MATHIU 23

Jisun dan Oja Le Pharisingai Ruia A ri

(Mrk. 12:38,39; Luk. 11:43,46; 20:45,46)

1Hava han Jisun mitamngai le a thiamruoingai jiang alui ti, 2dan thei oja le pharisingain Mousi ong na han an ong, 3Hiva jarra anmanin anti rakip ha nang nin thoru, hale ngakru; tak-ha anmani an tho nuk jui a tho maru, ajarko anti ha anmanin tho ma u. 4Ajarko anmanin choi torlui rang phurriktak an khit, hale mingai liang chunga an tet; tak-ha anmanin ko an kutchal tennam man kan chek jot ma u. 5Tak-ha anmanin an chuan tho rakip ha mi ning an mu na rang an tho, an raka an man paklong hale an puan si om an manchualdun. 6Anmanin kholaikhang na mun na ongnamun asatak hale Sainagok sunga ong na lian tak han an ong. 7Kaithiallaiya mi ning chubei an buk hale “Ojapu” tia an kui rang hi an dei. 8Tak-ha nang niko, Rabbi tia man kan kuimaru, ajarko nan oja khat jak Khrista ha ani, hale nang ni nan renga ulenai, nan ni. 9Simlei chunghin tu khat om a pa, tia kuimaru, ajarko nang ni nan pa ko vanram ma om ama jak ke ani. 10Hale nang ni ha oja tia man kan kuimaru, ajarko nang ni ojako Khrista jak ke ani. 11Tak-ha nang ni karra a lian tak ha ning nang ni suak chang nati. 12Hale tu aninom a man kan lian ama ha duk lut mi chang nati, hale atak in a man kan sin ama ha man lian nanti,

Jisun A sat Kanrol Ha Ada

(Mrk. 12:40; Luk. 11:39-42,44,52; 20:47)

13“A sat kan rol danthei oja le pharisingai, nang ni jiang pong khodengthei ke! Ajarko nang nin vanrengram ha mingai ranga nan kharjui, ajarko nang nin nom lut ma che u; animakle a lut rang mingai ham nang nin man lut mak che u, 14asat kan rol danthei oja le pharisingai, nang ni jiang pong khodengtheina ke; ajarko mei thai ngai inn nansut hale nang nin nan thongalla a sot tak lam na nan nei, hiva jarra nang nin a lian na siatna nan mu rang ke.

15“A sat kan rol danthei le pharisingai, nang ni jiang pong khodengtheina ke! ajarko nang nin tang le tuija nan lon na mi khat in nan nun chan atho a, hale a man a che le ko nang nin ama ha nang ni anga mei khurra nai veini nan manchang.

16“Mitdelngai lamkei, nang ni jiang khodengtheina ke nang nin nanti; tu ang khat in biakinn minga khomak shamna an nei inko, i om nimak; tak-ha tu ang khat in sana biakinn minga khomak shamna a nei inko, ama ha lamal atualjui. 17A am le mitdelngai, ajarko sanale sanamanthiang biakinn holam mo a lian? 18Hale tu aninom doitho mun minga khomak asham ha ko i om nimak, tak-ha tu ang khat in hava chunga a om an khat phur minga khomak sham ha lamal atualjui. 19A am le mitdelngai, holam mo alutdet, ajarko an khat phur le an khat phur a man thiang doitho mun ha holam mo a lian? 20Hiva jarra doitho mun minga khomak sham a man hava chunga a om phur rakip minga khomak ashamjui ani. 21Biakinn minga khomak sham a man hava sunga a om ama a minga khomak ashamjui ani. 22Hale vanram minga khomak sham a man Pathian ong nale hava chunga a om ama minga khomak ashamjui ani,

23“A sat kan rol dan oja le pharisingai, nang ni jiang pong khodengthei ke! Ajarko a rim hui luila-ai, hop le jera ha sem soma sem khat nankat bak; hale dan chong lut chuan ngai ha, adik, lungsiat thei le takngai lam ha tak tel ma che u; hiva rakipngai hi nan jui rang ani hale nan mak rang shuakmak. 24Mitdel lamruoingai, thui ha nandalchian na saringsei nanlem.

25“A sat kan rol dan oja le pharisingai nang ni jiang pong khodengthei ke! Ajarko nang nin kok lai le kheng ha ma pal jak nanrashuk, tak-ha a sunga ko an jot mak chunga sutnale an tak kan chur torlui ning ashiptit. 26Pharisi mitdel kok lai le kheng ha ma pal tiang om a hongthiang na rang; a rapatak a sung ha man thiangru!

27“A sat Kanrol dan oja le pharisingai, nang ni jiang pong khodengthei ke! Ajarko nang ni hi thanna a ngui antei en ranga asat hale a thiang lui ning a ship anga nan ni. 28Hi ang hin nang nin ma pal tiang ko mingai jiang, mi dik ang han nan man kan mu; tak-ha a sunga ko asat kan rol le dan chong jui lui ning ashiptit.

Jisun Anmani Khodengthei rang A ri

(Luk. 11:47-51)

29“A sat kan rol dan oja le pharisingai, nang ni jiang pong khodengthei ke! Ajarko nang nin tashantheingai thannom nansin, hale midikngai ngaidon na rang than om nanmansat. 30Hale nanti kein in kan pa kan pungai phat lai han kan lui om inko, tashantheingai thisen ha anmani le kanlei lui rang ani. 31Hiva jarra nang nin tashantheingai an lui that anmani an naingai, kan ni tia nang nin shakhi nan pek. 32Ha aninko nan pa nan pungai an lui tho ha manshipru. 33Rulla a hong suak naingai, mei khur chongtan na han ija mo nan kan khel rang? 34Hiva jarra adik tak a kein nang ni jiang, tashanthei, miching le dan ojangai ka tir, anmani a lek nang nin nan that rang; hale, Khros nan manthirang hale anmani a lek ha nang ni Sainagok sunga adik khan nan ve rang ke, hale khuo khuo khodengthei pek na ranga nan not rang ke. 35Hivahi nang nin biakinn sung le doi thomun kongkarra nan lui that mi dik Abel a thisen tenle, Zakharia a pasalnai Barachia thisen tenna; Simlei chunga alui chul midikngai thisen rakip, nang ni chunga a chul rang ke. 36Kein nang ni jiang a thianga kari ani, hiva mithatna rakip tanti hi hiva mirual chunga hong chul, nati.

Jisun Jerusalem A lung Asiat

(Luk. 13:34,35)

37Tashantheingai nan lui that hale nang ni jiang an juangtirngai ha lunga nan lui deng, “O Jerusalem, Jerusalem! Arpui in a tha nuaia a tengai akua ang han kein om, nang nanaingai ha i duk ki lui kuade jotmo, tak-ha, nang nin lui jot lai ma che u. 38Enru, nan inn arong kanga nang ni jiang an mak jui. 39Ajarko kein nang ni jiang kati, Puma minga a hong, ama ha ravansat ke ani tia nanti maje, a tun tenna phut nang nin kei hi namulai noni che u.”

Currently Selected:

MATHIU 23: AIMOLBSI

Highlight

Copy