BON 25
25
Poulwg Bir Abam Sornam
1Pestas hoq wc dvk aal loum kokw so mwv Sijariya hoqgv Jerusalem wnum. 2Ho nyub buda tulungv la Juhudi tulungam nyig wgbo tulungv bulv Poulwg yolungam Pestaswn sornum. Bulam aya mwwpal Poulwn Jerusalem kanam tvbwk hvl xuml benum, 3Hoggab bulv Poulwn lamtaho mengpaq dvb ywrsil apnum. 4Pestas bulam birwqnum, “Poulnvn nyumwb Sijariya gvdaho nyuum pvtwqho lwqpwl ap pan, hoo ngo vnwqb oyu maadab aloqb wkur taikun. 5Hoqgab nulug nyig wgbo tulungam ngoqg lvgab Sijariya wbal nyi ak ham mwv hog yolu nyipa paloqkam pw-hwwto.”
6Pestas aal looyw gob bulug dook hv doope kul kokw so Sijariyab wkur kunum. Aal loogwn so mwv pw-hwwk lvpwho doolin banv Poulwn boa mvnum. 7Poul pw-hwwk lvpwho hvvc dvkho Jerusalem hoqgv haanbo Juhudi tulungv mwwg taqg-loosaqho daqtwl Poulwg aoho bibum biyiql vigo bigw dooma jaqb tvbwq maadvb yolu benum. 8Hvbmabde Poul atam bipy sudub benum. “Ngo hoggub nyilakam daapo gokam dwqma, hvbmab Roman Bir Abam kam hog ceebiob nyimur ma.”
9Hvbmabde Juhudi tulungam paqk dvb mwwnv Poulwn toxnum, “Ngoqg aga so nam yolu begdvn sam no Jerusalem wl yolu sam pw-hwwdy kodwb mwwma?”
10Poul birwqnum, “Ngo Bir Abwg pw-hwwk agaho ngam pw-hwwk dvb ngo daqdwn no atv cengs do, ngo Juhudi tulug ceebiob hog akukam nyimur go nyima. 11Ngo pvvbam daapo korbo paloqkam hoo ngo sig pagoq yolu go nyipa paloqkam, hoqgv ngo keleqtayin hvl bema. Hvbmabde bulug yolu benamhv jvqtw ma, bigw dooma baloqkam hiyvkam ngam bulug alaqho jilwq dvb haakam bo dooram. Ngo Bir Abam sordwn.”
12Kokw so Pestas, mwwg nyegam tomswrbo tulug lvgab bvrwqngam tvdy cootwl birwqnum. “No Bir Abam sorpa nyiloqkam, no Bir Abwg dookub wdwb nyitayin.”
Poulwg Puiyam Pestas Agrippan la Bernisnvn Betamnam
13Oyu yooma kokw so Lvpw at Agrippa Bernis Sijariyab Pestaswn svgagvrwq taab haaba sunum. 14Bulv apo jaqg Sijariya ho dooxo kokw so Pestas Poulwg bvrwqngam lvpw atam bekinnum: “Soq pvtwq si Peliks nyi ak nyumwb apaqpel wleqnam nyuum ak doodwn; 15hoo ngo Jerusalemb caadwkho Juhudi tulug nyub buda tulungv la nyi nyiixa tulungv mwwg aoho yolu pw-hwwnum, ho ngam bulv mwam sim dvb pvvb patwk hvl benum. 16Hvbmabde ngo bulam benum, Roman nyi tulungv yolu nyipabo nyiam mwam yolu benbo lvgab nyuqm kalamv tuptwl goody mins maad deedib hiyv nvkam jidub nyima dvn. 17Bulv hvvc twqda kalam, ngo meegkam doonu maab loogwn so mvl ho pw- hwwtab dootwl nyi akam boa mvdwb gaml jinum. 18Mwam yolu benbo tulungv daqrab benum, hvbmabde bulv yolu poot jaqgo mwam beta dvn go ngoqg mwwnam hvb bulv bemanum. 19Mwlwngv bulv mwwg lvgab bulug atwg dormo pagoq hoq la Jisu ngvk hvl benam nyi sikbo akwg pagoqho haqyaq minsnum. Hvbmabde mwv hvraqb turl doodnvk hvl Poul benum. 20Ngo mwwbwq kumab soq bvrwq sam hoggub mvbyu mwwnv, ngo Poulwn no Jerusalem caal soq yolu sam pw-hwwdy kob yv hvl toxnum. 21Hvbmabde Poul Bir Abam mwam pw-hwwk sutayinwk hvl benum, hoo mwam pw-hwwdy namgob nyi rvkybo daqg sut bvk hvl benum. Hoqgab ngo mwam Bir Abwg dookub kanamnam gob mwam nyi rvkybo daqg yaatwk hvl gaml jinum.”
22Agrippa Pestasnvn benum, “Ngo atv soq nyi ak soq benam mam tvnw do.”
Pestas birwqnum, “Aram no mwwg benam mam tato.”
Poulwn Lvpw Atwg Agrippa la Berniswg Agaho Boanam
23Loogwn so Agrippa La Bernis nyi mwlwngv poqkum dvb Dookum nam urab bopam hoqgv sipai tulug saab lvgab la nyi xinam tulug lvgab haanum. Pestas gaml jitwl Poulwn urab boa mvnum. 24Pestas benum, “Lvpw at Agrippa hoo ngulug lvgab dooba nyi mwlw si, nulv soq nyi ak sam kaato, mwam soq doonbo Juhudi tulungv la Jerusalem boloq doonbo Juhudi tulungv ngoqg aga si mwam soranum. Bulv sogoq kiir banv mwam swwm dvb jima bvk hvl bedo. 25Hvbmabde ngo mwam sim dvb jaqb mwwg hog yolu swcin nyigo wgonam akukam meepa nyoma. Ho mwv atv Bir Abam sorgam gab ngo mwam mwwg dookub kanam dvb mwwl ap pakun. 26Hvbmabde ngo mwwg pagoqkam hog hvvtwjaqgo Bir atam pota xeql jilwqsv meepa nyoma. Hoqgab ngo mwam nulug aga si boa pan, hoo lvpw at Agrippa noqg aga jaqho booduml boa jipan! Hoqgab mwwg yolungam hindib miidil pw-hwwxo tvl, ngo xeqs loq ak naadwb mwwdwn. 27Hoggab nyuumwg yolu pagoqkam hindy alwb bekin maabjaq nyuum mam kanamnam si ngoqgab pagoq alma.”
Currently Selected:
BON 25: NISS
Highlight
Share
Copy
Want to have your highlights saved across all your devices? Sign up or sign in
Nyishi, DVRWQ PVVB @ Bible society of India 2016
