BON 26

Poul Mwv Lvpw At Agrippag Agaho Bidsunum

1Agrippa Poulwn benum, “Nam atam bid mvdvb gaml jigyin.” Poul mwwg alaqngv irab banv mwam atv bid sunum.

2“Lvpw at Agrippa! Ngo noqg aga so soolo ngo atam Juhudi tulungv ngam yolu benam mam bid sudub mood kaapa ko-gab paqyalinco mwwdwn. 3Soq si jvqtwngv, no Juhudi tulug nyicw-mwcwngam la haqyaq minsnam mam cingx pvqrwl doodwn. Hoqgab ngo nam hindib ngoqg benam sam cwqg dvl tagab tvk hvl bedwn.

4“Juhudi tulungv mwlwngv ngo yaapa hoqgv hoggub nyil swwnum ham cengdwn. Bulv otuq hoqgv ngo ngoqg atwg gvda hoola Jerusalemho ngoqg swwknam mam cengdwn. 5Ngo hoggub nyil otuq hoqgv ngulug dormo nyi jaqb nyil Parisi tulug dvpar hoqgv swwcanum, ham bulv looxiam cengl doonum, ho ham bulv bekin dvb mwwb nyiloqkam bulv bestayin. 6Hoo ngo sija mvl pw-hwwk so daqdwn si hvbaloqkam ngo ngulug at ab tulungam Pwnbov dingrwl apnam mam mwwgw ko-gab sulak. 7Ngul mwlwg nyob wyw leq vnyig aal aiyib xumbnv Pwnbog dingrwl ap jinam mam mwwgw doonam ak hamsu. Hoo soq vcwrko mwwgwnam aro gabsu, Gora ab, ngam Juhudi tulungv yolu hwws dvn! 8Hoggab Juhudi tulu nulv Pwnbov sik boam purab dvnwk hvl mwwjw maadwn?

9“Ngokam Najaretwg Jisug eminam ceebiob hang baql hog mwlwngam nyic nyiangam nyika tvs mwwtwn. 10Hoq hvbjaq ngo Jerusalemho nyinum. Ngo nyub buda tulug hoqgv gaml naalayil Pwnbog nyiam vigo pvtwq ho nootul lwql apnum, hoo bulam mengl yvikam kvtaq pa hvl loomin gvnum. 11Ngo vigo bulam Sinagog nam mwlwho laqm-baqmnum. Hoo bulam bulug mwwjwngam apaq mvdkub biturnum. Ngo hang lingtwr twryanum, hoqgab ngo nyiig gvda bvkam wbnv bulam mvnyi-mviya taab wnum.

Poul Mwv Jisun Hoggub Mwwjwnum Ham Bekinam

(Bn 9:1-19; 22:6-16)

12“Hoqgab ngo soq sam nyidum tas mwwl, ngo nyub buda tulug hoqgv gaml naalayil nyeram yaagub Damaskaswb wnum. 13Ho aal lvpa ra jaqho, Gora ab, ngo doonyi lvlaqngam huubin yaanbo huto ak doonyi ao toloqgv ngam la ngoqg lvgab wba bo nyi tulungam huulubnum. 14Ngul mwlwngv hatib geql kunum, ho Hibru agamb benam yal ak ngo tapanum, ‘Soul, Soul! hoggub ngam mvnyi-mviya dvn? Svv hvvbv mwwg atwg svvda xoociqngam dukur banv duikam atam dusnam hvb, no hoggub atam mvsdvn.’ 15Ngo toxnum, “At Sw, no hiyv?’ Hoo At Sw birwqnum, ‘Ngo noqg mvnyi-mviyanum Jisu ak hv. 16Hvbmabde no sija gorab tuku. Ngo nam ngoqg nyerab xuqdub mwwnv nam ngo kaakin taab haanum, no nyi asaqngam ngoqg galoqkv hognvkam kaapan ham bekin dvb hoo kokwngam nam hognvkv ngo kaakin tayin ham bekin dvb nyitayin. 17Ngo nam Israel nyi tulug alaq hoqgv naalin layil Nyoodo nyiingam naalin mvdwb kanam tayin, 18ho ui alaq hoqgv Pwnbog alaqb haag dvl ngam mwwjwl bulug nyic nyiangam Pwnboam axia kotwl, bulam Pwnbog xuqnam nyi tulug pengko ho doomto.’

Poulwg Jisu gab Bon Nyinam mam Bekinam

19“Lvpw at Agrippa, hoqgab ngo ao gvda toloqgv nyiqry kaanam mam ngo tamab anamdvb nyimanum. 20Otuqjaqb Damaskas alo hoqgv Jerusalem, hoqg kokwb Judiya gvda tvqpwb Nyoodo nyi tulug pengko ho puiyam bekin tvl bulam bulug nyic nyia hoqgv mwwkur gvdwl Pwnbog dookub hookur gvdwl bulv mwwkur pakun hvl nyidynam mam nyil kaakin mvdwb nyinum. 21Soq sib nyigam gab sulak ngam Xumk nam uraho Juhudi tulungv ngam nootu banv mengtanum. 22Hvbmabde soolo godab Pwnbov ngam svka kaal doodu do, hoqgab ngo mwlwngam ngoqg puiyam koi ge anyo ge, xinam ge ximanam ge nyi mwlwngam aiyinb bekin dvn. Ngoqg beg dvnsi nyiqry benbo tulu ngvla Mojesg hoqhvb nyitayinwk hvl benam gamkin ham beg dvn. 23Ywwnbo akv hentwram hendwb nyiky tayin, hoo mwv sikbo tulug pengko hoqgv otuqjaqb gorab rabco bogub nyitayin, ho Juhudi tulungam la Nyoodo nyi tulungam ywwt ywwnam hutongam bulam bekin tayin.”

24Poul atam soq sib bid yukam, Pestas mwam sogoql benum, “Poul no rugaq paku! Noqg nyijwq-nyegam jwqlaq-bulaqkv nam rudkub mvpa ku!”

25Poul birwqnum, “Gora Ab, ngo rugaq maaslak! Ngoqg googdvn agamsi gaml jvqtw jaqb bedwn. 26Lvpw at Agrippa! noqg agaho ngo haakam alwb bedwn, hoggab no soq pagoqkam cengdwn. Ngo mwwjwdvn soq nyinam mwlwngam vx-ceram no kaagab panpv, hoggab soq si kvsil cuukiq bvrw golo nyimanum. 27Lvpw at Agrippa, no nyiqry benbo tulungam mwwjw dvn yv? Ngo cengdwn no ham mwwjwdvn!”

28Agrippa Poulwn benum, “Sija vcwrda no ngam Kristan mvta dvn i?”

29Poul birwqnum, “Mood anyo swwg ge koi swwg ge, ngoqg soolog benam mam todul daqn boam, nam la nyi mwlwngam ngoqg hvb nyim dvb mwwdwn hvbmabde ngo nulam leem parm dvb mwwma dvn!”

30Kokw so Lvpw atv, Laat saabv, Bernis la mwlwngv daqrabnum, 31hoo wlayil bulv akwn akwn bemin sunum, “Soq nyi ak sam pvtwq lwqd bvkam hoo mengdvb mwv hog gokam nyixiaq wxiaq jimanyi.” 32Hoqgab Agrippa Pestaswn benum, “Soq nyi ak si mwv Bir abam sorma nyiloqkam mwam tolin jikin paku.”

Currently Selected:

BON 26: NISS

Highlight

Copy