LUK 8

Jisun Wmin Gvnbo Nyem Acam

1Ho meeg apo go kokw so Jisu nampam gon hoqgv nampam gonwb wnv Pwnbog lvpwg Tugu Puiyam betam tamkarnum. Buu wyw leq vnyiv mwwg lvgab wmin gvnum. 2Hoqgv gwr-sony alaq lo vc apy hoqgv mwpnam nyem acam gokam mwam wmin gvnum. Soq nyem benyanam acam soqg akwnho uiyv kvn paqta go ruqxa jinam Magdalin hvl benam Meeri; 3hoqgv Herod lvpwg yolu bikuml nyel namlo ho doonbo Cujag nywxw Joana, la Susanna la ho nyem asaq mwlwngv mwwg lvgab yvbanum. Soq nyem acam si bulug at swwnam-geenam hoqgv Jisu nvla mwwg buu tulungam hindjaqb cinam honam mam nyinum.

Vly Aaxy Liinam mam Doocnam

(Mt 13:1-9; Mk 4:1-9)

4Nampam pvmci-pamt hoqgv doolwg nyiv haabnv mwwg dookho hwwt yukam Jisu soq sam doocil benum. 5“Nyi ak mwwg ammam liitab wnum. Mwv ammamnvn rongo ho paqnum. Hoqgv am tuugin lamta wga ho hopyin atv caajabnum, hoo pvtangv ham pal dvnum. 6Tuugin wlw aolo hop kunum hoqgv kokw so swwrab yukam kediv bampam maagam gab bulv huutwr kunv sengknv sinum. 7Am tuugin taa-haageqho hopnum hoo nwmw nwsinv bulug lvgab swwrab ming kunv bulam swwceq tukul siknum. 8Hoqgv am tuugin ked alko golo hopnum hoo hv svvnwb swwrab kunv lwwg lwwg goqb vmlyw ywwci ywtv vmcwr baqknum. Hoqgv Jisu benum, “Hvnyiloqkam nulv nyuru baqd nyiloqkam sam hindib tagabto.”

Doocil Benam Tulug Pagoq

(Mt 13:10-17; Mk 4:10-12)

9Jisun mwwg buu tulungv soq doocil benam pagoqkam toxnum. 10Jisu birwqnum, “Pwnbog lvpwg mwwnam puucw jaqkam nulam cengm dvb jigyin, hvbmabde nyi tuuginv kaatlakam kaacin maab tatlakam tacin maab nyikam twqto mwwnv bulug aoho soq sib doocil bekin gvdwn.

Am Paqnbo Akam Doocnam mam Bekinam

(Mt 13:18-23; Mk 4:13-20)

11Hoqgab soq doocil benam si hoq hvblak pagoqkv doodwn. Am vmcirv Pwnbog agamv. 12Lamta agaho hopbo am tulu si soq sam tanbo nyi tulug nyinam hvbjaq nyidwn, hvbmabde bulam mwwjw jwwl ywwlinam mam naamram mwwbnv uiyv haabnv bulug hang ura hoqg agam mam naareql wg dukun. 13Lwwtaq aoho hopbo am tuluhv soq sam tatwl hemp pol agam mam naanbo nyi tulug hvbjaq nyidwn. Hvbmabde bulug mvvmiangv guugab nan dooma ko-gab, bulv apo gob mwwjw kokw so pooka-yirka moodv haada yukam bulv bwdw hod kun. 14Taa-haageqho hopbo am tulungv soq sam tanbo nyi tulug hvbjaq nyidwn, hvbmabde bulv swwca yukam nyet nyeram bvla hemp-hengam kvdab nyil swwgam gab bulug vmlywngv niqtuq lengma dvn. 15Ked alko ho hopbo am tulungv agam mam tatwl alwb nyil swwnbo nyi tulug hvbjaq nyidwn.

Muram Pwcw Kulubl Apnam

(Mk 4:21-25)

16“Hiyvkam muram rwgab tvl pwcw uralo kulubl ap maadwn hoo kartaqnan niikum hookam tvp kama dvn. Hvbmabde urab haanbo nyi tulungam hutongam kaapa mvdwb mwwnv mwv muram mur tvpkolo tvpdvn. 17Hoqgab hutob naalin deemanam dvrab haag jijaqkam kvsil dooma dvn, hoq ao hoqgv cengd maanam bvla bepor maadynam dvrab haag jijaqkam dooma dvn. 18Hvnyiloqkam nulv hog bvxeq tatwn, ham hvvminto, hoggab hiyv lajaqkam hog ak doogbo nyi ak ham vijaqg jiky dvb nyidwn, hvbmabde hiyv lajaqkam hog akam doogmab nyi ak hoqgv mwwg hog meceqgo doog dvb mwwnam hamkam naareq keedwb nyitayin.”

Jisug Annv la Bor Tulu

(Mt 12:46-50; Mk 3:31-35)

19Jisu mwwg annv la mwwg bor tulungv mwwg dookub haanum, hvbmabde nyiv dumtwq-miilyw ko-gab bulv mwam kaapa mins lamanum. 20Nyi akgon Jisu benum, “Noqg ann la bor tulungv nam kaatab aga vv doodu do.” 21Jisu bulam benum, “Pwnbog agam mam tal bugil swwnbo nyi tulungv ngoqg ann bvla borwb nyidwn.”

Jisu Doogum Dooiyam Biturnum

(Mt 8:23-27; Mk 4:35-41)

22Aal golo Jisu mwwg buu tulug lvgab swp golo caobanv benum, “Kuj ngulv swnyiq kvtin gonwb wnya nuj.” Hoqgab bulv wrab nyanum. 23Bulv swp gol wdul dooikam Jisu yubdunum. Hoo pwd dooi poot al poog swnyiq aoho nwwkub-nwwxeql swp koolam issiv bwwrdvb nyirab banv bulam mwlwngam sig tanum. 24Nyi tulungv Jisug dookub haabnv mwam muu nv benum, “Bir atv, bir atv! Ngulv sisv twqb nyidul doodkun!” Jisu huurab banv cooikab dootwk hvl dooiyam la issam gaml jinum, hoo swrsomalo kunum. 25Kokw so mwv buu tulungam benum, “Hogloqho nulug mwwjwngv?” Hvbmabde bulv loml hoo bosnum, hoo akwn akwn bemin sunum. “Soq nyi ak si hiyv yu? Mwv gaml jida kalam dooi-issiv kam mwam tado!”

Rugaqbo Nyi Ak Jisu Mwpnum

(Mt 8:28-34; Mk 5:1-20)

26Bulv Galili haabo tingtw jaqho doonbo Gerasen nyi tulug gvdaho wc kunum. 27Mwv swnyiq deetamb cao twqx kalam rugaqbo nyi ak Jisun nampam hoqgv juqrwqnum. Mwv otuqjaq hoqgv vj koomanum, hoo nam lookam doomab nyinum hvbmabde mwv nyubu buutaqlo doonum. 28Hwdlo mwv Jisun kaapa yin, mwv vc alwb sogoq goqnv mwwg agaho geqp banv benum. “Mwlwngam koi yaanbo Pwnbog Ko Tuup Jisu! Noqg lvgab ngo hog nvk bon nyisv doodwn? Ngo nam mvnyi-moiyul bedwn ngam anya kaasar gob mvmabv!” 29Jisu mwwg gv hoqgv ui almabam ruqxa jiyikam mwv soq sam benum, otuqjaq hoqgv soq si mwam nootu keenum, hoo mwam lyoqdwr gai lvgab mwam lees bakam mwv lyoqdwr gai tulungam duqpwqnum. Hoqgv mwam uiyv diixa-rara cumciqb seel wgnum. 30Jisu mwam toxnum, “Noqg eminv hoggv?” “Ngoqg eminv Mvqlw Acamv,” hvl mwv birwqnum. Hoggab uiyv vijaqg mwwg gv urab haanum. 31Mwv bulam kaalv jema bo bwdwb innwk hvl kanam maabwk hvl bulv Jisun mvnyi-moiyul benum.

32Hoq diitaq yorn aoho iriq pvtw twwt al twwg ww dudul daqnum. Bulam hoq iriq riqcamg gv urab haam dvb jit bvk hvl ui tulungv Jisun mvnyi-moiyul benum, hoo mwv bulam wwm dvb jinum. 33Hoq gabnvl ui tulungv nyi ak hoqgv leng layil iriq tulug urab haaknum. Iriq riqtwngv swnyiq deetam hoqgv wlw lwwtaqb ngurl laikul swnyiq uraho holwql sinum.

34Hoq hvb nyinam mam kaapel iriq kaaya bo nyi tulungv keknv nampam hoola gvdaho puiyam bekinnum. 35Hog bvxeq nyinum ham kaatab nyi tulungv wnum. Bulv Jisug dookub hvvnwq banv ui tulug wleqnam nyi akam vj kootwl Jisug lvpia lwkw ho doodwb kaapa nyatwl bosnum. 36Nyi akam hog bvxeq mwp kunum ham kaanbo nyi tulungv nyi tulungam bekin kunum. 37Kokw so bulv ceceq jaqb bosbanv Gerasen nyi tulu mwlw jaqkv Jisug dookub haabnv hoqgv wn kuk hvl bulv benum. Hoq gabnvl Jisu swp urab caaknv wleqnum. 38Ho ui tulungam ruqxanam nyi ak hv Jisun benum, “Ngam noqg lvgab wdwb jila bv.” Hvbmabde Jisu mwam benum, 39“Nammwb wkur gvdkul Pwnbov hognvkam noqgab nvl nyij pakun ham bekin ta.” Mwwg gabnvl Jisu hognvkam nyij pakun ham nyi akv nampam lvpajaqb wknv bekin kunum.

Jairasg Ko Nyem hoo Jisug Vj Laqyap ham Gvbwbo Nyem

(Mt 9:18-26; Mk 5:21-43)

40Jisu swnyiq taqgonwb wkur yukam mwam kaaya yoodul doonbo nyi tulungv mwam alwb haatwk hvl svgagvrwqnum. 41Kokw so Jairas ngvk hvl benam; Sinagog nam hoqg saab ak haanum. Mwwg nyem ko jwrtum akinv sita ko-gab mwv Jisug lvpia lwkw ho geqp banv mwam mwwg nammwb wtwk hvl mvnyi-moiyul benum, 42nyem ko akv vnyw camleq nywnyi gob nyinum.

Jisu wdul dooikam taqg-loosaq hoqgv nyi tulungv mwam hwwlubnum. 43Vnyw camleq nywnyig vrr ui sarl dook bo nyem ak doonum, mwn mwnwg swwnam mwlwngam dvab nyub tulungam hiqxin kunum, hvbmabde hiyvkam mwnwn mwp nyomanum. 44Nyem ak hv Jisug langkwb haabnv mwwg vj laqyapam gaqka kalam mwnwg namc ui sarn bov nyiory jaqb svrnyin kunum. 45Jisu toxnum, “Hiyv yu ngam gaqka bov?” Vcw atv cengma jijaqk hvl benum, Pitor benum. “Bir at, nyiv mvqlwjaqb noqg taqg-taqsaqb nam hwwiyum palak.” 46Hvbmabde Jisu benum, “Nyi akgon ngam gaqkapa, hoggab ngoqg ator lengnam mam ngo cengtba.” 47Ngam cengs duk lanyik mwwnv nyem akv tvmdwr dwrbnv Jisug lvpia lwkw ho geqp kunum. Hoq gabnvl mwn gaqkanum hoo hoggub mwn gaqka kalam ho dara al kunum, ham mwn nyi vcw atwg agaho Jisun mwn gaqkanum hvl bekinnum. 48Jisu nyem akam benum, “Ngoqg nyem ko, noqg mwwjwngv nam aldvb mwp paku swrsomalob wnku.”

49Jisu soq sam bidul doodwkho saab nam hoqgv daaxar xarnbo ak haanum. “Noqg nyem kov sinkun,” mwv Jairasnvn bekinnum, “Tomswr boam bidwq bek jik maab. 50Hvbmabde Jisu sam tapa tvl Jairasnvn benum, “Bos maabv; mwwjw twqto, hoo mwn altaikun.” 51Kokw so nammwb haabnv Pitor, Jon hoo Jems la nyem ko ann ab tulungam bepa maabjaq hiyv nvkam mwwg lvgab urab haamin gvdwb jimanum. 52Nyi mwlwngv nyem ko akgab bulug haabongam cedin cedin banv xabl doonum. Jisu benum, “Xamabv ko akv sima sulak mwn yubngaql doodwn!”

53Bulv nyem akam sinkun hvl ceng gam gab bulv mwam nyirnyi nyiryanum. 54Hvbmabde Jisu nyem ko akam alaqkv purab banv benum “Ko, gorabtuk!” 55Nyem ko akwg yalv hookur yukam cox alwb gorab kunum hoo Jisu mwam hog dvslo dvm dvb jitwk hvl bulam benum. 56Hoqho nyem ko ann abv deedy jaqgok bo hvl mwwnum, hvbmabde hognvkv nyinum ham hiyv nvkam bekin maabwk hvl bulam Jisu benum.

Currently Selected:

LUK 8: NISS

Highlight

Copy