MATHIU 24

Jisun biakinn Mang rang ha A ri

(Mrk. 13:1,2; Luk. 21:5,6)

1Jisun biakinn tenna a suak a che lai han, a thiamruoingain Biakinn ha ama jiang do ranga an lui hong. 2Hale Jisun anmani jiang a hong ti, nang nin hiva rakipngai hi mu ma che u mo? Kein nang ni jiang a thiang tak kati ani, hivahin lung an khat in an khat chunga dekhuiluia mak lai noni u.

Khodengthei Le Pongna

(Mrk. 13:3-13; Luk. 21:7-19)

3Atun a man olib tangbunga a onglai, a thiamruoingain rukchian na ama jiang an honga anti; hiva rakip hi i tik mo a hong suak rang na ri pero? Hale nang in na hong rang le ramuol torna rang pha jet na ija mo ani rang?

4Hale Jisun anmani jiang a hong sanga a ti, tu innom nang ni ha a le lam tiang an na ruoi mak na rang kan ning theiru. 5Ajarko a tam lam ning kei ka minga hong nan ta, ti nanti u, “Kei Khrista ka ni,” hale a tam lam a le lam tianga na ruoi nanti. 6Hale nang nin ral le ral tho chongjet nanti, enru, nang nin nan ning man dong maru; ajarko hiva rakipngai hi a suak rang ke, tak-ha a torna ko la nimak. 7Ajarko jat khat le jat khat chunga, hale rengram khat le rengram khat chunga hong kansuol nanti, hale mun dang danga bu om lui, natsat, le ning nu kan nik suak nati. 8Hiva rakip hi pong khodengthei phutna ani.

9Hava han anmanin nang ni ha pong khodengthei na penanti hale nathat nanti, hale jat rakip in ka ming jarra nang ni ha na matir nanti. 10Hale hava han a tam lamin kutsuikesui nei nanti, hale khat le khat hong kan enda nanti, hale khat le khat hong kan matir nanti. 11Han tashanthei nunchantho tam tak hong suok nanti a tam, lam a le lam tiang ruoi nanti. 12Hale ajarko, dan chong jui lui ning a hong tam jarra, mi atammin kan lungsiat hong om noning 13Tak-ha a tor nakhanna duitor ama ha shanring nati, 14hale rengram chongsat hi, jat rakip jiang shakhi chang na ranga ramuol pumpuia ri nanti; hale hava han a torna hong ni nati.

A pha Hong satlui

(Mrk. 13:14-23; Luk. 21:20-24)

15Hava jarra tashanthei Daniel in alui ri chong mi khodengthei nale matir om na mun ha a thiang an ngir nan mu rang, tu aninom a pa a man jetrase. 16Hava han Judia a om anmanin tangbunga tan rase u. 17Innchunga a om a man inn sunga phur lui na rang hong chum ma rase. 18Hale lui a a om a man a puanshi lui ranga vakir ma rase. 19Tak-ha chungrik om le naite neingai rang ko, hava ni khuongai han pong khodengthei ni nati. 20Hale nang ni nan tan ha phabi animakle sernikhuo sunga animak na rang pathian jiang lamru. 21Ajarko hava han ramuol a phut lai tenna a tor khanom lasuak lui, hale i tik aninom suaklai lui rang a lian tak pong khodengthei na ha ni nati. 22Hale hava ni khuongai ha manbong niluiako, takshanei rakip shanring tor noni u; tak-ha athangshuoksa ngai rang ko ni khuongai ha manbong pe nanti.

23Hava han tu ang khat in enru; hivahin animakle handing Khrista a om a ti inko; nang nin hava ha takngai maru. 24Ajarko Khrista mel pu a tashanthei kanlem hong suak nanti, hale anithei inko thang suaksa tenna a le lam tiang ruoi na rang jet na a lian tatak le a ngak a ngak pa do nanti u. 25Enru, kein nang ni jiang a rapa ka na ripe jui.

26Hiva jarra anmanin nang ni jiang, enru, ama ha ramtonglian na a om; anti inko hongche maru; hale enru, ama ha in a sunga a om antinom, takngai maru. 27Ajarko ni sua tianga kolkanlet ha taitaktiang a el anga, Mi Pasalnai a hong rang ham hava anga ni nati.

28Ajarko athisha tak ruang om na han langkia ngai han kan chun nanti.

Mi Pasalnai Hongna

(Mrk. 13:24-27; Luk. 21:25-28)

29Pong khodengthei ni khuongai ha a tor lenle, Simnin jing nati, hale sortha om avarpek noning, arshingain vanram tenna vachul nanti, hale vanram ranak ha kan nik nati. 30Hava han vanram ma Mi Pasalnai jet na ha mu nanti, hale hava han Simlei chunga jat rakip in limkansirra an rop bennanti, hale ranak le ma hok lian tak Mi Pasalnai ning vanram ma chunga a hong ha anmanin mu nanti. 31Hale a man ama vantirngai ha, pengkul rasa ring tak le hong kan tir nati, hale anmanin ama rang an thang suoksa ngaiha vanram amongna an khat tenna a dang khat tenna aki manli rakip manchun nanti.

Theichang Kung Tenna Jetna

(Mrk. 13:28-31; Luk. 21:29-33)

32Hiva thei chang kung tenna kan chuna neiru a chang ha ning ahongnuia ana a hong nei pha han nang nin kholum a hong nai jui tihi nan jet. 33Ha ang han nang nin hiva rakip hi nan mu pha han inn kot kunga a hong nai jui tia nang nin jetru. 34Kein nang ni jiang a thianga kari ani, hiva rakipngai hi lungdo a tung maje hiva miruol hi lator noning. 35Vanram le simleiko lamang nati, tak-ha ka chong ngai hiko manglai noning.

Tu khat ning om a phat ha jet ma u.

(Mrk. 13:32-37; Luk. 17:26-30,34-36)

36Tak-ha hava nikhuo le aphat ha ka pa nilui a, thaneithiangngai nom, hale tu khat in om jet ma u. 37Tak-ha Noa phatlaija alui ni ang han, Mi Pasalnai ning a hong rang ham ni nati. 38Ajarko tuilian nikhuo a hong nimakma, Noa ning rokuang lian na alutmak karje, anmanin an chak anin mui an ruoi hale mui ruoi rang an kan pek an lui om. 39Hale tui a hong lian han anmani an renga atanpui suo maje an lui jetlui anga Mi Pasalnai nain a hong rang ham ni nati. 40Hava han lui a mi annin om nanti, an khat ha tuang nanti hale an khat ko mak nanti. 41Numei annin chakiri tak om nanti, an khat ha tuang nanti, hale an khat ko mak nanti.

42Hiva jarra kan ning theiru, ajarko nang ni nan puman a hong rang pha nang nin jet ma che u. 43Tak-ha hivahi jetru, ho angpha han arukpan a hong rang ha inneipun alui jet inko; a man lui kan ning nata a man anmani ha lui manruk tor noning. 44Hiva jarra nangninom kanning chak omru, ajarko nang nin nan ngaidon mak, phat tak han Mi Pasalnai ha hong nati.

Takngai Le Takngai lui Suak

(Luk. 12:41-48)

45Ha aninko chak le nek a pha chapcha anmani jiang pe na rang; inneipun inn sung mirakip chunga vai hom ranga aluimak, takngai om rang a ching suak ha tu mo? 46A ma inneipun a hong pha han, aleikan ninga a om suak ha ravansat ani. 47Kein a thianga nang ni jiang kari ani, a man a nei rakip chunga a maha a en rangpu ha manchang nati. 48Tak-ha a satlui suokning a lung sunga a ti, kaneipu la hong bak noning tia, 49hale ashap chang pui suokngai ha ve a hong phut jui, hale juruingai le a chak a inpuisuom inko, 50Suak ha ning a ngaidon mak nikhua le a kan ning mak na a phat han, a neipu ha a hong rang ani. 51Hale ama ha abobong tan nati, hale asat kan rol ngai le ama a tum ha manmusuom nati, hava han chap le harialna chang nati.

Currently Selected:

MATHIU 24: AIMOLBSI

Highlight

Copy