MATHIU 16

Angakpa Na man muro

(Mrk. 8:11-13; Luk. 12:54-56)

1Hava suale pharisi le sadusingain an honga, ama jiang ensin na an lui nei; an dingkel vanram tetan na an khat keini jiang na man muro. 2A man a hong shanga anmani jiang a ti “Nitak tiang a hong ni pha han nang in nanti, khojar hui nati, ajarko van hi a sen. 3Han jiangtiang han ko, ve enniko khojar hui noning, ajarko van hi a sen a chok, asat kan rol ngai, nang nin van ha nan en na imo a suak rang tia jet tor tak-ha atun na asuak rang hi ko jet tor ma che u. 4Mi satlui le omsalui tho mirual ning jet na an tok, hale tashanthei Jona jiang jet na ha ni lui a adangjetna i te pek lai noni u, hale a man anmani ha a mak a a che jui.”

Pharisi Le Sadusingai Chol

(Mrk. 8:14-21)

5Hale a thiamruoingain varal khattiang an hong han, tal an hong choi rang ha an luitheini. 6Hava suale Jisun anmani jiang a ti, “Pharisi le Sadusingai chol ha ka ning thei a om ru.”

7Hale anmani masia an kansiama anti, ajarko keini tal ite khat hong choi lai masing.

8Tak-ha Jisun a jet anmani jiang a ti, “O nang ni a viar jak takngai, nang nin tal hong choi masing tia i ruia mo nan masia nan kan siam?” 9Atun khan na nang nin nan la jet lui mo animakle nan ngaidon lui mo, tallom ranga hin mi lising ranga hale luk ijatmo nan rut? 10Animakle tallom sari a mi lising manli hale nang nin luk ijatmo nan rut? 11Kein tal ruia nang ni jiang ka ri lui na hi nang nin ija mo nan jet lui? Tak-ha pharisi le sadusingai chong ha nang nin kan ning theiru.

12Hava pha han anmanin an hong jet ha ko, chol tal ha kan ningru a ti nimak, tak-ha pharisi le sadusingai man chuna ha a tia ni.

Pitar Ning Jisu Ruia A rimanthiang

(Mrk. 8:27-30; Luk. 9:18-21)

13Jisun Sisaria Philippi ramtiang a hong pha han, a man a thiamruoingai jiang a dingkel la a hong ti, “Mingain Mi Pasalnai ha tu mo ani anti?”

14Hale anmanin anti, “Aviar in Johon Baptis ke, mi alekin Elaija ke, hale midangain Jerimia ke animakle Pathian tashantheingai khat ke an luiti.”

15A man anmani jiang a ti, “Tak-ha nang ninko kei hi tu mo nan nati?”

16Hale Simon Pitar ning, a shanga a ti, “Nang ko a ring Pathian Pasalnai Khrista na ni.”

17Jisun a hong shanga ama jiang a ti, “Simon nai Johon nang ko ravansat na ni; ajarko tak sa le thi sen in nang jiang an na manjet nimak, tak-ha vanram ma om ka Pa ning ana manjet ani. 18Hale kein nom nang jiang kati, nang ko Pitar ke nani, hale hiva lung chunga kein ka biakrup ka sin rang ke, hale simlei tharsari kot innom hava ha tor noning. 19Hale kein nang jiang vanrengram chabi ka na pek rang hale iangkhat ramuol la nakhit ha, vanram ha nom khit nanti, hale ramuol la nang ni nan ma sua ha vanram ha nom ma sua nanti.”

20Hava pha han a man a thiamruoingai jiang kei hi Jisu Khrista ka ni tihi tu jiang khat om ri maru tia chong alui be jui.

Jisun Apong Rang Le A thina rang A ri

(Mrk. 8:31—9:1; Luk. 9:22-27)

21Hava pha tenna Jisun ama a thiamruoingai jiang a ti, “Manmu na hi a phut jui ha ko a man Jerusalem ma a che rang, hale thiampulianngai hale dan thei ojangai tenna a tam lam pong nale khodengthei na mu nati, hale that nanti, hale ni thum chang na han thui khir nati.”

22Hava suale Pitar in ama ha a sir tiangkhat a tuanga man chuna anei a a hong ti, “Puma, nang tenna a kan lak ha ni rase, hivahi nang jiang suak noning.”

23Tak-ha a man a hong kanheia Pitar jiang a ti, “Ka nuk tiang chero seitan, nang hi kei ranga kutsui kesui na ani, ajarko nang in Pathian ha ngaidon mak che tak-ha miring taksa ranga na ngaidon jui.”

24Hava suale Jisun a thiamruoingai jiang a hong ti, “Tu ang mi an khat in kanuk anajuijot inko, a man a tak a theia kan jot ma rase, hale a man a khros luisen nang, hale kanuk na jui rase. 25Ajarko a ringkhuo kan san ring jot ama ha ning mang nati, hale kei ranga a ringkhuo a manmang tu ang khat ha ning a ringkhuo mu khir nati. 26Ajarko mi an khat in ramuol hi a renga a tum verra, ama a thavang a mang inko ama rang imo a nem na a om? Animakle mi an khat in ama a thavang le imo a kan thul rang? 27Ajarko Mi Pasalnai ha ning ama a pa mahok na han, ama thaneithiangngai le kanruoia hong nati, hava pha han mi rakip jiang an tak in an tho chuan nuk jui a tum rang ha a man pe nati, 28Adik tak a kein nang ni jiang kati ani, hivahin a ngir anmani aviar ko, mi pasalnai ha ning ama rengram ma a hong ha an mu mak kar je, thi tihi jet noni u.”

Currently Selected:

MATHIU 16: AIMOLBSI

Highlight

Copy