya dvn hvl mwwmabv. 8Gvda akwn gvda gon nyob paiyaq minstayin, lvpw akwn lvpw ak gonam patayin, gvda mwlwho nyiobiv hwqtayin, dwr-kanongv wtayin, soq tulu si ko cinc cirabnam hvb nyidwn.
9“Nulv atv kam hvvminl hengab dooto. Nulam nootul nyel maqpar boatayin. Nulam Sinagog uraho jwwtayin, nulv gora abwg agaho, lvpw atwg agaho ngoqg emin gab daql bulam tugu puiyam bekin dvb nyitayin. 10Hvbmabde wd moodv haama daab tugu puiyam nyob luuxig dook agaho bekin dvb nyitayin. 11Nulam nootul nyel maqpar bool wg yukam nulv hognvkam betayin ham mwwdwq maab, hvbmab hoq moodam nulam hognvkam bedwb jitayin ham nulv beto. Hoggab nulam bedwb jinam agamhv nulug atwg galoqkv ma, hoq tuluhv Dvrwqbo yal galoqkv jitayin. 12Nyi tulungv bulug atwg boram nyi tulug alaqho jitwl bulam mengm dvb jitayin, ho ab tulungv kam atwg ko tulungam hvb nyitayin. Ko tulungv kam bulug ab annam ceebiob hang baqtayin hoo bulam mengm dvb jitayin. 13Nyi vxiv nulam ngoqg emin gab oyum yumkum tayin. Hvbmabde hiyv nyiv kokw nagub cwql dooyu tayin mwam ywwtayin.
Almanbo Bosnam Mood
(Mt 24:15-28; Lk 21:20-24)
14“Nulv hoq “Almanbo Bosnam” ham dookin maak nyookho doonam mam kaapa tayin. “(Hiyv poory dvn mwv tacinto!) Judiya gvdaho doonbo nyi tulungv yorn puutub keleqto. 15Hiyv nyiv mwwlo aoho doodwn mwv ipoql mwwg nam urab haal nam hoqgv hog akukam bvl wg dvb naamabv. 16Hiyv nyiv rongo lo yvdwn mwv nammwb wkurl kamtam naatab wmab, 17hoq moodam nyem ko gvnbov la ko gwwi twwm xiqn bov hentwr jaqkam henbin yaatayin. 18Pwnboam Xumto soq tulu sam nyim mvmab tapam poolam. 19Hoggab hoq moodwg hentwr hv gvda gvt so nywywngam gvda gvt sam Pwnbov pwdwk hoqgv sool godab hengka maanam hentwrv. Ho kolam kam soq svk nywywngam nyita ma. 20Hvbmabde hoq moodam At Sw anyo dukub mvpa kun, hvb mwv mvmalo, hiyvkam swwram. Mwwg xuqnam nyi tulu gab hoq moodam anyo dukub mvpa kun.
21“Ho hiyv akgon nulam, “Kaato, Kristo si doodo, hvbmab Kristo vv doodo,” hvl bejaqkam nulv mwam tvjw maab. 22Hoggab xaalyo bo Kristongv ho xaalyo bo nyiqry benbo tulungv lengtayin. Bulv swrdorxeqb nyimanam mam nyil Pwnbog xuqdumnam nyi tulungam sup dvb nyitayin. 23Hoqgab nulv atam hengab suto! Hoggab ngo hog mwlwngam nyima daab nulam bekin pakun.
Nyia Ko Tuupwg Haaiyin
(Mt 24:29-31; Lk 21:25-28)
24“Hoq hentwr moodv wxo kokwngam doonyiv kaaya tayin kun, poolv kam huukram. 25Takar tulungv ao toloqgv hol tayin, hoo doa ao tolo nyinamv ok sutayin. 26Nyia Ko Tuupv xitor-xilob nyil doomwq ao toloqgv ipoqnam mam kaapa tayin. 27Mwv mwwg ao gumtw tulungam gvda gvtwb poop daayar kanam tvl Pwnbog xuqnam nyi tulungam gvda taqg-loosaq gamlam mvmtayin.
Taoq Svvnam Doocnam
(Mt 24:32-35; Lk 21:29-33)
28“Taoq svvn soqgv doocnam lo ak nulv cengto. Taoq svvn haqbv vjwl jenyeql okv jurlin yinyi lo nulv cengdwn, dug poolv ogum paku. 29Hoq hvbkalam, nulv cengto, soq mwlw sam nyinam mam kaapa yinloqkam, moodv ogum paku, mwv hvvnwq paku. 30Sam mwwgabto soq mwlw si sija turl doonbo nyi tulungv sima daab nyitayin. 31Swcw nyodongv nyiileq jaqkam noqg agam tulu si nywywngam niiram.
Hiyvkam hoq Aalam la Moodam Cengma dvn
(Mt 24:36-44)
32“Hiyvkam hoq moodam hvbmab aalv hwdam haatayin ham cengma dvn, ao gvdag ao gumtw tulu ngvkam ho Ko Tuupv kam cengma dvn, hvbmabde Pwnbo aro cingtwq dvn. 33Hoqgab nulv atam hingkub sul dooto, hoggab hoq moodv hwdam haatayin ham nulv cengma do. 34Soq si nyi ak mwwg nammam nyera tulug alaqho apaqpel, nyera tulungam bulug at atwg vxig bonam nyim dvb tompaq jipel nyoyw wleqnum hoo nam rvkybo akam rvky mvdwb jinbo hvb nyidwn. 35Hoqgab hengabl hvvminl dooto, hoggab nam atv hwdam haata yikun ham nulv cengma do, lokam Ariyum mam hvbmab doonyi caalin kalam haakam dvn. 36Cengma lvpa golo haabnyiloqkam nulv mwam yubngaql doodub kaapa komabv. 37Hoqgab ngo nulam mwlwngam bedwn, Hengabl kaayal dooto!”
Currently Selected:
MARK 13: NISS
Highlight
Share
Copy
Want to have your highlights saved across all your devices? Sign up or sign in
Nyishi, DVRWQ PVVB @ Bible society of India 2016
